Bir neçə gün əvvəl “Wolt” şirkətinin 100-dən çox işçisi maaş artımı tələbi ilə etiraz edib. Onlar nəqliyyat vasitələrinin üstünə “Qiymətlər qalxmasa, işləməyəcəyik” şüarları yapışdırıblar. Bu barədə “İşçinin səsi” səhifəsi məlumat yayıb. Bildirilib ki, kuryerlər maaş artımı tələbilə şirkətin mobil proqramını dondurublar.
İşçilərin dediyinə görə, “Wolt” şirkəti artıq kuryerlərin bir çoxunu işdən çıxarıb.
Şikayətçilər bildirir ki, maaş artımı tələb edəndə şirkət onlara hədə-qorxu gəlir ki, işləmək istəyən, növbədə gözləyən yüzlərlə insan var: “İnsanı inandırırlar ki, sənin əhəmiyyətin yoxdur, sən sadəcə statistikasan, yüzlərlə kuryerdən birisən. Səndən növbədə yüzlərlədir. İl yarım əvvəl "kilometraj"ın qiyməti 3 manat 20 qəpik idi, sonra 1 manat 60 qəpiyə düşdü. Biz etiraz edəndən sonra 10 qəpik də aşağı saldılar. İşçi itirmək bu şirkətin vecinə deyil. "Wolt" rahatdır ki, işə tələbat var. Yəni bilirlər ki, 1 nəfər çıxarsalar, yerinə 5 nəfər götürə bilərlər”.
Qeyd edək ki, sosial şəbəkələrdə yayılan məlumata əsasən, “Wolt” artıq kuryerlərin bir çoxunu işdən çıxarıb.
Məlumat üçün bildirək ki, “Wolt” şirkəti 2015-ci ilin yayında Finlandiyanın Helsinki şəhərində on restoranla birlikdə fəaliyyətə başlayıb. Hazırda 23 ölkə və 250-dən çox şəhərdə fəaliyyət göstərir.
“Wolt” şirkəti: “Partnyorluğun dayandırılması və kuryerlərə hədə-qorxu gəlinməsi məsələsi həqiqətə uyğun deyil”
Məsələ ilə bağlı “Wolt” şirkətindən bildirildi ki, kuryerlərin etirazına görə və ya onlayn olmadıqları səbəbi ilə partnyorluğun dayandırılması və kuryerlərə hədə-qorxu gəlinməsi məsələsi həqiqətə uyğun deyil: “Wolt”un sifarişlərini çatdıran kuryerlər şirkət əməkdaşları deyil və xidməti müqavilə əsasında çalışan fərdi sahibkarlardır. Biz bütün partnyorlarımıza hörmətlə yanaşırıq və biznesimizin necə idarə olunması haqda fikirlərimizin üst-üstə gəlməməsi səbəbindən heç vaxt partnyorluğumuzu bitirməzdik. Bir qrup kuryer ödəniş modelimizə edilən bəzi dəyişikliklərlə bağlı narazılığını bildirmək üçün sistemdə oflayn olmaq qərarını verdi. Kuryer-partnyorlarımıza təqdim olunan ödənişlər bazar səviyyəsinə uyğun olaraq qalır. Məsələn, hazırda Ramazan ayı ilə əlaqədar gün ərzində sifariş sayı bir qədər aşağıdır. Bu səbəbdən qazancların nisbətən aşağı düşməsi də gözləniləndir. Tələbatın aşağı enməsi həm bizə, həm də kuryer-partnyorlara öz təsirini göstərir və biz kuryerlərin narazılığını çox gözəl başa düşürük. Kuryerlərin bir hissəsi ilə görüşülüb, etiraz edən heç bir kuryerlə əməkdaşlıq dayandırılmayıb”.
Elxan Əliyev: “Problemlərin bir çoxu işçilərlə əmək müqaviləsinin olmamasından qaynaqlanır”
Sosial sahə üzrə ekspert Elxan Əliyev bildirdi ki, problemlərin bir çoxu işçilərin əmək müqaviləsinin olmamasından qaynaqlanır: “Bir çox xarici ölkədə belə şirkətlər qarşısında öhdəlik qoyulub ki, işçilərlə əmək müqaviləsi bağlansın. Azərbaycanda belə bir öhdəlik olmadığından kuryerlərin əmək müqaviləsi də yoxdur. Kuryerlər əmək müqaviləsi bağlanılması və sığortalanmaq üçün müraciət etməlidir”.
Günel CƏLİLOVA
