Son vaxtlar ermənilərin Türkiyənin adı ilə bağlı olan müəyyən xoşagəlməz və xüsusilə də Azərbaycanda böyük etirazla qarşılanan layihələrdə iştirak etdiyi barədə məlumatlara rast gəlirik.
İki gün əvvəl Ermənistandan olan və tərkibində rəsmi şəxslərin də yer aldığı nümayəndə heyətinin Qars bələdiyyəsi tərəfindən xüsusi təmtəraqla qarşılandığının şahidi olduq. Bunun ardınca isə düşmən ölkənin KİV-ində daha bir üzücü xəbər diqqətimizi cəlb etdi. Söhbət işğal altında olan Dağlıq Qarabağ ərazisində qondarma “DQR”in təşkil etdiyi “ConIFA- 2019” adlı futbol turnirindən gedir.
Məlumdur ki, həmin turnirdə əsasən tanınmayan separatçı qurumların komandaları iştirak ediblər. Ancaq bir sıra erməni KİV-ində məlumat verilib ki, yarışmanın finalında qondarma Cənubi Osetiyanın komandası Türkiyənin Van şəhərindən yarışa qatılan “Qərbi Ermənistan” komandası ilə üz-üzə gəlib. Türkiyənin adından hansısa bir komandanın qondarma qurumun ərazisində olan turnirdə çıxış etməsi necə mümkün olub və qardaş ölkənin rəsmi dairələri buna necə icazə veriblər?
Qabil Hüseynli: “Bu proses sərhədlərin açılması, Ermənistanla münasibətlərin bərpa olunmasına istiqamətlənib”
Politoloq Qabil Hüseynli “Bakı-Xəbər”ə açıqlamasında bildirdi ki, bu məlumata əvvəl inanmayıb: “Sonra mən erməni saytlarına baxdım. Hətta Rusiyaya aid olan bəzi KİV də həmin məlumatı təqdim edib. Orada “Qərbi Ermənistan” adlı komandanın Turkiyənin Van şəhərini təmsil etdiyi qeyd olunur. Bilirsiniz ki, Ermənistan rəsmi şəkildə Türkiyəyə qarşı ərazi iddiası irəli sürür. Hazırda Türkiyənin ərazisində olan bəzi şəhərlərin ərazisini “Qərbi Ermənistan” adlandırır. Yəni belə adda komandanın orada təşkil edilə bilməsi də mümkündür. Amma təqdimatda konkret olaraq Türkiyənin hansısa şəhərinin adı qeyd edilirsə, deməli, ortada maraqlı məqam var. Ermənistanla Türkiyə arasında heç bir əlaqə yoxdursa, belə bir komandanı hansısa şəhərin özünüidarəetmə qurumunun təşkil edə bilməsi də mümkün görünmür. Çünki burada söhbət sərhədi keçməkdən, müəyyən sənədlərin hazırlanması ilə bağlı prosedurlardan gedir ki, bunu da yalnız mühüm dövlət qurumlarının etməsi mümkündür. Görünür, Türkiyədə yerli özünüidarəetmələrdəki hakim koalisiyadan kənar qüvvələr bir sıra proseslərə rəvac verməkdədirlər. Bu proses sərhədlərin açılması, Ermənistanla münasibətlərin bərpa olunmasına istiqamətlənib. Bunun üçün kürdlər getdikcə fəallıq göstərirlər. Çünki biz Qarsla bağlı məsələdə də HDP izini gördük. Van şəhərində də kürdlər kompakt yaşayırlar. Əvvəla Van şəhər meriyasının sərhəddən keçmək haqqında icazə vermək səlahiyyətləri yoxdur. Bu məsələyə bilavasitə Türkiyə dövləti, hökuməti, xüsusilə də Xarici İşlər Nazirliyi nəzarət edir. Ola bilər ki, Türkiyənin bəzi dairələri bu üsulla turizmin inkişafına təkan verməyi düşünürlər. Çünki ermənilər Van ətrafına daha böyük maraq göstərirlər.Van gölü ətrafında ermənilərin “Axtamar” deyilən böyük bir kilsəsi var. Türkiyə dövləti çox böyük vəsait qoyaraq bu kilsəni təmir etdirib və müasir görkəmə salıb. Türkiyə hesab edir ki, bu, turizmin inkişafına təkan verəcək, dünyada olan ermənilər “Axtamar” kilsəsini ziyarət etmək üçün axışıb gələcəklər. Ermənilər turist sifətilə getsələr də, “Qərbi Ermənistan”ı yada salan komanda qururlar, “Ararat” adlandırdıqları (Ağrıdağ) dağın zirvəsinə qalxıb od qalamaq istəyirlər.
Bütün bunlar provokativ, meydanı həddindən artıq qızışdıran və heç bir beynəlxalq hüquq normasına sığmayan addımlardır. Ermənistanla Türkiyə arasında hər hansı bir diplomatik, işgüzar, ticari münasibətlər qurula bilməz. Axı Dağlıq Qarabağ problemi həll olunmayıb! Buna baxmayaraq, ermənilərin bu tip provokativ addımlarının qarşısının alınması üçün təcili tədbirlər görülməlidir. Xüsusilə də separatçı qurumun təşkil etdiyi futbol yarışında Türkiyədən komandanın qatılıb-qatılmadığı ilə bağlı rəsmi açıqlama verilməlidir”.
Məhəmmədəli QƏRİBLİ
