Katex kəndi Baləkən rayonunun ən böyük kəndlərindən biridir. Kənddə 12 min əhali yaşayır. Ancaq kəndin böyük hissəsinin nə normal yolu, nə işığı, nə də telefon və internet xətti var.
Xüsusən də kəndin Qarahacılı küçəsi adlanan hissədə sakinlərin durumu daha acınacaqlıdır. Burada 200 ailə yaşayır. Sakinlər deyir ki, kəndin yollarında yayda toz-torpaqdan, qışda isə palçıqlı çala-çuxurdan hərəkət etmək olmur. Əsasən məktəbə gedən uşaqlar əziyyət çəkir. Üç kilometrlik yol burada yaşayanların kabusuna çevrilib. Yollar o qədər bərbaddı ki, hətta taksilər də əhaliyə xidmət etməkdən imtina edir. Təcili yardım isə vaxtında gələ bilmir. Sakinlər deyir ki, 12 min əhalisi olan kənddə düz-əməlli işıq olmur. İşıqlar o qədər zəif olur ki, məişət cihazları işləyə bilmir. İşıq dirəklərinin bir qismi ağacdandır. Pandemiya vaxtı bir sıra məktəblər onlayn rejimiə keçəndən sonra burda təhsil alan şagirdlər təhsildən də geri qalıblar. Səbəb internetin yox səviyyəsində olması ilə əlaqədardır. İşığın zəif olması isə transfarmatorun uzaqda olması ilə bağlıdır.
Rayon İcra Hakimiyyətindən bildirilib ki, kəndin elektrik enerjisi ilə təminatında problem yaşanan hissələrinə baxış keçirilib. Orada yeni güc məntəqəsinin yaradılması qərara alınıb. Bunun üçün müvafiq qurumlara müraciət olunub və ilin sonuna qədər problem həllini tapacaq. Telefon və internet probleminin də həll ediləcəyi ilə bağlı söz verilib. Yolun tikilməsi isə 2023-cü ildə nəzərdə tutulub. Görünən odur ki, kənd sakinləri hələ bir müddət gözləməli olacaqlar. O da qalıb verilən vədlərin nə dərəcədə icra olunacağına.
“Bir sıra rayonlarda, o cümlədən Balakəndə kəndlərin sosial-iqtisadi inkişafına ayrılan vəsaitlər təyinati üzrə xərclənmir”
Məsələyə münasibət bildirən ekspert Rəsul Cahangirlinin fikrincə, əslində əhalisi böyük olan kəndlərlə bağlı xüsusi proqram olmalıdır: “Söhbət əhalisi 10 min nəfər və daha çox olan kəndlərdən gedir. Elə qəsəbələr var əhalisi 10 min nəfərdir. Xüsusən də turizm baxımından vacib əhəmiyyət kəsb edən kəndlərdə bir sıra sosialyönümlü problemlərin olması ümumiyyətlə qəbuledilməzdir. Katex kəndi həm də turizm sahəsinə görə məşhur kənddir. Bu baxımdan kənddə yol və elektrik infrastrukturunun pis vəziyyətdə olması turizmin inkişafına zərər vurur. Belə hallar son nəticədə kəndlərin boşalmasına, cavanların, əsasən də əmək qabiliyyətli şəxslərin miqrasiyasına səbəb olur. Bütün bunlar onu göstərir ki, bir sıra rayonlarda, o cümlədən Balakəndə kəndlərin sosial-iqtisadi inkişafına ayrılan vəsaitlər təyinati üzrə xərclənmir. Yoxsa bir belə problem üst-üstə yığılmazdı. Bəlkə də hansısa ucqar və əhalisi çox az olan kənddə ağacdan elektrik dirəklərinin olmasını anlamaq olar. Ancaq 12 min əhalisi olan bir kənddə hələ də ağac dirəklərin olması qəbuledilən deyil. Bu onu göstərir ki, rayon icra strukturları bu kimi problemlərin həllinə biganə yanaşırlar”.
Ekspert onu da qeyd etdi ki, bu kimi problemlərin həllinə diqqət artırılmalıdır.
Vidadi ORDAHALLI
