Ölkəmizdə yüksək səviyyədə keçirilən müqəddəs Ramazan bayramında hər bir ailə yetim-yesirə, kasıb-kusuba, əlsiz-ayaqsıza, bir sözlə, ehtiyacı olanlara fitrə-zəkat verir. Ümumiyyətlə, Ramazan bayramının özəlliklərindən biri insanların yardımlaşması, qazancını paylaşmasıdır.
Əlbəttə, hər kəs öz büdcəsinə uyğun olaraq ehtiyacı olanlara fitrə, zəkat verir. Bayram günlərində sosial şəbəkələrdə bəzi tanınmış din xadimlərinə istinadən məlumatlar yayıldı ki, hər ailə adambaşına 15 manat fitrə, zəkat verməlidir.
Qafqaz Müsəlmanları İdarəsinin sədr müavini Hacı Fuad Nurullayev media nümayəndələrinə açıqlamasında qeyd edib ki, bu il Ramazan bayramı mayın 2-nə təsadüf edir və bayram namazına qədər evdən fitrə zəkatı çıxarılmalıdır: “Ailədə hər adambaşına 3 kiloqram bu məhsullardan fitrə zəkatı verilə bilər. Lakin Qafqaz Müsəlmanları İdarəsi tərəfindən fitrənin pul şəkilində çıxarılması tövsiyə olunur. Bu il üçün isə bu zəkatın ortalama olaraq ailə üzvü hesabına 10-15 manat fitrə çıxarılması məqsədəuyğundur".
Qeyd edək ki, keçən il QMİ fitrə zəkatının məbləğını 5-10 manat məsləhət görmüşdü. Ekspertlər hesab edir ki, QMİ ölkədə qiymət artımının, təxminən, 50 faiz olduğunu ehtimal etdiyi üçün fitrə zəkatının məbləğinin artırıb.
Maraqlıdır, fitrə zəkatı nə qədər verilməlidir ki, hər kəs üçün uygun olsun?
“Ölkədə hansı məhsullara tələbat daha çoxdursa, həmin məhsulun 3 kiloqramının dəyəri qədər fitrə, zəkat verilməlidir”
Ilahiyyatçı Cəmişid Əliyev bildirdi ki, insanların inancından sui-istifadə etmək olmaz. “Əvvəlcədən onu deyim ki, fitrə-zəkatın verilməsi məcburi deyil, bu, ixtiyari məsələdir. Yəni heç kəsi məcbur etmək olmaz ki, sən mütləq fitrə, zəkat verməlisən. Ancaq bilirsiniz ki, Ramazan bayramı yardımlaşma, bölüşmə bayramı olduğu üçün, insanlar bir-birinə dayaq olur, dəstək göstərirlər. O ki qaldı veriləcək fitrə, zəkatın məbləğinə, bu, ölkələrin, cəmiyyətlərin vəziyyətinə görə dəyişir. Yəni hansı ölkədə hansı məhsullara tələbat daha çoxdursa, həmin məhsulun 3 kiloqramının dəyəri qədər fitrə, zəkat verilməlidir. Məsələn, bizdə çörəyə tələbat çoxdur və biz üç kilo unun, yaxud çörəyin qiymətinə uyğun fitrə, zəkat verməliyik.
Ümumiyyətlə, QMİ-nin Qazılar Şurasının bu fətvası ki, adambaşına Ramazan bayramında 10-15 manat fitrə-zəkat verilməlidir, tamamilə yanlış fətvadır, ziyanlıdır, bir növ də Allahın işinə qarışmaqdır. Bu fətva hətta İslam dininin qayda-qanunlarına, ənənələrinə tamamilə ziddir”.
Həmsöhbətimiz onu da əlavə etdi ki, fitrə zəkatı ruzini imkansızlarla paylaşmaq üçün bir vasitədir. Fitrə zəkatı hər kəsin büdcəsinə görə çıxarılır. Əgər şəxsdə o büdcə yoxdursa, imkan olmadığı təqdirdə onun özünə fitrə zəkatı verilir: “Fitrə verən şəxs standart məbləği nəzərə almamalıdır. Heç kim özündən mütləq qiymət müəyyənləşdirə bilməz. Bu gün hər kəs öz imkanından məlumatlıdır. Kimin nəyə gücü çatdığını, kasıbı nə ilə dolandıra biləcəyini bilir. Bu səbəbdən kimin gücü nəyə çatırsa o qədər fitrə zəkatı verə bilər”.
Günel CƏLİLOVA
