Gecə qara, maşın qara, piyada da qara geyinəndə, necə deyərlər, vay sürücünün halına. Bakının bir sıra vacib yolları var ki, gecələr işıqlandırılmır. Bu da həm piyadalar, həm də sürücülər üçün ciddi təhlükə yaradır. Bu səbəbdən onlar hər an təhlükə ilə üzləşirlər.
Məsələn, paytaxtın Xocasən-Lökbatan və Müşfiqabad yollarında hərəkət sürəti saatda 80 kilometr olsa da, bu yollar gecələr işıqlandırılmır. Bu səbəbdən sürücülər hər an səksəkə içində olur. Gecəboyu minlərlə avtomobilin hərəkət etdiyi bu yolda sürücü hər hansı canlı maneənin yalnız ona 1-2 metr qalmış fərqinə varır. Bu da təbii olaraq tormozlamanı çətinləşdirir və hansısa ağır faciənin baş verməsini qaçılmaz edir. Problem həm də ondadır ki, yolun ətrafında heyvan saxlayanlar çoxdur. Ətrafdakı sakinlər deyir ki, yol qaranlıq olsa da, sürücülərin çoxu avtomobili sürətlə sürür. Dəfələrlə heyvanları avtomobil vurub.
Məsələ ilə əlaqədar Abşeron İcra Hakimiyyətindən deyiblər ki, sözügedən yolların işıqlandırma məsələsinin onlarla heç bir əlaqəsi yoxdur. Bu məsələyə Avtomobil Yolları Dövlət Agentlyi baxır. Agentlik isə bunu öz üzərindən atır və bildirir ki, sözügedən məsələ yerli icra strukturlarının səlahiyyətindədir. Görünən odur ki, belə davam edərsə, piyada və sürücülərin həyatı təhlükə altında qalmaqda davam edəcək.
Maraqlıdır, bu cür vacib yollarda işıq dirəklərinin olmaması nəyin göstəricisidir - laqeydliyin, yoxsa işin düzgün qurulmamasının?
“Bu, birbaşa təsərrüfatsızlığın, məsuliyyətsizliyin və laqeydliyin nəticəsidir”
Sözügedən məsələyə aydınlıq gətirən ekspert İlqar Hüseynli bunu bir sıra amillərlə əlaqələndirdi: “Bu çox ciddi problemdir. Ümumiyyətlə, adıçəkilən yollarda işıqlandırma sistemi çox bərbad gündədir. Bu da avtoqəzalar üçün zəmin yaradır. Hesab edirəm ki, bu, birbaşa təsərrüfatsızlığın, məsuliyyətsizliyin və laqeydliyin nəticəsidir. Fikrimcə, adıçəkilən yolun işıqlanmasına nəzarət edən qurumlar məsələ ilə əlaqədər təcili ölçü götürməlidir. Ona görə ki, insanların həyatı risq altına düşür. Bakıda nəinki Xocasən-Lökbatan və Müşfiqabad yolarında, digər gediş-gəlişin sıx olduğu yollarda da analoji problemlər hökm sürür. Yolların işıqlandırılması düzgün qurulmayıb. İşıq dirəklərindəki qurğular effektiv deyil, arada məsafə böyükdür. İşıq dirəkləri daha yaxın məsafədə quraşdırılmalıdır”.
Bir sözlə, ekspert hesab edir ki, paytaxtda yolların işıqlandırılmasına kompleks yanaşma olmalıdır və vacib yollar işıqlandırılmalıdır.
Vidadi ORDAHALLI
