44 günlük Vətən müharibəsində bizə qələbə bəxş edən qazilərimizin müəyyən bir qisminin müxtəlif dövlət qurumlarından şikayətçi olduqları məlumdur. Bəziləri müalicəsini davam etdirməkdə çətinlik çəkdiyini bildirir, bəziləri əlillik dərəcəsi almaqda çətinlik çəkdiyini dilə gətirir, bəziləri işsizlikdən, bəziləri isə başqa məmur biganəliyindən giley-güzar edir.
Müəyyən hallarda isə qazilərimiz məmur biganəliyinə, laqeydliyinə etiraz əlaməti olaraq müxtəlif qurumların qarşısında etiraz aksiyaları keçirirlər. Heç şübhəsiz, bəzi məmurların qazilərimizə biganə, layqeyd münasibəti onların öz vəzifələrinə barmaqarası yanaşmaqlarından irəli gəlir və bu birmənalı olaraq dövlət siyasətinə ziddir.
Dövlətin aidiyyəti qurumları qazilərimizin problemlərini qanun çərçivəsində həll etməlidir, amma bəzən biz bunun əksini görürük. Bu günlərdə bir qrup qazinin Əmək və Əhalinin Sosial Müdafiəsi Nazirliyinin (ƏƏSMN) və YAŞAT Fondunun qarşısında etiraz aksiyası keçirdiyinə dair məlumat yayılıb. Piketi əks etdirən videogörüntüdə qazilər bildirir ki, Şuşaya qədər qalxan qazilər, hərbi qulluqçular bugünkü gün Sahil Babayevin yanına qalxa bilmir. “İstər Sahil Babayev, istərsə də rayonlardakı icra başçılarının yanına qalxa bilmirik. Gəlin Şuşanın sıldırımlı qayalarını da, Sahil Babayevin və icraçıların oturduğu binanı da çəkin, görün hansı hündürdür? Ora qalxan oğlanlar bu gün gəlib oralara qalxa bilmir. Bütün diaqnozlar əlilliyi təsdiq edir, amma onu vermirlər. Haqsızlıq baş alıb gedir…”
Şikayətçilər onlara əlllik qruplarının verilməsi tələbini irəli sürüblər.
Fazil Talıblı: “Bizə konkret müraciət olsa araşdırıb cavab verərik”
Məsələ ilə bağlı Əmək və Əhalinin Sosial Müdafiəsi Naizrliyinin ictimaiyyətlə əlaqələr şöbəsinin müdiri Fazil Talıblı ilə əlaqə saxladıq. F.Talıblı “Bakı-Xəbər”ə bildirdi ki, qazilərin nazirliyin önündə piket keçirdiyinə dair məlumat doğru deyil: “Bu çəkiliş nazirliyin qarşısında olmayıb. Bizə konkret müraciət olsa araşdırıb cavab verərik. Amma bunlarla bağlı bizə müraciət olunmayıb. Konkret ad və soyad qeyd edilsə biz ona uyğun araşdırma apararıq”.
Qeyd edək ki, bəzi ekspertlərin sözlərinə görə, qazilərin aksiyası Həsən Əliyev küçəsində keçirilib və bu aksiyanın videosunu təqdim edənlər sadəcə təqdimatın başlığında səhvə yol veriblər.
Göründüyü kimi, ƏƏSMN-nin sözçüsü deyir ki, həmin piket keçirən qazilər problemləri ilə bağlı nazirliyə müraciət etməyblər, əgər edərlərsə onların məsələləri araşdırılacaq. Biz də düşünürük ki, qazilərimiz günü sabahdan nazirliyə müraciət etsinlər və qurumun rəsmi cavabını gözləsinlər.
Qazilər Əmək və əhalinin social müdafiəsi naziri Sahil Babayevin və icra başçılarının qəbuluna düşə bilməməkdən giley edirlər, üstəlik əlillik dərəcəsi ala bilmədiklərini deyirlər. Onlara bu problemlər niyə yaşadılır? Niyə məmurlar onlara zamanında həssaslıq göstərmir?
Ekspertlər hesab edir ki, qazilər piketdən əvvəl Əmək və Əhalinin Sosial Müdafiəsi Nazirliyinə öz ad və soyadları ilə müraciət etməlidirlər və onların məsələsinə nazirlik də, icra orqanları da baxmalıdır.
İlqar Hüseynli: “Fikrimcə, bu süründürməçilik yerli icra hakimiyyəti orqanları və ƏƏSMN tərəfindən bilərəkdən yaradılır”
Sosial-iqtsadi sahə üzrə ekspert İlqar Hüseynli “Bakı-Xəbər”ə şərhində bildirdi ki, ümumiyyətlə, son vaxtlar qazilərə qarşı bu cür haqsızlıqlara, bu cür diqqətsizliklərə yol verilir: “Ondan başlamaq istəyirəm ki, qazilərimiz öz üzləşdikləri problemlərlə bağlı prosedur qaydalarına uyğun olaraq yerli icra hakimiyyəti orqanlarına və Əmək və Əhalinin Sosial Müdafiəsi Naizrliyinə yazılı şəkildə müraciət etsinlər. Amma tutaq ki, Şuşanın zirvəsinə qalxmış, qanlı-qadalı döyüş yolu keçmiş, fədakarlıq edən qəhrəmanlarımızın rəsmi prosedur qaydalarına uyğun olaraq yazılı müraciəti yoxdur. Amma bu sənin binanın qarşısına qədər gəlibsə və görüşmək istəyirsə, onu yuxarı qaldırıb dinləmək, Vətənə olan sevgiyə xatir sevgi və mərhəmət, anlayış göstərməyin nə çətinliyi var ki? Burada nə problemlər var ki, bunu etmək mümkün olmasın?
İcra hakimiyyəti orqanları da, Əmək və Əhalinin Sosial Müdafiəsi Nazirliyi də lazım olanda onu deyirlər ki, məktubla rəsmi qaydada müraciət olunsun. Rəsmi qaydada məktubla müraciət ediləndə o problem dərhalmı həll olunur? Fikrimcə, bu süründürməçilik yerli icra hakimiyyəti orqanları və ƏƏSMN tərəfindən bilərəkdən yaradılır. Bu işlərinin öhtəsindən gələ bilməməkdir. Bunlar dövlət, hakimiyyət orqanlarında sadəcə olaraq düşmüş təsadüfi adamlardır. Belələri cəmiyyətdə bir narazılıq, cəmiyyətdə bir haqsızlıq yaradırlar. Bu da həm də qazilərimizə qarşı olan çox ciddi bir əks təbliğatın tərkibi kimi görünən hallardır. Hesab edirəm ki, ən yüksək səviyyədə bu halın qarşısı alınmalıdır”.
İ.Hüseynli qeyd etdi ki, qazilərimizə qarşı bəzi dövlət məmurları, əlaqədar qurumlar tərəfindən süründürməçiliyə, incidilməyə yol verilir və bu məsələ birbaşa Prezidentin və Birinci vitse prezidentin diqqətinə çatdırılmalıdır ki, onlar bu problemi nəzarətə götürsünlər. Dövlət qurumıarının qazilərə qarşı bu münasibətinin dövlətə qarşı sobataj olduğunu deyən İ.Hüseynli hesab edir ki, qazilərin problemlərinin həlli üçün maneə yaradan nə varsa hamısı aradan qaldırılmalıdır.
Leyla QARAXANLI
