Azərbaycan dövlətinin siyasətinin təməlində, mərkəzində insan amili olduğu üçün daim sosial sahəyə xüsusi diqqət göstərilir. Həm maaşların, pensiyaların, təqaüdlərin qaldırılması, həm də sosial obyektlərin yaradılması, şəhid ailələrinə, keçmiş məcburi köçkünlərə diqqətin göstərilməsi kimi sosial paket imkan verirdi ki, dövlət nəzərdə tutulan iqtisadi islahatları uğurla həyata keçirə bilsin.
Məlum olduğu kimi, dünyada baş verən iqtisadi inflyasiyanı Rusiya-Ukrayna müharibəsi bir az da dərinləşdirdi. Buna misal olaraq çörəyin qiymətinin qalxmasını göstərmək olar ki, bu qaçılmaz idi. Dünyada taxılın, buğdanın qiyməti kəskin artdı. Bunu nəzərə alan ölkədə süni qiymət artımının qarşısını almaq məqsədilə dövlət orqanlarının tənzimləyici rolununun gücləndirilməsilə yanaşı, eyni zamanda, çox geniş sosial paket də həyata keçirilməyə başlanılıb. İnsanların sosial rifahının yaxşılaşdırılması üçün kompleks tədbirlər görülür. Maaşların və təqaüdlərin artırılması bunun bir hissəsidir. Təhsil, tibb və ordu bir xalqın xoşbəxt, sağlam, savadlı gələcəyinin əsasını təşkil edir. Bu mənada sözügedən sahələr üzrə xüsusilə son dövrlər ölkədə çox önəmli addımların atıldığının, keyfiyyətin yüksəldilməsi istiqamətində gərəkli qərarların verildiyi müşahidə olunur. Tibb-səhiyyə sahəsində həyata keçirilən islahatlar da əhalinin sağlamlığına xidmət edir. İslahatlar çərçivəsində keçən il ölkə üzrə fəaliyyət göstərən Ailə Sağlamlıq Mərkəzlərinin sayı 278-ə yüksəlib. Bakı şəhərinin rayonları üzrə 11 tibb mərkəzi, Sumqayıt şəhərində isə Sumqayıt Tibb Mərkəzi yaradılıb.
O baxımdan bütün bunların əhəmiyyətini ekspertlər necə dəyərləndirir?
“Bütün bunlar onu göstərir ki, dövlətin həyata keçirdiyi sosial siyasət çoxşaxəli və əhatəlidir”
Məsələyə münasibət bildirən millət vəkili Aydın Hüseynovun fikrincə, səhiyyə sahəsində aparılan islahatlar əhaliyə göstərinlən tibbi xidmətin keyfiyyətinin yüksəldilməsinə hesablanıb: “Əvvəla, sosial sahədə dövlətin mövcud proqramları var. Hər birimizə məlumdur ki, hər il dövlət büdcəsindən vəsaitlərin 40 faizi sosial məqsədlər üçün ayrılır. Başqa bir tərəfdən ölkə əhalisinin sağlamlığının qorunması üçün tibbi sığorta sisteminə keçilməsi, bu sahədə aparılan böyük uğurlu islahatlar, səhiyyənin inkişafı üçün atılan addımlar hər bir ölkə vətəndaşının sağlamlığına xidmət edir. Bu, ölkə vətəndaşlarının sağlamlığının qorunmasını özündə ehtiva edir. Azərbaycan üzrə Ailə Sağlamlıq Mərkəzlərinin sayının artırılması deyilənlərə əyanı sübutdur. Bütün bunlar onu göstərir ki, dövlətin həyata keçirdiyi sosial siyasət çoxşaxəli və əhatəlidir. Bu o deməkdir ki, dövlət öz vətəndaşlarının sağlamlığı keşiyindədir”.
Millət vəkili onu da qeyd etdi ki, əhalinin sağlamlığını qorumaq üçün görülən işlər davamlı olacaq.
Vidadi ORDAHALLI
