Şimal-Qərb bölgəsinin əsas istifadə etdiyi Yevlax-Zaqatala yolunun bugünə qədər təmir olunmaması bölgədə yaşayanlar və sürücülər üçün ciddi problem yaradır. Sakinlər yolun nə zaman təmir olunacağını səbrsizliklə gözləyir.
Problem ondadır ki, yolun 78 kilometlik Şəki-Qax hissəsi daha bərbaddır. Bu, həm bölgədəki insanları, həm də o yoldan istifadə edən sürücüləri çətin vəziyyətə salır. Çünki ötən əsrin ortalarında inşa edilən yol istismar müddətini tamamladığından yolda çalalar əmələ gəlib və bu da yolun yatağının yararsız vəziyyətə düşməsinə səbəb olub. Yolun nahamarlığına görə bir sıra hallarda sürücülər yolunu dəyişmək məcburiyyətində qalır. Bu da qəzaların baş verməsinə səbəb olur. Üstəlik, yolun üzərində olan körpülər də pis vəziyyətdədir. Ağır tonajlı yük maşınları üzündən qəzalı vəziyyətə düşüblər. Sakinlər deyir ki, respublika əhəmiyyətli magistral yolun təmir olunmaması ətraf kəndlərin sosial-iqtisadi vəziyyətinə mənfi təsir edir. Sürücülər isə narahat yol üzündən avtomobillərin tez-tez xarab olmasından, zədələnməsindən şikayət edirlər.
Respublika əhəmiyyətli avtomobil yolunun təmiri ilə bağlı Azərbaycan Avtomobil Yolları Dövlət Agentliyindən bildirilib ki, adıçəkilən yolda əslində geniş səviyyəli işlər görülüb. Ancaq yolun bir hissəsində təmir işləri qalıb ki, o da növbəti illərdə öz həllini tapacaq. Yəni, layihə hazırdır, təsdiqlənməsi qalıb.
Belə çıxır ki, yolla bağlı bölgə sakinləri və sürücülər bir müddət gözləməli olacaqlar.
“Elə yollar var ki, çəkilməsinə böyük vəsaitlər xərclənsə də keyfiyyəti aşağıdır”
Məsələyə münasibət bildirən iqtisadçı-alim, professor Əli Əlirzayev hesab edir ki, respublika əhəmiyyətli yolların təmirinə xüsusi diqqət edilməlidir: “Düzdür, yol infrastrukturunun tikilməsi, təmir olunması böyük vəsait hesabına başa gəlir. Yəni, bütün bu işlər göründüyü kimi ucuz başa gəlmir. Son illər Azərbaycanda yol infrastrukturunun yenidən qurulması ilə bağlı böyük işlər görülüb. Yeni yollar çəkilib, köhnə yollar yenilənib və s. Ancaq demək olmaz ki, bütün çəkilən yollar keyfiyyətlidir. Elə yollar var ki, çəkilməsinə böyük vəsaitlər xərclənsə də keyfiyyəti aşağıdır. Tez sıradan çıxır. Şimal-Qərb bölgəsinə gedən yolun narahat olması orada yaşayanların sosial durumuna, ticarət əlaqələrinə mənfi təsir edir. Nəzərə almaq lazımdır ki, həmin yol vasitəsi ilə həm də Gürcüstana gediş-gəliş təmin edilir. İqtisadi-ticarət məqsədi ilə istifadə olunur. Bir sözlə, respublika əhəmiyyətli yolların normal vəziyyətdə olmasına xüsusi diqqət edilməlidir”.
Professor onu da qeyd etdi ki, yollar çəkilərkən onların keyfiyyətinə nəzarət artırılmalıdır.
Vidadi ORDAHALLI
