Koronavirus (COVID-19) pandemiyasının sahibkarlıq subyektlərinə mənfi təsirinin azaldılması məqsədilə Nazirlər Kabinetinin qəbul etdiyi Tədbirlər Planına uyğun olaraq, İqtisadiyyat Nazirliyi koronavirus pandemiyasından zərər çəkmiş sahibkarlara və onların muzdlu işçilərinə maliyyə dəstəyi proqramına start verib.
Ən son məlumata görə, İqtisadiyyat Nazirliyinə muzdlu işçilərin əməkhaqqının müəyyən hissəsinin ödənilməsi üçün koronavirus (COVID-19) pandemiyasından zərər çəkən 22 976 vergi ödəyicisi və maliyyə dəstəyi almaq üçün 73 760 fərdi (mikro) sahibkar, cəmi 96 736 vergi ödəyicisi müraciət edib. Muzdlu işçilərin əməkhaqqının müəyyən hissəsinin ödənilməsi çərçivəsində 178 587 işçini əhatə edən 19 061 sahibkarın müraciəti araşdırılaraq təsdiqlənib və ayrılacaq maliyyə vəsaitinin bank hesablarına köçürülməsi üçün Maliyyə Nazirliyinə təqdim edilib.
Digər vergi ödəyiciləri üzrə araşdırmalar davam edir. İndiyədək təsdiq edilmiş müraciətlər üzrə maliyyə dəstəyinin həcmi 80,72 milyon manat, o cümlədən, 1-ci mərhələ üzrə ödənilməsi nəzərdə tutulan vəsaitin həcmi 40,36 mln. manat təşkil edir. Aprelin 27-nə Maliyyə Nazirliyinin Dövlət Xəzinədarlıq Agentliyi tərəfindən 17 568 vergi ödəyicisinə 168 778 nəfər muzdlu işçinin əməkhaqqı üzrə 38,46 milyon manat vəsaitin köçürülməsi təmin edilib.
Görünən odur ki, dövlət koronavirusla əlaqədar sahibkarlara maliyyə vəsaiti ayırıb. Yəni işçilərin məvacibinin yarısını dövlət ödəyir. Ancaq bu arada belə məlumatlar var ki, bəzi sahibkarlar bu vəsaiti işçilərdən əsirgəyirlər. Müxtəlif vasitələrlə bu vəsaiti öz şəxsi maraqları üçün mənimsəyirlər. Nəzərdə tutulduğu həcmdə işçilərə ödəniş edilmir. İşçilərə bu vəsait avans əvəzi verilir və s. Belə halların qarşısını necə almaq olar, bunun üçün hansı işlər görülməlidir?
“Təəssüf ki, bir çoxu iş yerini itirmək qorxusu üzündən susur və edilən haqsızlıqlara dözməli olur”
Məsələyə münasibət bildirən ekspert Rəsul Cahangirlinin sözlərinə görə, belə halların baş verməsi yolverilməzdir: “İndiki həssas dövrdə belə hallar baş verirsə, buna yol verən sahibkarlar cəzalandırılmalıdırlar. Məsələ ondadır ki, bəzi sahibkarlar işçilərin məlumatsızlığından istifadə edərək onlar üçün ayrılan vəsaiti təyinatı üzrə xərcləmirlər. Bu da birbaşa olaraq onların əmək və sosial hüquqlarının pozulması deməkdir. Hesab edirəm ki, belə hallar varsa, ciddi şəkildə araşdırılmalıdır. Bunda da gərək belə özbaşınalıqlarla üzləşən işçilər fəallıq göstərsinlər. Bununla bağlı müvafiq qurumlara müraciət etsinlər. Təəssüf ki, bir çoxu iş yerini itirmək qorxusu üzündən susur və edilən haqsızlıqlara dözməli olur. Başqa bir tərəfdən, sözügedən məsələyə bir sıra qurumlar ciddi nəzarət etməlidirlər. Elə bir mexanizm hazırlanmalıdır ki, prosesə effektiv nəzarət funksiyasını təmin edə bilsin. O üzdən, mütəxəssislər bunun üzərində işləməlidirlər”.
Vidadi ORDAHALLI
