Azərbaycanda aparılan səhiyyə islahatları çərçivəsində həm səhiyyə işçilərinin maaşı artırılır, həm də əhaliyə göstərilən tibbi xidmətlərin sayı. Bu da həm səhiyyə işçilərinin sosial durumuna yaxşı təsir edir, həm də əhaliyə göstərilən tibbi xidmətin keyfiyyətinin yaxşılaşmasına müsbət təsir edir.
Bu arada İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev 2021-ci ilin yekunları və 2022-ci ilin ilk üç ayı üzrə fəaliyyətlə bağlı keçirilən mətbuat konfransında deyib ki, həkimlərin əməkhaqlarının artırılaraq 1000 manata çatdırılması nəzərdə tutulur.
Onun sözlərinə görə, “Tibbi Ərazi Bölmələrini İdarəetmə Birliyi” publik hüquqi şəxsin tabeliyindəki tibb müəssisələrində çalışan səhiyyə işçilərinin əməyinin ödənilməsi Qaydası”na dəyişikliklər edilməklə 31 ixtisas üzrə çalışan həkimlərin aylıq əməkhaqlarının bütün məcburi tutulmalardan sonra tam məbləğinin 1000 manata çatdırılması nəzərdə tutulur. Z.Əliyev, əhaliyə göstərilən tibbi xidmətlərin keyfiyyətinin daha da yüksəldilməsi və tibb işçilərinin sosial rifahının yaxşılaşdırılması istiqamətində davamlı tədbirlərin həyata keçirildiyini bildirib: “Bu, səhiyyə işçilərinin əməyinin ödənilməsi qaydasına cari il üzrə edilən sayca 5-ci dəyişiklikdir. Çalışırıq tibbi xidməti alan tərəf məmnun olduğu qədər xidməti verən tibb işçiləri də icbari tibbi sığortanın tətbiqindən razı qalsın. Məqsədimiz tibb işçilərinin sosial rifahını yaxşılaşdırmaq və tibbi xidmətləri vətəndaşlara əlçatanlığı təmin etməkdir. Hazırkı artım 31 ixtisas üzrə çalışan 8 minə yaxın həkimə şamil olunacaq. 17 ixtisas üzrə çalışan həkimlərin maaşında artım 2 dəfəyədək təşkil edəcək. 14 ixtisas üzrə çalışan həkimin maaşında isə artım 20-90% arası dəyişəcək. Maliyyə imkanları artdıqca çalışacağıq ki, səhiyyə işçilərinin əməyinin ödənilməsi Qaydasına yenidən baxaraq onların sosial müdafiəsini daha da gücləndirək”.
Ümumilikdə, Xidmətlər Zərfinə dəyişikliyin edilməsi barədə Agentlik tərəfindən layihə hazırlanıb və aidiyyəti quruma təqdim olunub. 700 tibbi xidmətin Xidmətlər Zərfinə daxil edilməsi, ümumilikdə 3000-dən çox tibbi xidmətin icbari tibbi sığorta çərçivəsində göstərilməsi nəzərdə tutulur. Koxlear implantasiya əməliyyatının sayının 400-ə qədər (əvvəlki say 300). Endoprotezləşdirmə əməliyyatının isə 1200-ə qədər artırılması təklif edilib (əvvəlki say 300). İlkin səhiyyə xidməti, TTTYX, laborator, ambulator və stasionar tibbi xidmətlər üzrə Agentlik tərəfindən tibb müəssisələrinə ödənilən 1000-dən çox xidmətin tarifi artırılıb.
Qeyd edək ki, bundan əvvəl səhiyyə işçilərinin əməyinin ödənilməsi Qaydasına edilən digər bir dəyişiklik səhiyyə işçilərinə bilavasitə ixtisası üzrə çalışdıqları hallarda elmi dərəcələrə görə ödənilən əlavələrin məbləğlərinin artırılması ilə bağlı olub. Belə ki, elmlər doktoru və fəlsəfə doktoru elmi dərəcələrinə görə ödənilən əlavələr 20 manat artırılaraq, müvafiq olaraq 100 və 60 manata çatdırılmışdır.
Məsələyə münasibət bildirən Tibb Universitetinin Farmakologiya kafedrasının dossenti, tanınmış həkim Aydın Əliyevin sözlərinə görə, sözügedən məsələlərlə bağlı müvafiq addımların atılması müsbət haldır: “Son illər səhiyyə işçilərinin sosial təminatının yaxşılaşmasına diqqət və qayğının artan xətt üzrə inkişaf etməsi müsbət tendensiyadır. Biz nəzərə almalıyıq ki, həkimlik peşəsi çox çətin və məsuliyyətlidir. Maddi çətinliklər üzündən görürsən həkimlər bir neçə yerdə, əsasən də özəl tibb müəssisələrində çalışır. Təbii ki, maaşlar artdıqca, bir neçə yerdə işləməyə ehtiyac qalmayacaq. Ölkədə tibbi sığorta sahəsində islahatlar dərinləşdikcə, bundan daha çox tibb işçisinin faydalanmasına şərait yaranacaq. Ona görə də bu istiqamətdə görülən işləri müsbət dəyərləndirirəm. Tibb işçilərinin maddi durumu yaxşılaşdıqca, əhaliyə göstərilən səhiyyə xidmətlərinin keyfiyyəti artır. O baxımdan hesab edirəm ki, atılan addımlar, görülən işlər ümumi işin xeyrinədir”.
Vidadi ORDAHALLI
