İctimai fəal Bəxtiyar Hacıyevin qaramaskalılar tərəfindən oğurlanaraq təhqir edildiyi və Ramana qəsəbəsi ərazisində kimsəsiz yerə atıldığı ilə bağlı ictimailəşdirdiyi mövzu neçə gündür ki, müzakirə olunur.
Bəxtiyar Hacıyev bildirib ki, onu aparanlar həm də nazir Vilayət Eyvazov haqqında yazdığı tənqidi statusları silməyi tələb ediblər və buna nail olublar. Qeyd edək ki, bir müddət əvvəl analoji iddia ilə müxalif mövqeli siyasətçi Tofiq Yaqublu da çıxış etmişdi. O da polis tırəfindən döyülərək yol kənarına atıldığını iddia edirdi.
Hər iki halla bağlı DİN rəsmi mövqeyini açıqlayıb. Hadisələrin polislə heç bir əlaqəsinin olmadığı qeyd edilib.
DİN-in Mətbuat Xidmətinin KİV və ictimaiyyətlə əlaqələr şöbəsinin rəisi, polis mayoru Elşad Hacıyev deyib: “Daxili işlər naziri, general-polkovnik Vilayət Eyvazov Bəxtiyar Hacıyevi dinləyib, onun qaldırdığı məsələlərlə bağlı müvafiq araşdırmaların aparılacağı nəzərinə çatdırılıb".
Doğrudan da maraqlıdır, DİN belə primitiv addımla özünü zərbə altında qoya bilərmi? Bu hadisədən dərhal sonra Əli Kərimli mətbuat konfransı keçirdi, digər radikal müxalif partiyalar bəyanatlar verdilər. Hiss olunur ki, sanki hansısa təxribatçı qüvvə polisi nüfuzdan salır, eyni zamanda Qərbə bağlı olan qanadla Azərbaycan hakimiyyətinin arasında sərinlik yaratmaq istəyir. Bu təxribatın törədilməsində hansı qüvvələr maraqlı ola bilər?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, Azərbaycan polisi çox ağır funksiyanı həyata keçirir: “Həm cinayətkarlıqla mübarizə aparır, həm də ictimai asayişi bərpa edir. Bu səbəbdən də deyə bilərik ki, polis spesifik fəaliyyət istiqamətlərinə malik olan bir qurumdur. Özünü zərərçəkən kimi təqdim edən bu vətəndaşın dediklərində ziddiyyətlər var. Gözləri və qolu bağlı olduğunu iddia edən şəxs deyir ki, onu 4 nəfər aparıb, başqa 4 nəfərə təhvil verib. Maraqlıdır, gözləri bağlı olan adam bunları necə görüb? Son illərdə Azərbaycan polisinin prinsipial fəaliyyətindən narahat olan qüvvələr var və olacaq. Hətta onların arasında xarici dairələr də var. Müstəqillik dönəmindəki Azərbaycan polisi öz fəaliyyətini həm də beynəlxalq qanunlara uyğun qurmağı bacarıb. Bütün bu fəaliyyət göz qabağındadır. Bu baxımdan Bəxtiyar Hacıyevin zərrə qədər də şübhəsi olmasın ki, onun şikayəti tam obyektiv şəkildə araşdırılacaq. Onun bəri başdan hansısa vəzifəli şəxsin adını hallandırması doğru deyil. Bu hadisənin olduğunu iddia edirsə, araşdırmanın sonunu gözləsin. Respublika DİN-i heç vaxt özü oturan ağacı baltalamaz. Azərbaycan polisi dünyanın bir çox ölkələri üçün örnək sayıla biləcək fəaliyyət ortaya qoyur. Belə qarayaxmalarla polisi nüfuzdan salmaq olmaz”.
Məhəmmədəli QƏRİBLİ
