Çernobıl Atom Elektrik Stansiyasında baş vermiş dəhşətli qəzadan 36 il ötür. Həmin qəzanı aradan qaldırmaqdan ötrü Azərbaycanın hər yerindən olduğu kimi, dağlar diyarı Lerikdən də xeyli adam Çernobıla köməyə getmişdi. Onlardan dünyasını dəyişənlər də olmuşdu. Faciəninin 36-cı ildönümü münasibətilə rayonda yaşayan Çernobıl əlilləri ilə Lerik Rayon İcra Hakimiyyətində görüş keçirildi.
Qəza nəticəsində dünyasını dəyişən insanların, eləcə də 44 günlük Vətən müharibəsində Azərbaycan Respublikasının ərazi bütövlüyü uğrunda gedən döyüşlərdə şəhid olanların xatirəsi bir dəqiqəlik sükutla yad edildi. Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev 1986-cı il aprelin 26-da baş vermiş qəzanın ağır fəsadlarını xatırladaraq dedi: - Hazırda Lerik rayonunda 7 nəfər Çernobıl əlili yaşayır. Azərbaycan Respublikasının Prezidenti cənab İlham Əliyev tərəfindən əlillərə, sağlamlıq imkanları məhdud şəxslərə yüksək dövlət qayğısı göstərilir, bu kateqoriyadan olan vətəndaşların sosial-məişət və mənzil şəraitinin yüksəlməsi üçün mütəmadi tədbirlər görülür. Rayonumuzda da Qarabağ müharibəsi əlilləri və şəhid ailələrdən ötrü şəhərdə çoxmənzilli yaşayış binaları, həmçinin ayrı-ayrı inzibati ərazi dairələrində fərdi yaşayış evləri tikilibdir, bu iş indinin özündə davam edir.
Ölkədə görülən tədbirlərdə Çernobıl qəzasının iştirakçıları və zərərçəkmiş şəxslər də heç zaman unudulmur, müraciətlərinə xüsusi həssaslıqla yanaşılır, onlara maddi köməkliklər göstərilir. Rayon icra hakimiyyətində ənənəvi olaraq hər il aprel ayında Çernobıl qəzası, 3 Dekabr – Beynəlxalq Əlillər Günündə Qarabağ müharibəsi əlilləri ilə görüşlər keçirilir, onları narahat edən məsələlər yoluna qoyulur. 2020-ci ildə 44 günlük Vətən müharibəsində Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi altında müzəffər Azərbaycan Ordusu işğal altındakı Vətən torpaqları azad etdikdən sonra bu qayğı öz dəyərini daha da artırıb, belə tədbirlər həmişə olacaqdır. Hazırda ölkəmizdə, xüsusilə də işğaldan azad edilmiş ərazilərimizdə böyük tikinti-quruculuq işləri həyata keçirilir. Bu həm də ölkəmizin iqtisadi qüdrətindən irəli gəlir.
Görüş iştirakçıları - Çernobıl qəzası əlilləri Saraddin Tarverdiyev, Bəşir Mənsiyev çıxışnda əlilliyi olan şəxslərlə görüşlərin mütəmadi təşkilindən razı qaldığını dedilər, ölkə başçısı tərəfindən onlara göstərilən diqqət və qayğıya görə minnətdarlıq etdilər, qarşılaşdıqları bir sıra sosial problemlərinin həlli istiqamətində təklifləri bildirdilər. Cəlil Baxşıyev əlilliyi olan şəxslərə narahatlıq yaradan məsəlləri nəzarətə götürdü, həlli mümkün olanların aradan qaldırılması üçün konkret tapşırıqlar verdi. Rayon icra hakimiyyəti tərəfindən Çernobıl əlillərinə növbəti dəfə maddi yardım edildi.
Zəfər ORUCOĞLU, Azərbaycan Jurnalistlər Birliyinin üzvü
