Azərbaycan Milli Elmlər Akademiyasınının (AMEA) Geologiya və Geofizika İnstitutunun nəzdində olan Təbiət Tarixi Muzeyinin vəziyyəti acınacaqlıdır. Söhbət Həsən bəy Zərdabi adına Təbiət Tarixi Muzeyinin hazırkı vəziyyətindən gedir. Vəziyyət o qədər dözülməzdi ki, bu məsələ elmi ictimaiyyəti ciddi narahat edir. İndiyə qədər baxımsız qaldığı və AMEA- ya ayrılan pullardan bura xərcləmədiyi üçün muzey dağılmaq təhlükəsi altındadır.
Muzeyin vəziyyəti o qədər acınacaqlıdır ki, bunu AMEA-nın Ümumi yığıncağında Akademiyanın sabiq prezidenti, akademik Akif Əlizadə də dilə gətirib.
“Yeni bir atlasın yaradılması nəzərdə tutulub”.
Bunu AMEA-nın Ümumi yığıncağında Akademiyanın sabiq prezidenti, akademik Akif Əlizadə deyib. “O muzeyin dəyəri böyükdür, amma təəssüf ki, vəziyyəti acınacaqlıdır. Hesab edirəm ki, Təbiət Tarixi Muzeyinin keyfiyyətli bir məkana ehtiyacı var”- deyə AMEA-nın sabiq prezidenti vurğulayıb.
Maraqlıdır ki, illərlə AMEA-ya rəhbərlik edən A.Əlizadə həmin dövrlərdə muzeyin problemini “görməyib”, bunu indi dilə gətirir.
“Akademiyanın büdcəsində həmin maşına 250 min dollar verməyə pul tapılırdı, amma muzeyin təmirinə pul tapılmırdı”
Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov bizimlə söhbətində təəssüflə bildirdi ki, Azərbaycan üçün böyük əhəmiyyətə malik, unikal Təbiət Tarixi Muzeyinin bu hala düşməsi narahatlıq doğurur:“Akademiyanın illik Ümumi yığıncağında 8 il AMEA-ya rəhbərlik etmiş Akif Əlizadənin Geologiya və Geofizika İnstitutunun nəzdində fəaliyyət göstərən Təbiət Tarixi Muzeyinin vəziyyətinə dair açıqlaması ilə tanışam. 8 il AMEA-ya rəhbərlik edən və burada “Elm festivalı” keçirmək adı ilə Rusiyadan klounları gətirib səhnədə oynatmağa, şou görüntülü işlərə, zərirət olmadan AMEA-nın həyətində böyük bir mühafizə xidməti saxlamağa, AMEA prezidenti olarkən ən bahalı maşın almağa pul tapan adam, təəssüf ki, Təbiət Tarixi Muzeyinin təmirinə pul tapa bilməyib. Akademiya şəhərciyinin həyətində nə qədər iaşə müəssiələri, eyni zamanda akademiyaya əlavə pul gətirən cürbəcür müəssisələr yaradıldı. Akif Əlizadənin rəhbərlik etdiyi Geologiya və Geofizika İnstitutunun pəncərəsindən görünən akademiya bağında onun dövründə açılan çayxanadan gələn gəlirin müəyyən bir faizi əgər Təbiət Tarixi Muzeyinin təmirinə yönəldilsəydi, belə danışmağa ehtiyac da qalmazdı. Elə Geologiya və Geofizika İnstitutun yanındakı idman meydançasının illik icarə haqqının yarısı muzeyin təmirinə xərclənsəydi, o muzey belə acınacaqlı vəziyyətə düşməzdi. Adama sual verərlər ki, 8 il akademiyaya, Azərbaycan elminə rəhbərlik etmisən, nə iş görmüsən?”
İ.Orucov qeyd etdi ki, A.Əlizadənin rəhbərliyi dövrdə bu qurumda çox qanunsuzluqlar baş verib, qanunsuz ştatlar yaradılıb, Rəyasət Heyətinin ştat vahidi artırılıb, görüntü xarakterli işlərlə məşğul olunub. “Akademiyanın Yüksək Texnologiyalar Parkını sex səviyyəsinə salmış adamlar bunlar olub. İndi bunlar akadmeiyanın elmi müəssisələrinin qayğısına qalmaq iddiasına düşüblər. Çox təəssüf edirəm. Akademiya prezidendi olanda Akif Əlizadənin gəzdiyi maşının qiyməti 250 min dollar idi. Akademiyanın büdcəsində həmin maşına 250 min dollar verməyə pul tapılırdı, amma muzeyin təmirinə pul tapılmırdı. Mahiyyətdə bu durur ki, zamanında, məqamında onlara etibar olunmuş ən yüksək məqamdan elmimiz üçün yox, öz şəxsi məqsədləri üçün faydalanıblar. Hər zaman deyirəm ki, ölkə başçısı tərəfindən tapşırılmış ali vəzifələrin məsuliyyətini insan dərk etməlidir. Onun da vəzifələrindən biri akademiyanın müəssisələrini qorumaq, inkişaf etdirmək idi. 8 il akademiyaya rəhbərlik et və bu gün də “muzey dağılıbdir” de. Muzey bu gün dağılmayıb. Muzeyi sizlər dağıtmısınız. Bu muzeyin təəssübünü çəkməli olduğunuz halda çəkməmisiniz. Çox təəssüf...”- deyə İ.Orucov vurğuladı.
İradə SARIYEVA
