Cəmiyyətimizi narahat edən bir sıra məsələlər var ki, onların təxirə salınmadan həll edilməsinə ciddi zərurət var. Son illər mətbuat tərəfindən tez-tez gündəmə gətirilən ünvansız küçələr, yaşayış obyektləri az deyil. Bakıda və Bakıətrafı kəndlərdə, qəsəbələrdə saysız ünvansız küçə var ki, bu da həm həmin ərazidə yaşayan sakinlər, həm qonaqlar, həm də taksilər üçün ciddi problemlər yaradır.
Bundan əlavə, ünvansız küçələr xüsusən də xəstə çağırışına gələn təcili tibbi yardım maşınlarının ünvanı tapmasına ciddi maneələr törədir. Hətta bəzən elə olur ki, sakinlər təcili tibbi yardım maşınını qarşılamaq üçün xeyli yol qət edirlər.
Ünvansız küçələr Bakının Binə, Hövsan, Zabrat, Maştağa, Məhəmmədi, Ramana və digər qəsəbələrində daha aktualdır. Çünki bu yerlərdə ünvansız küçələr daha çoxdur. Camaat tərəfindən şərti olaraq “Şəhərcik”, “Quşçuluq”, “Gülçülük”, “Donuzçuluq sovxozu”, “Sovxoz”, “Məktəbin yanı”, “Birinci küçə”, “Əsas döngə”, “Daşlı məhəllə” və sair adlandırılan bu və digər yerlərə ünvan verilməsinin vaxtı çoxdan çatıb. Paytaxtın özündə də ünvansız, adsız küçələr az deyil.
Məlumatlara görə, Əmlak Məsələləri üzrə Dövlət Komitəsi tərəfindən son illər beynəlxalq təcrübə öyrənilməklə yeni ünvan reyestri informasiya sistemi istifadəyə verilib. Bunun başlıca məqsədi isə ünvana çatmağın daha operativ və dəqiq olmasıdır, eləcə də hər bir nəqliyyat infrastrukturu obyektinə adların verilməsinə yönəlib.
Ekspertlər problemin ciddiliyini və ünvansız küçələrə ad verilməsi məsələsinin Bakı Şəhər İcra Hakimiyyətinin səlahiyyətində olduğunu qeyd edirlər.
“Küçələrə adların verilməməsi kütləvi hal alıb”
Sosial-iqtisadi sahə üzrə tanınmış ekspert İlqar Hüseynli “Bakı-Xəbər”ə bildirdi ki, ümumiyyətlə, bu çətinlik ölkəmizdə var. “Kommunikasiya, elektron idarəetmə sistemləri o qədər sürətlə inkişaf edib ki, burada həmin sistemlərlə bağlı müxtəlif strukturlarda, nazirliklərdə çalışan məmurların bu problemlərə çıxış imkanlarında, bilik və bacarıqlarında çox ciddi çətinlik var. Bu həm də idarəetmə sisteminə birbaşa bağlı məsələdir. İstər şəhərin baş planının “Google maps”da yerləşdirilməsi, eyni zamanda, müxtəlif axtarış sistemlərində şəhər və qəsəbələrdəki hər bir dəyişikliyin operativ şəkildə qeyd olunması məsələsi çox ciddi problemdir. Xüsusən də Bakı və Bakıətrafı kəndlərdə, qəsəbələrdə köhnə illərdə bələdiyyələr tərəfindən ucdantutma və standartlara, baş plana uyğun olmayan şəkildə torpaqların satılması, orada yeni böyük məhəllələrin salınması, hətta küçələrə adların verilməməsi kütləvi hal alıb. Bunu Masazır qəsəbəsinin timsalında da göstərmək olar. Saray qəsəbəsində də belə ucdantutma nizamsız genişlənmə var. Qəsəbənin bir çox yerində uyğun olmayan, pərakəndə şəkildə evlər tikilib. Təəssüflər olsun ki, yeni küçələrin çoxuna ünvan verilmə prosesi başa çatmayıb. Bu, Nazirlər Kabineti ilə razılaşdırılmış şəkildə həyata keçirilməlidir. Eyni zamanda, Bakı Şəhər İcra Hakimiyyətinin, bələdiyyənin küçələrə ünvan verilməsi ilə bağlı xüsusi qərarları olmalıdır. Hətta, bildiyim qədər, bu, Milli Məclis səviyyəsində müzakirə edilən bir məsələdir. Yəni bu qurumlar qəsəbələri, şəhəri baş plana uyğun olmayan şəkildə böyüdürlər, amma ünvan verməyiblər. Bu gün şəhərimizdə və ətraf qəsəbə, kəndlərdə bir çox yaşayış yerinə ünvan verilməsi prosesi başa çatmayıb”.
İ.Hüseynli qeyd etdi ki, ünvan probleminin həll olunmamasında Bakı şəhərsalma və xəritəçəkmə institutları, eyni zamanda, yerli icra hakimiyyəti strukturları, bələdiyyələr məsuliyyət daşıyırlar. “Bu, dərin problemdir, onun aradan qaldırılmasında həmin səlahiyyətli qurumların məsuliyyəti artırılmalıdır ki, bu proses başa çatsın, ünvansız küçələrə ünvan verilsin” - deyə İ.Hüseynli vurğuladı.
İradə SARIYEVA
