Bütün Azərbaycan xalqı ordumuzdan Qarabağın tacı olan Şuşanın azad edilməsini gözləyirdi. Ali Baş Komandan İlham Əliyevin noyabrın 8-də Şuşanın azad edilməsini bəyan etməsi Vətən müharibəsində Azərbaycan Ordusunun müzəffər yürüşünün pik nöqtəsi oldu. Şuşanın azad edilməsi ilə Ermənistan Prezident İlham Əliyevin şərtlərinə uyğun olaraq kapitulyasiya, məğlubiyyət aktına imza atdı.
Bu fikirlər Yeni Azərbaycan Partiyası Masallı rayon təşkilatı aparatında “Şuşa fatehləri” mövzusunda keçirilən tədbirdə deyildi. Tədbir Azərbaycan Respublikasının Prezidenti cənab İlham Əliyevin Sərəncamına əsasən 2022-ci ilin “Şuşa” ili elan edilməsi münasibətilə təşkil olunmuşdu. Milli qəhrəman və Vətən müharibəsində şəhid olanların ailə üzvlərinin, Vətən müharibəsi iştirakçıları və partiya fəallarının qatıldığı tədbiri giriş sözü ilə Yeni Azərbaycan Partiyası Masallı rayon təşkilatının sədri Seyfəddin Əliyev açdı. Ulu öndər Heydər Əliyevin, eləcədə Vətən müharibəsində şəhid olanların əziz xatirəsi 1 dəqiqəlik sükutla anıldı.
Seyfəddin Əliyevin geniş məruzəsi oldu:- Cənab Prezident İlham Əliyev yanvarın 5-də “Azərbaycan Respublikasında 2022-ci ilin “Şuşa İli” elan edilməsi haqqında” Sərəncam imzalayıb. Qarabağın tacı olan Şuşa Azərbaycan xalqı üçün müqəddəs və əziz məkandır. Şuşa sevgisi hər bir azərbaycanlının mənəvi varlığının ayrılmaz parçasıdır. Təməli 1752-ci ildə Qarabağ xanı Pənahəli xan tərəfindən qoyulan Şuşa şəhəri zəngin inkişaf yolu keçmiş, Azərbaycanın, eləcə bütün Cənubi Qafqazın mədəni və ictimai-siyasi həyatında müstəsna rol oynamışdır. Strateji mövqeyi ilə seçilən Şuşa Azərbaycana qarşı hərbi təcavüzə başlamış Ermənistanın silahlı qüvvələri tərəfindən 1992-ci il mayın 8-də işğala məruz qalmış, şəhərdəki yüzlərlə tarix və mədəniyyət yadigarı vandalizm aktları nəticəsində dağıdılıbdır. 44 günlük Vətən müharibəsində rəşadətli Azərbaycan Ordusu Şuşa şəhərini 2020-ci il noyabrın 8-də işğaldan azad etdi. Şuşa qalibiyyəti xalqımızın qəhrəmanlıq ruhunun təntənəsi olmaqla Azərbaycanın tarixinə Zəfər Günü kimi yazıldı.
Azərbaycan Respublikasının Prezidenti cənab İlham Əliyevin iştirakı ilə aprelin 22-də Dünya Azərbaycanlılarının 5-ci Qurultayının cənnət Qarabağın döyünən qəlbi, mədəniyyətimizin paytaxtı və tarixi qələbəmizin rəmzi olan, əziz Şuşa şəhərində keçirilməsi hər bir azərbaycanlı üçün əlamətdar hadisədir. Qurultayın Zəfər Qurultayı adlanması bizim üçün deyil, həmçinin dünyanın müxtəlif ölkələrində yaşayan bütün azərbaycanlılar üçün mühüm əhəmiyyət daşıyır. İndi dünya Şuşanın ev sahibliyi etdiyi Zəfər Qurultayından danışır. Dövlət başçısı İlham Əliyevin dediyi kimi, ümumiyyətlə, Zəfər adı xalqımıza çox yaraşır.
Natiq daha sonra bildirdi: - Azərbaycan xalqı 44 günlük Vətən müharibəsini qalibiyyətlə başa vuraraq zəngin irsində şərəfli səhifə açdı. Bu müharibə xalqımızın milli həmrəyliyini, öz haqqı uğrunda mübarizə aparmaq əzmini nümayişi etdirdi. Qalibiyyət isə Azərbaycanda ulu öndər Heydər Əliyev tərəfindən 1993-cü ildə başladılan, ötən illər ərzində Prezident İlham Əliyev tərəfindən ən müasir çağırışlar səviyyəsində həyata keçirilən ordu siyasətin mühüm nəticəsidir. Cəbrayılın, Füzulinin, Qubadlının, Zəngilanın, Xocavənd, Xocalı, Laçın, Tərtər rayonlarının kəndlərinin azad olunması, Xudafərində Azərbaycan bayrağının ucaldılması, İranla dövlət sərhədinə nəzarətin tam təmin edilməsi Azərbaycan Ordusunun möhtəşəm zəfəridir. Şuşanın azadlığı isə döyüşlərin kulminasiya nöqtəsi oldu. Qəhrəman Azərbaycan övladlarının dağlardan, meşələrdən, dərələrdən keçərək Şuşanı işğalçılardan azad etmələri hər bir Vətən övladında ayrıca qürur və iftixar hissi yaradır. “Şuşa əməliyyatı” müasir hərb tarixinin ən parlaq səhifəsidir. Şuşa əməliyyatını həyata keçirən cəsur əsgər və zabitlərə daim borcluyuq...
Qarabağ Müharibəsi əlilləri, veteranları və şəhid ailələri ictimai birliyinin sədri Nahid Rəhimov söz alıb dedi ki, Ali Baş Komandan İlham Əliyevin yenilməz siyasi iradə və qətiyyəti, ordumuzun gücü, xalqımızın öz rəhbəri ətrafında bir amal uğrunda səfərbərliyi Vətən müharibəsində Azərbaycanın parlaq Zəfərini şərtləndirən əsas amillər oldu. Şəhid atası Arif Əliyev, Vətən müharibəsi iştirakçıları Ceyhun Qurbanov, Qüdrət Əzizov və başqaları isə öz çıxışlarında bildirdilər ki, ölkəmizdə şəhid ailələrinə, eləcə qazilərə daim yüksək diqqət və qayğı göstərilir, onların sosial müdafiəsinin yüksəlməsi istiqamətində müvafiq işlər görülür. Bunlara görə Prezident İlham Əliyevə, Birinci vitse-prezident Mehriban xanım Əliyevaya minnətdarıq.
Zəfər ORUCOĞLU Azərbaycan Jurnalistlər Birliyinin üzvü
