Ana Vətən Partiyasının sədri, deputat Fəzail Ağamalının Milli Məclisin iclasında etdiyi çıxış qalmaqala səbəb olub. Deputat Əmək və Əhalinin Sosial Müdafiəsi Nazirliyinə (ƏƏSMN) çağırış edib, nazirlikdən izahat tələb edib: “Çıxın televiziyaya, xalqa deyin ki, pensiyanızı biz kəsmişik. Biz nə günahın sahibiyik ki, hamı deputatın üstünə düşür? Bizi hər yerdə buna görə təhqir edirlər”.
Əmək və Əhalinin Sosial Müdafiəsi Nazirliyinin deputat Fəzail Ağamalıya cavabı isə bir qədər aqressiv tonda olub. Nazirliyin İctimaiyyətlə əlaqələr və kommunikasiya şöbəsinin müdiri Fazil Talıbov açıqlamasında deyib ki, deputat populist çıxışlar edir: “Millət vəkili Fəzail Ağamalının Əmək və Əhalinin Sosial Müdafiəsi Nazirliyi tərəfindən guya pensiyaların kəsilməsi barədə parlamentdə səsləndirdiyi iddia məsuliyyətsiz yanaşmadır. Əlilliyə görə pensiya və ya müavinət əlillik müddəti ərzində verilir. Həmin müddət bitmədiyi halda sosial ödənişin dayanması halı baş vermir. Əlillik müddəti bitdiyi halda isə həmin müddətin uzadılması üçün yenidən qiymətləndirmə aparılmalı, bu məqsədlə yeni göndəriş daxil edilməsi üçün səhiyyə müəssisələrinə müraciət edilməlidir.
Bu barədə dəfələrlə məlumat verilməsinə baxmayaraq, bir millət vəkilinin populizmə hesablanan qeyri-ciddi fikir sərgiləməsi sadəcə təəssüf doğurur”.
Biz Fəzail Ağamalı ilə əlaqə saxlayıb, yaranmış situasiya ilə bağlı onun fikirlərini öyrəndik. Deputat “Bakı-Xəbər”ə açıqlamasında bildirdi ki, bu mövzu ilə bağlı bəzi KİV-ə açıqlama verib: “Düzü, mən bu mövzunu qapamaq istəyirəm. Sizə hörmətim olduğu üçün bəzi detalları bölüşmək istərdim. Nazirliyin fəaliyyəti göz qabağındadır. Böyük əksəriyyət bunlardan narazıdır, onlar isə özlərini hamıdan üstün sayırlar. Bu nə yanaşmadır? Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsinin müdirinin mənə ünvanladığı qeyri-peşəkar və emosional cavab nazirliyin mövcud vəziyyətini özündə əks etdirir. Sözsüz ki, vətəndaşları narahat edən, cəmiyyətdə narazılıq yaradan məsələlərə aydınlıq gətirilməsinə ehtiyac var. Hesab edirəm, müxtəlif səbəblərdən pensiyaları kəsilən vətəndaşlara kütləvi informasiya vasitələrindən istifadə etməklə daha anlaşıqlı formada izah vermək vacibdir. Nəzərə almaq lazımdır ki, sənədlərini təqdim etmiş vətəndaşa elektron formada göndərilən, təxminən "sizə pensiya düşmür" formasında cavab məktubu bir çoxları üçün anlaşılan deyil. Belə olan halda, vətəndaş nazirlikdən onu qane edən cavab ala bilmədiyinə görə deputata üz tutur. Təbii ki, nazirlikdən deputatların da suallarına aydın cavab verilmir və vətəndaş deputatı nəinki tənqid, hətta təhqir etməyə başlayır. Həmin cavab dövlət qurumunun təmsilçisinə yaraşmır. Fəzail Ağamalının məsuliyyəti hər kəsə bəllidir. Ana Vətən Partiyasının sədri və Milli Məclisin VI çağırış deputatı kimi cəmiyyətdə özümü təsdiq etmişəm, amma həmin şöbə müdirinin kim olduğu və orada nə qədər işləyəcəyi bilinmir. Yəqin, təkcə onun deyil, həm də onun başının üstündə duranın emosional cavabıdır. Görün, bu cür emosional mövqe nümayiş etdirən nazirlik hazırda nə gündədir? Sorğu keçirilsə aydın olar ki, bütün nazirlər içərisində Əmək və əhalinin sosial müdafiəsi nazirinə münasibət necədir... Bu gün bizə vergi, sahibkarlıq, əmlak, özəlləşmə ilə bağlı, demək olar ki, şikayətlər gəlmir. Deputatlara gələn ən çox haqlı şikayətlər məhz Əmək və Əhalinin Sosial Müdafiəsi Nazirliyinin fəaliyyəti ilə bağlı olur. Mən bu problemi gündəmə gətirdiyim üçün məsuliyyətsiz hesab edilməliyəm? Vətəndaşın pensiyasını kəsirsənsə, əvəzini ödəməlisən. Əlbəttə ki, saxta yolla özünə əlillik dərəcəsi alan vətəndaşlara haqq qazandırmıram, belə halların qətiyyən əleyhinəyəm. Amma istənilən halda, vətəndaşlarla diqqətli davranmaq lazımdır. Onlar aydan, göydən gəlməyiblər, Azərbaycan vətəndaşıdırlar. Adından da göründüyü kimi, həmin nazirliyin borcu əhalinin sosial müdafiəsini təmin etməkdir. Niyə nazirliyin əməkdaşları yerlərdə, rayonlarda insanlarla canlı görüşlər keçirmirlər, məsələləri elektron şəkildə həll edirlər? Rayonlarda, kəndlərdə pensiyaçıların internetdə izahat yazmaq imkanı varmı? Yoxdur. Ona görə rayonlarda canlı görüşlər keçirməlidirlər, insanlar arasında izahat işləri aparmalıdırlar. Görsünlər ki, insanlar onları necə qarşılayacaqlar. Bu gün nazirlik mərhəmət ünvanına deyil, nifrət ünvanına çevrilib. Bu, bizi narahat edir. Bunlara cavab vermək əvəzinə nazirliyin İctimaiyyətlə Əlaqələr və Kommunikasiya şöbəsinin müdiri Fazil Talıbov yaşından fərqli açıqlama verir, məni məsuliyyətsizlikdə və populizmdə ittiham edir. Fikrimcə, hansısa səbəbdən pensiyalar dayandırılırsa, buna ədalətli yanaşma olmalıdır, obyektiv yanaşılmalıdır”.
Millət vəkili deyir ki, bir neçə ay əvvəl əksəriyyəti Qarabağ müharibəsinin qaziləri və veteranları olan 1000 nəfər imza toplayaraq Prezidentə və aidiyyəti qurumlara Sahil Babayevin məsuliyyətə cəlb edilməsilə bağlı müraciət ünvanlayıb: “ Nazirlik buna nə ad verəcək? Görürsünüzmü, narazılıq ifadə edən tək Fəzail Ağamalı deyil. Deputatın sözlərinə görə, həmin nazirlikdən kütləvi şikayətlər var. Bunlar özlərini çox yuxarıdan aparırlar. Xaricdə təhsil almaq, bir neçə xarici dil bilmək o anlama gəlmir ki, sən müstəsna səlahiyyətlərə maliksən və ya hamıdan üstünsən. Bu adamlar kütləvi narazılıq yaratdıqlarının fərqində deyillər. Çünki xalqdan tam ayrı düşüblər. Yalnız kabinetdə oturmaqla iş bitmir. Xalqın içinə çıxıb, onun problemləri ilə tanış olmaq lazımdır. Gedin görün, pensiyası kəsilən ayağı olmayan şəxs dərmanını hansı pulla alacağını sizdən hansı tonda soruşacaq? Əsaslı tənqidi belə qarşılamaq nazirlikdəku sağlam olmayan atmosferdən xəbər verir”.
Məhəmmədəli QƏRİBLİ
