Təhsil Nazirliyinin brifinqində Təhsil naziri Emin Əmrullayev bildirib ki, yeni tədris ili sentyabrın 15-də başlayacaq. Dərslərin hansı təhsilalma formasında tətbiq ediləcəyinə gəlincə, nazir deyib ki, dərslər əyani və onlayn, virtual təşkil ediləcək.
Bilirik ki, pandemiya ilə əlaqədar olaraq Azərbaycanda orta ümumtəhsil məktəblərində ənənəvi tədris müvəqqəti olaraq dayandırıldı və şagirdlər müxtəlif virtual proqramlardan istifadə edərək onlayn şəkildə təhsillərini davam etdirdilər. Amma təəssüflər olsun ki, bir sıra səbəblərdən, o cümlədən də ailələrin heç də hamısında planşet, kompyuter və noutbuk olmadığından, şagirdlərin müəyyən hissəsi onlayn təhsildən kənarda qaldı. Doğrudur, hələ nə qədər şagirdin onlayn təhsildən kənarda qalması problemi araşdırılmayıb və onların dəqiq sayı məlum deyil. Ancaq müşahidələrimiz nəticəsində bu halın şahidi olduq.
Yeni tədris ilinin başlanmasına qərar verilib, bu müsbət hal olması ilə yanaşı, həm də kompyuteri, planşeti olmayan ailələrdə şagirdlərin onlayn təhsil problemini gündəmə gətirib. Tədris onlayn, məsafəli şəkildə tətbiq edilərsə, belə şagirdlər nə edəcəklər?
Bildirilənə görə, Gürcüstanda artıq bu məsələ öz həllini tapıb. Belə ki, hökumət, aidiyyəti qurumlar hər şagirdə 200 lari yardım ayırıb ki, o, planşet alısın, eyni zamanda da şagirdlər və müəllimlər pulsuz internet paketilə təmin ediliblər. Azərbaycanda da bu təcrübədən istifadə edilməsi tam olaraq məqsədəuyğundur.
“Hökumət həm öz hesabına, həm də ölkədəki aidiyyəti şirkətləri prosesə qoşmaqla bu problemi aradan qaldıra bilər”
Tanınmış təhsil eksperti Məlahət Mürşüdlü “Bakı-Xəbər”ə bildirdi ki, bizdə bu problem aktualdır, amma onun həlli birbaşa Təhsil Nazirliyindən asılı deyil. M.Mürşüdlü hesab edir ki, şagirdlərin hamısının onlayn tədrisə qatılmasının reallaşdırılması üçün, birmənalı olaraq, ailələrin planşetlə təmin edilməsinə həm dövlət, həm də özəl şirkətlər tərəfindən dəstək verilməlidir: “Azərbaycanda onlayn tədris tətbiq edildikdən sonra ölkədə xeyli şagirdin bu prosesdən kənarda qaldığını gördük. Bu da onunla bağlıdır ki, xeyli sayda ailənin kompyuteri, noutbuku, planşeti yoxdur. Problemin həll edilməsi bizim üçün əsas olmalıdır ki, şagirdlərimiz onlayn tədris prosesindən kənarda qalmasınlar. Sözsüz ki, Təhsil Nazirliyi ehtiyacı olan bütün şagirdləri öz maliyyə resursları hesabına kompyuter, noutbuk, yaxud planşetlə təmin edə bilməz. Təhsil Nazirliyi bu cür ailələrin sayını müəyyənləşdirməli və siyahını Nazirlər Kabinetinə təqdim etməlidir ki, hökumət problemin həllinə dəstək göstərsin.
Gürcüstan problemin həlli yollarını tapıb, bizdə də bu yöndə iş görülməlidir. Təhsil Nazirliyi Nazirlər Kabinetinə siyahı təqdim etməlidir ki, ölkə üzrə bu qədər şagird planşetə sahib ola bilməməsinə görə distant təhsildən kənarda qalır, xahiş edirik yardım edin. Təbii ki, hökumət də həm öz hesabına, həm də ölkədəki aidiyyəti şirkətləri prosesə qoşmaqla bu problemi aradan qaldıra bilər. Əlbəttə, bu istiqamətdə özəl şirkətlərin də könüllü təşəbbüsləri olmalı, yaxud onlar rəsmən prosesə cəlb edilməlidirlər. Məncə, burada elə də böyük xərc tələb olunmur, hər ailəyə bir planşet verilsə, ailənin bütün məktəbə gedən övladları ondan istifadə edə bilər. Prosesə qoşulan şirkətlərə isə bu təşəbbüslərinə görə vergi güzəştləri edilməlidir. Bütün dövlətlərdə, eləcə də adını çəkdiyiniz Gürcüstanda bu problem bu yolla həllini tapıb” - deyə bildirən M.Mürşüdlünün fikrincə, ölkənin iri şirkətləri bu sosial kampaniyada yaxından iştirak etməlidirlər. “Şirkətlərdən başqa, imkanlı şəxslər var, onlar da bu təşəbbüsə qoşulmalıdırlar. Bu problemin həll edilməsi elə də çətin deyil. Ümid edirəm ki, dövlət bu problemi təhsil ili başlayana qədər həll edəcək” - deyə müsahibimiz vurğuladı.
İradə SARIYEVA
