Bakı küçələrində son aylar moped, motosiklet və skuterlər daha çox görünür. Şəhərin tıxaclarından qurtulmaq üçün onlardan daha yaxşı yol ola bilməz. İctimai nəqliyyatın karantin müddətində dayanması da moped, motosiklet və skuterlərə olan tələbatı artırdı. Gənclər, iş adamları, kuryerlər də artıq onlardan istifadə etməyə başladılar. Artıq yanacaq xərclərindən, parkinq problemindən qurtulan insanlar şəhəriçi daha sürətli səyahət edə bilirlər.
Məlumat üçün bildirək ki, moped mühərriki 50 kub santimetrdən az olan dövlət qeydiyyat nişansız nəqliyyat vasitəsidir. Bu nəqliyyat vasitəsini idarə etmək üçün heç bir sürücülük vəsiqəsi tələb olunmur. Lakin onların da riayət etməli olduqları qaydalar var. Velosiped, moped və motosiklet təhlükəsizlik göstəriciləri aşağı olan nəqliyyat vasitələri sırasındadır.
Qeyd etdiyimiz kimi, paytaxt ərazisində elektroskuter sürənlərin sayı artıb. Bu isə həm avtomobil sürücüləri, həm də elektroskuter istifadəçiləri üçün təhlükə yaradır, qəza sayını artırır.
Qeyd etdiyimiz nəqliyyat vasitələrinin iştirakı ilə baş tutan yol qəza hadisələrinin sayı artıb.
“Qəzaların böyük əksəriyyəti kiçik həcmli motora malik moped və motosikletləri sürənlərin ucbatından baş verir”
Sosial sahə üzrə ekspert Elxan Əliyev qeyd etdi ki, paytaxta elektroskuterlərin gəlişi ilk dəfə hər kəsi sevindirsə də, onların gəlişi ilə problemlər də artdı: “Şəhər həddən artıq avtomobilləşib. Zərərli qazlar havanı korlayır. Skuterlər artanda sevindik. Lakin problemlər də artdı. İnsanların dincəldiyi parkda 40-60 sürətlə gedən skuter onlar üçün təhlükə yaradır. Hətta insanlarla toqquşma nəticəsində böyük qəza halları da yaşanıb. Onlar üçün parklarda xüsusi zolaqlar ayrılmalıdır. Bundan başqa, skuterlər avtomobil yollarında da böyük təhlükə yaradırlar. Skuter sürənlərin hüquq və vəzifələri barədə qanunda boşluq var. Onlar yollarda maşınların arası ilə necə gəldi yox, xüsusi velosiped zolaqlarında hərəkət etməlidirlər. Problem bu cür zolaqların az olmasındadır. Elektroskuter və mopedlər yollarda əsas təhlükə yaradan minik vasitələridir. Onlar yolun sağı ilə hərəkət etməlidirlər. Buna əməl etmirlər. Yolda hərəkət edən skuter və moped sürücüsünün nömrəsi və vəsiqəsi olmalıdır. Çünki hadisə zamanı onları axtarıb tapan olmayacaq. Nömrələri yoxdur, cərimə yazmaq olmur. Skuter sürücülərinə çağırış edirik ki, velosiped zolağı olmayan yolda mütləq yolun sağı ilə hərəkət etsinlər”.
Həmsöhbətimiz onu da əlavə etdi ki, moped və motosikletlərin hərəkətinin təhlükəsizliyi ilə bağlı təbliğat işi az görülür. "Moped sürücülərindən sürücülük vəsiqəsi almaq tələb edilmədiyindən onlar bundan sui istifadə edir. Bu da qəzaların baş verməsinə şərait yaradır. Bəzi mopedlərin mühərriki adi maşınları ötəcək qədər sürətlidir. Belə hallarda da onlar radara düşmürlər, kamera çəkmir və qaydanı rahat poza bilirlər. Bu məsələ ilə bağlı təbliğatı gücləndirmək, qanunvericiliyi isə təkmilləşdirmək lazımdır.
Qəzaların böyük əksəriyyəti kiçik həcmli motora malik moped və motosikletləri sürənlərin ucbatından baş verir. Bəzi hallarda dövlət qeydiyyat nişanı olmadığına görə qəza tərədən və yaxud qaydaları pozan moped sürücülərinin tapılmasında çətinlik yaranır. Belə hallarda sığorta şirkətlərinin zərərin ödəməsi və digər məsələlərlə bağlı problemlər ortaya çıxır. Bu mənada, tənzimlənmə bir tərəfdən yol polisinin işini asanlaşdıracaq, digər tərəfdən isə bu tip qəzaların profilaktikası baxımından səmərəli olacaq".
Günel CƏLİLOVA
