“İran tərəfi məsələ ilə bağlı ona görə təkzib verir ki...”
Ermənistan işğal altında saxladığı Dağlıq Qarabağ və ətraf rayonlarda Azərbaycan abidələrinə, tarixi tikililərinə qarşı kütləvi saxtalaşdırma kampaniyası həyata keçirir. Erməni saxtakarlığının qurbanı olan tarixi abidələrimizdən biri də Şuşadakı Gövhərağa məscididir.
Bir neçə ildir ermənilər tərəfindən Gövhərağa məscidinin “restavrasiya” edilməsi barədə xəbərlər yayılır. Hətta erməni mətbuatı Gövhərağa məscidinin “fars məscidi” olması və həmin məscidin fars memarlıq üslubuna uyğun “bərpa” edildiyini də dəfələrlə yazıb. Məsələ burasındadır ki, ermənilər bu məscidin İran tərəfindən təmir edildiyini, bərpaya bu dövlət tərəfindən maliyyə vəsaiti ayrıldığını iddia etməkdə davam edirlər.
Bu günlərdə Ermənistan mətbuatı Şuşa şəhərində Gövhərağa məscidinin bərpa ediləcəyini, bərpa işlərinin İranın “Part Saman Cahan” şirkəti tərəfindən həyata keçiriləcəyinə dair məlumat yayıb.
İranın Xarici İşlər Nazirliyi isə erməni mediasının yaydığı xəbəri təkzib edib. İran XİN-in mətbuat xidmətinin rəhbəri Abbas Musəvi bildirib ki, Şuşada məscidin bərpasının İran şirkəti tərəfindən həyata keçiriləcəyinə dair məlumata malik deyillər. “İran “Part Saman Cahan” adlı yerli şirkətin Şuşa şəhərindəki “Gövhərağa” məscidinin bərpası işləri ilə məşğul olacağından məlumatsızdır. Bizdə Gövhərağa məscidinin bərpa işlərinin İran şirkəti tərəfindən həyata keçiriləcəyinə dair məlumat yoxdur” - deyə XİN rəsmisi bildirib.
Mətbuatın yaydığına görə, sözügedən İran şirkətinin rəhbəri kimi adı çəkilən Səid Nəhavəndi Ermənistanda memarlıq üzrə təhsil alıb.
- Faiq İsmayılov: “İran heç vaxt deməz ki, təmir işinə vəsaiti biz ayırmışıq”
Azərbaycanın İşğal Olunmuş Ərazilərindəki Tarix və Mədəniyyət Abidələrini Müdafiə Təşkilatı İctimai Birliyinin sədri Faiq İsmayılov “Bakı-Xəbər”ə bildirdi ki, İran XİN-in sözçüsünün məsələ ilə bağlı səsləndirdiyi fikirlər Azərbaycan-İran münasibətlərinin pozulmamasına hesablanıb. F.İsmayılovun sözlərinə görə, Şuşadakı Gövhərağa məscidinin “bərpası”na maliyyə İran tərəfindən ayrılıb, lakin burada iş görənlər İran deyil, erməni memarlarıdır. “Məsələ belədir ki, İran şirkətlərindən biri Şuşadkı Yuxarı Gövhərağa məscidinin təmiri ilə bağlı Ermənistana vəsait ödəyib. Bu faktdır. Amma, faktiki olaraq, məsciddə həyata keçirilən təmir işləri erməni ustaları, memarları tərəfindən həyata keçirilir. Yəni İrandan ora bərpaçı gəlməyib, sadəcə, təmirin pulu İran tərəfindən ödənilib. Vəsaiti verən İran şirkəti, təmiri aparan isə Ermənistan şirkətidir. Ermənilər təmir işlərinin İran şirkəti tərəfindən aparılması ilə bağlı saxta məlumatı ona görə meydana atırlar ki, guya bu məsələyə başqa dövlətlər də maraq göstərir. Burada onların məqsədi qondarma “respublika”nı tanıtmaqdır. İran tərəfi məsələ ilə bağlı ona görə təkzib verir ki, o bu torpaqların Azərbaycanın ermənilər tərəfindən işğal olunmuş əraziləri olduğunu bilir. İranın Azərbaycanla da münasibətləri var. Yəni bu baxımdan İran heç vaxt deməz ki, təmir işinə vəsaiti biz ayırmışıq. Digər tərəfdən də, ola bilsin, İran bu vəsaiti dövlət hesabına ödəməyib, bu işə maliyyə ödənilməsini hansısa bir şirkətinə həvalə edib. Bilirsiniz, Ermənistanın o məsciddə hansısa bir təmir aparması üçün o qədər vəsaiti yoxdur. Onlar dilənçilikdə mahirdirlər. Ermənilər o vəsaiti ordan-burdan alıb öz siyasi məqsədlərini də bunların üzərinə qoyurlar və paylaşırlar. Ermənistan bu kimi işlər həyata keçirməklə qondarma “Dağlıq Qarabağ Respublikası”nın “müstəqilliyini” tədricən tanıtmaq istəyir. Onlar İranın vəsaiti ilə gördükləri işləri, bütövlükdə, bu dövlətin adına bağlayırlar. Əlbəttə, İran bu məsələdə günahsız deyil. Çünki onlar bu məsələyə vəsaiti bilərəkdən ayırıblar. Baxmayaraq ki, bu ərazilərin Azərbaycan torpaqları olduğunu bilirlər. İran işğal altında olan Azərbaycan torpaqlarında bizim abidələrin ermənilər tərəfindən “bərpa edilməsi” üçün Ermənistana maliyyə vəsaiti verməli deyildi” - deyə F.İsmayılov bildirdi.
İradə SARIYEVA
.jpg)
