Bir qrup Buzovna sakini Prezident İlham Əliyevə müraciət edib. Onlar dəniz sahillərinin qanunsuz olaraq çəpərlənməsindən şikayətçidirlər.
Qeyd edirlər ki, həmin əraziyə kanalizasiya suları axıdılır: “Mayın 4-də Buzovna sakinləri iməcilik edib, yeganə zəbt olunmamış 50 metrlik ərazini təmizləmişik. Lakin topladığımız zibilləri maşın gəlib ərazidən götürə bilmir. Çünki dəniz sahilləri hər tərəfdən, sağdan-soldan zəbt edilib. Qanunsuz çəpərlənmələr var. Dəniz çəkildikcə çəpərlər də dənizin içərisinə doğru uzanır. Qanunla dəniz sahilləri dövlətin mülkiyyətidir. 20-50 metr məsafədə gediş-gəliş məhdudlaşdırılmamalıdır. Xüsusən də bizim qayalıqlar, minilliklərlə formalaşan qayalıqlarımız məhv edilir. Üzərinə torpaq, daş-kəsək töküb özlərinə villa tikirlər”.
Qeyd edək ki, bu tip problem uzun illərdir yaşanır. Dəniz ətrafı ərazilər iş adamları tərəfindən zəbt edilir.
Razi Nurullayev: “Dənizin ətrafının hasarlanması vətəndaşların hüquqlarının pozulmasıdır”
Millət vəkili Razi Nurullayev qeyd etdi ki, dənizin ətrafının hasarlanması vətəndaşların hüquqlarının pozulmasıdır: “Dəniz sahillərinin aidiyyəti üzrə istifadə olunmaması Azərbaycan vətəndaşlarının Konstitusiya hüququnun pozulmasıdır. Vətəndaşın dənizə buraxılmaması ciddi qanun pozuntusudur. Ona görə də bu məsələ zaman-zaman gündəmə gəlir. Xatırladım ki, Avropa Oyunları zamanı Prezident İlham Əliyev Şıxovda Veloparkın açılışı zamanı parkın ərazisinə daxil ərazilərin hasarlandığını, villaların tikildiyini görmüşdü. Prezidentin göstərişindən sonra həmin tikililər söküldü. Dənizə çıxışı məhdudlaşdıran tikililərin sökülməsi məsələsinin də siyasi iradə ilə həll olunmasına ehtiyac var.
Ümumiyyətlə, bu problem qanunla həll olunmalıdır. Ümid edirəm ki, bir gün bu məsələlər qanunla həll olunacaq və vətəndaşların xeyrinə qərar çıxarılacaq”.
İlqar Hüseynli: “Tək Buzovnada deyil, Xəzər dənizi ətrafında olan ərazilərin böyük əksəriyyəti müəyyən insanlar tərəfindən zəbt olunub”
Sosial sahə üzrə ekspert İlqar Hüseynli qeyd etdi ki, tək Buzovnada deyil, Xəzər dənizi ətrafında olan ərazilərin böyük əksəriyyəti müəyyən insanlar tərəfindən zəbt olunub: “Normal fəaliyyət göstərən çimərliklər, demək olar ki, yoxdur. Çimərliklər sahibkarların nəzarətindədir. Təəssüflər olsun ki, çəpərlənmə prosesi geri çəkilmiş dənizin içinə qədər uzanır. Bu isə düzgün deyil. Çünki bu hal ekoloji fəlakətin baş verməsinə səbəb ola bilər”.
Həmsöhbətimiz onu da əlavə etdi ki, mərhum prezident Heydər Əliyevin sərəncamı ilə 300 metr məsafə dəniz ətrafı ərazilərdə tikinti aparılması qadağandır: “Həmin qanun hələ də qüvvədədir. Ancaq bu qanuna əməl olunmur. Görünür, son dərəcə oliqarxlaşmış imtiyaz və gücə sahib insanlar tərəfindən dəniz ətrafı ərazilər çəpərlənməkdə davam edir. Təəssüf ki, ölkəmizdə qanunların icrası və ona nəzarət aşağı səviyyədidir”.
Günel CƏLİLOVA
