Təhsil naziri Emin Əmirullayev mediaya geniş müsahibəsində könüllü ianə modelinə diqqət çəkərək bildirib ki, bu model gələn ildən məktəblərdə tətbiq edilə bilər. Xatırlatmaq yerinə düşər ki, təhsil naziri bir müddət öncə bu fikri səsləndirəndə sərt tənqid edilmişdi. Cəmiyyətdə belə bir fikir formalaşmışdı ki, bu, rüşvətin leqallaşdırılması ilə nəticələnəcək.
Nazirin könüllü ianələrlə bağlı yandırmaq istədiyi yaşıl işıq təhsilimizdə hansı nəticələrə səbəb ola bilər?
Tarix elmləri doktoru, professor Məhərrəm Zülfüqarlı "Bakı-Xəbər"ə açıqlamasında bildirdi ki, bir neçə gündür bu mövzuda olan yazıları oxuyur: “Nazirlik barədə səslənən tənqidi fikirlər öz təsdiqini tapmış oldu. Görünən budur ki Təhsil Nazirliyindəki rəhbər işçilərin mütləq əksəriyyətinin təhsildən xəbəri yoxdur. Bu mənada ki, müəllim işləməyiblər. Təhsilə rəhbərlik edən şəxslər mütləq müəllimlikdən keçməlidirlər. Bilməlidilər ki, 90 dəqiqəlik mühazirə ərzində müəllim auditoriyanı necə ələ alır. Tələbənin qarşısında özünü necə aparmalıdır ki, rəğbət qazana bilsin. Çox təəssüf ki, indiki mənzərə bir qədər fərqlidir. Bu da populist təkliflərin meydana çıxmasına səbəb olur. Nədənsə inanırlar ki, könüllü ianə ilə məktəbləri dirçəltmək olar. Təcrübəli təhsil işçiləri bilir ki, belə sistem bizim təhsilimizdə olmayıb, tətbiqi də heç bir fayda verə bilməz. Reklam edəcəklər ki, hansısa zavod direktoru filan məktəbə filan qədər ianə verdi. Bu faktın özü həmin məktəbdə təhsil alan kasıb uşaqlarına çox mənfi psixoloji təsir edəcək ki, filankəsin atası edə bilir, mənimki yox. Müəllimlər uşaqları fakt qarşısında qoymaq üçün kimin valideyininin ianə etdiyini, kimin etmədityini açıq bəyan edəcəklər ki, verməyənləri də buna sövq etdirə bilsinlər. Uşaqlar da gəlib bu tələbi valideynlərinin qarşısında qaldıracaqlar. Bu da insanların hakimiyyətdən narazı düşməsinə gətirib çıxaracaq. Biz istiyərdik ki, belə hallar yaşanmasın. Azərbaycan təhsili dövlətimizin verdiyi dəstəklə dirçəlməlidir. Əksinə, elə model işlənməlidir ki, məktəbdə təhsilin səviyyəsi yüksəlsin. Belə olarsa, valideynlər də əlavə xərc çəkib repetitor yanına uşağı hazırlığa aparmazlar. Təhsilində rüşvət olan ölkədə ciddi nailiyyətlərdən danışmağa dəyməz. Azərbaycan resursları yaxşı təhsilin verilməsinə yönəlməlidir ki, dövlətimizin gələcək bünövrəsi daha da möhkəm olsun".
Məhəmmədəli QƏRİBLİ
