Körpələr evi - bağçaların əsas təyinatı uşağın ətraf aləmlə tanışlığını təmin etmək, ibtidai təhsilə dəstək üçün ilkin məlumatlar vermək, normal ünsiyyət qaydalarını öyrətmək, fiziki və zehni sağlamlığını qorumaqdır.
Prezident İlham Əliyevin sərəncamına əsasən, Dövlət Proqramları çərçivəsində son illərdə bir sıra yeni uşaq bağçaları tikilir və köhnələr təmir olunur. Amma hələ ki, bu tərbiyə ocaqları tələbatın heç yarısını da ödəyə bilmir. Belə ki, ucqar kəndlərdə hələ də bağça problemi yaşanır. Tovuzun Bayramlı və Azaflı kəndində məktəbəqədər təhsil müəssisəsi yoxdur.
Qaxın Qıpçaq və Qaysarlı kəndləri üçün 4 il əvvəl tikilən uşaq bağçası isə hələ də istifadəyə verilməyib. Əksər ucqar kəndlərdə qeyd olunan problem yaşanır. Təbii ki, məktəbəqədər təhsil müəssisəsinin olmaması uşaqların təlim-tərbiyəsinə təsir edir. Valideynlər övladlarının məktəbəqədər təhsildən uzaq qalmalarından narahatdır.
Cəsarət Valehov: “Bütün yaşayış məntəqələrinin uşaq bağçaları ilə təmin olunması məsələsi nazirliyin diqqətindədir”
Təhsil Nazirliyinin sektor müdiri Cəsarət Valehov isə “Bakı-xəbər”ə bildirdi ki, qurum regionlarda məktəbəqədər təhsilin inkişafı ilə bağlı müvafiq işlər görür: “Bütün yaşayış məntəqələrinin uşaq bağçaları ilə təmin olunması məsələsi nazirliyin diqqətindədir”.
Aytəkin Kamranqızı: “Bölgələrdə bağçaların sayı azdır”
Sosioloq Aytəkin Kamranqızı bildirdi ki, bir sıra ölkədə məktəbəqədər təhsil təhsilin əsas bünövrəsi hesab olunur. Hətta bir müddət əvvəl yapon alimləri uşaq bağçalarına gedən və getməyən uşaqların sonrakı inkişafı ilə bağlı tədqiqat aparıblar. Məlum olub ki, kiçik yaşlarından uşaq bağçalarına gedən uşaqların daha çox uğur qazanmaq imkanları olur, onlar psixoloji gərginlikdən azad olurlar, cəmiyyətdə özlərini təsdiq etmək imkanları, dünyagörüşləri artır. Bu baxımdan məktəbəqədər təhsil bizim üçün çox vacibdir: “Məktəbəqədər təhsil bizim üçün həm də ona görə vacibdir ki, Azərbaycanda ailə ehtiyaclarını ödəmək üçün anaların çoxu işləməyə məcburdur. Əgər uşaq bağçaları yoxdursa, ana əmək fəaliyyəti ilə məşğul ola bilmir. Bölgələrdə bağçaların sayı azdır. Müəllim kontingentinin işlə təmin olunması və dövlətin yükünün azaldılması üçün özəl bağça və məktəblərin açılmasına geniş şərait yaradılmalıdır. Misal üçün təkcə İstanbulda 7000 məktəb var və bunun 3500-ü özəldir. Burda bərabərlik prinsipi var. Bizdə də bu istiqamətdə mütərrəqi addımlar atılmalıdır. Özəl məktəblərin sayı nə qədər çox olarsa, müəllimlərin işlə təminatının artmasına və təhsilin keyfiyyətinin ciddi şəkildə yüksəlməsinə gətirib çıxaracaq. Faizsiz kreditlər vermək, müəyyən vergi və kommunal güzəştləri tətbiq etməklə, bu işi təşviq etmək olar".
Günel CƏLİLOVA
