Son zamanlar sosial şəbəkədə qaz xəttinə hava vurulmasını iddia edən məlumatlar yayılır. Bildirilir ki, evlərdə qaz sobaları yandırılan zaman qaz xəttindən ancaq hava gəlir. Nəticədə, abonentlər qaz işlətmədən əlavə ödəniş etməli olurlar.
Sosial şəbəkələrdə geniş müzakirələrə səbəb olan bu məsələ nə dərəcədə realdır? Qaz xəttinə hava vurula bilərmi? Bunun hər hansı təhlükəsi varmı?
Nüsrət Qasımov: “Qaz xəttinə heç kim hava vurmur, qazın özünün standartı var və o standarta uyğun olaraq hazırlanır”
Kommunal xidmətlər üzrə mütəxəssis Nüsrət Qasımov bildirdi ki, qaz xəttinə heç kim hava vurmur, qazın özünün standartı var və o standarta uyğun olaraq hazırlanır: “Qazın tərkibinin standarta uyğun olması da müəyyən qurumlar tərəfindən yoxlanır. Kimin nə marağı var ki, qazın içərisinə hava vursun? Həmçinin, bu çox təhlükəli bir işdir. Bəzən evlərdə qazı yandıranda yarım dəqiqə, bir dəqiqə ərzində hava gəlir. Bu ona görə olur ki, bəzi insanlar naşı ustaları çağırırlar və onlar da qaz xəttini su xəttinə qoşur. Təcrübədə belə hallar baş verir. Su qaz xəttinə dolur, orada tıxac yaradır və qaz təchizatı pozulur. Bu da “Azəriqaz” İB üçün böyük problem yaradır. Bunu aradan qaldırmaq üçün kompressor çağırılmalıdır, qaz verilişi dayandırılmalıdır. Qazın işçi təzyiqi kəmərlərdə 500 mm-dir, onu 2-3 atmosfer təzyiqlə vurub suyu çıxarırlar. Suyu çıxarandan sonra qazı bərpa edəndə boruda qalan hava qazla bərabər istehlakçılara gedir. Cihazlarda 1-2 dəqiqə ola bilər ki, hava çıxsın. Bəzi savadsız adamlar elə bilirlər ki, qaza hava vurulur”.
Həmsöhbətimiz onu da əlavə etdi ki, qaza hava vuranda qazın konsentrasiyası metandan – 60 faizdən artıq olanda qaz yanmır. Qaza hava vurmaq özü cinayətdir: “Azəriqaz” bir ayda 60 milyon kubmetrdən çox qazı alıb-satır. Borunun içində qalan 2-3 kubmetr qaz “Azəriqaz”a nə verir ki, belə işlərə getsin? Bu tamamilə absurddur. Kimsə, görünür, gündəmdə qalmaq üçün və ya digər səbəbdən belə bir məlumat yayıb”.
Elçin Bayramlı: “Qaz təchizatında həllini gözləyən müəyyən problemlər var, lakin qaz xətlərinə hava vurulması…”
Sosioloq Elçin Bayramlı bildirdi ki, qaz təchizatında həllini gözləyən müəyyən problemlər var, lakin qaz xətlərinə hava vurulub abonentlərə satılması ilə bağlı yayılan məlumatlar əsassızdır: “Xətlərə havanın vurulması prosesi sırf profilaktik tədbirlər və təmirlər zamanı ola bilər. Həmin vaxt boru xətti hər iki tərəfdən bağlanır, qaz verilişi dayandırılır və xətdəki suyu çıxarmaq üçün kompressorla yüksək təzyiqli hava vurulur boru təmizlənir. Sonra qaz verilişi bərpa olunur. Bu proses zamanı abonetlərə qaz verilmədiyindən sayğac da yaza bilməz. Yalnız prosesdən sonra 2-3 saniyə hava gələ bilər ki, bu da boruda qalmış cüzi hava ilə bağlıdır. Həmin borunun içində qalmış cüzi hava, qaz verilişi bərpa olunarkən ilk saniyələrdə hətta sayğacdan keçərək qaz cihazlarına gəlsə belə, heç bir məbləğ yaza bilməz. “Ümumiyyətlə, qaz xəttinə hava qarışdırılsa, oksigen qazla qarışaraq partlayışlar törədə bilər. Bu qazların sıxlığı, tərkibi, xüsusiyyəti tamam fərqlidir. Sosial şəbəkələrdə yayılmış videolarda da görünür ki, bu proses günün günorta çağı hamının gözü qabağında aparılır, halbuki belə bir məqsəd olsa bunu gecə vaxtı və ya yaşayış massivindən kənarda gizlicə edərdilər. Yəni, burada texniki mümkünsüzlükdən əlavə, məntiq də yoxdur”.
Günel CƏLİLOVA
