Aprelin 26-da saat 15 radələrində Daxili İşlər Nazirliyinin qarşısında orta yaşlı şəxsin özünü yandırdığına dair məlumat yayılıb. Həmin şəxs üzərinə yandırıcı maye tökərək özünə od vurub. Polis əməkdaşlarının köməyilə alov söndürülüb. Bu zaman polis əməkdaşlarından biri əl və qol nahiyəsindən xəsarətlər alıb.
Daxili İşlər Nazirliyinin Mətbuat xidmətindən mətbuata bildirilib ki, həmin şəxsi polis əməkdaşları söndürərək xəstəxanaya çatdırıblar: “Həmin şəxsin evinin həyətində inşa etdiyi qanunsuz tikili yerli idarəetmə orqanları tərəfindən sökülüb. O da buna etiraz əlaməti olaraq nazirliyin qarşısına gələrək intihara cəhd edib. Baş vermiş hadisə Daxili İşlər Nazirliyinin fəaliyyəti ilə əlaqədar deyil”.
DİN-dən də rəsmən bildirildiyi kimi, şəxsin intihara cəhd etməsinin bu qurumun fəaliyyəti ilə heç bir əlaqəsi yoxdur. Vətəndaşa problemi yerli orqanlar yaradıb və baş verənlərin də DİN-lə yox, birbaşa həmin qurumlarla bağlılığı var.
Vətəndaşın qanunsuz tikdiyi evi, tikilini yerli qurumlar söküb, vətəndaş da buna etiraz əlaməti olaraq özünü yandırır, əzab çəkir, üstəlik gedib bu işi hadisə ilə heç bir əlaqəsi olmayan DİN-in qarşısında edir. Amma qanunsuz tikililərə icazə verən, eyni zamanda sonra onu sökən qurumların rəsmiləri məsuliyyətdən kənarda qalır. Qanunsuz tikintini vətəndaş heç zaman özbaşına apara bilməz, təbii ki, ona yerli icra qurumları, bələdiyyələr tərəfindən icazə verilir. Bu halda, vətəndaşla yanaşı həmin qurumlar da, məmurlar da məsuliyyət daşıyır.
Ekspertlər deyir ki, vətəndaşa qanunsuz tikinti aparmağa şərait yaradan da, sonra onu sökən də yerli qurumlardır və bu məsələnin DİN-lə heç bir əlaqəsi yoxdur. Bunun polisə qarşı təxrtibat və qaralayıcı hərəkət olduğunu deyən ekspertlərə görə, kimlərsə qarışıqlıq yaratmaq, polisi gözdən salmaq üçün vətəndaşı bu addımı atmağa sövq edib. Vətəndaşın dadına yetənin polis olduğunu deyən ekspertlər qeyd edirlər ki, bəziləri polisin fəaliyyətini qaralamaq niyyəti güdür.
“Vətəndaşlara qanunsuz ev tikmək üçün icazə verənlərin yerli qurumlar olduğu gizlin deyil”
“Müasir İnkişaf” Birliyinin sədri Mübariz Göyüşlü hesab edir ki, vətəndaşı bu həddə çatdıran aidiyyəti qurumların nümayəndələridir. “Vətəndaşlara qanunsuz ev tikmək üçün icazə verənlərin yerli qurumlar olduğu gizlin deyil. Hamı bilir ki, icranın, bələdiyyənin icazəsi olmadan bu işi etmək mümkün deyil. Vətəndaşa bu həddə çatdıran yerli qurumların əməkdaşları qanunvericiliyə uyğun olaraq cəzalandırılmalıdır. Digər tərəfdən, o torpaq sahəsində tikintinin aparılması mümkün deyildisə o torpaq vətəndaşa hansı əsasla satılıb, satışa icazə verilib? Qanunsuz tikili anlayışı nə deməkdir? Əgər o torpaqda tikinti aparmağa icazə verilmirsə, bir daş belə qoyulsa müvafiq qurumlar gəlib dərhal adamın başının üstünü kəsdirir. Necə olur ki, vətəndaş tikintini başa çatdırdıqdan sonra onu sökürlər? Fikrimcə, belə bir acınacaqlı durumun baş verməsinə imkan yaradan aidiyyəti qurumlar, icra hakimiyyəti, bələdiyyə məmurları cəzalandırılmalıdır. Ona görə ki, iş gəlib bu həddə çatıb. Nə üçün vətəndaş gəlib özünü Daxili İşlər Nazirliyinin qarşısında yandırmalıdır?”
M.Göyüşlünün sözlərinə görə, yerli qurumlar özlərini göstərmək üçün tikintisinə “hə” dedikləri obyektləri, evləri sökməklə məşğul olurlar: “Vətəndaş hərtərəfli əziyyət çəkir, pul xərcləyib ev, obyekt tikir, amma sonda gəlib bunu uçurdurlar. Əlaqədar qurumlar buna vaxtında icazə verməli deyildilər. Vətəndaşın qanunsuz tikinti aparmasına rəvac verən əlaqədar qurumlardır. Hər bir işə görə daxili işlər orqanlarının, polisin məşğul edilməsi, hədəfə alınması yolverilməzdir. Polisin öz işi var və polis bizim asayişimizi, əminamanlığımızı gecə-gündüz qoruyur. İcra hakimiyyətləri, bələdiyyələr öz məsuliyyətlərini dərk etməli və qanunsuz əməllərinə görə özləri cavab verməlidir. Vətəndaşı incidən yerli qurumlar öz əməllərini polisin üstünə atmaqdan əl çəkməlidirlər. Polisin qaralanması yolverilməzdir və insanlar bunu etməməlidir”- deyə M.Göyüşlü vurğuladı.
Aytəkin KƏRİMLİ
