Ermənistan “XXI əsr Türk əsri” ideyasına guya alternativ çıxardı - “XXI əsr erməni əsri”...
Zaman-zaman utopik ideyalarla, avantürist açıqlamalarla gündəmdə qalmağa çalışan Ermənistan hökuməti təmsilçiləri bununla erməni xalqını aldatmaq məqsədi güdürlər. Çünki bu ölkəyə rəhbərlik edənlər də, ermənilərin dini liderləri və ideoloqları da hər zaman qeyri-real açıqlamalar verməklə erməni xalqını yanlış istiqamətə yönəldiblər.
Erməni mətbuatının yazdığına görə, Ermənistanın kurort şəhəri olan (?) Dilicanda “Summit of Minds” adlı beynəlxalq tədbir keçirilir. Sözügedən sammitdə Ermənistan Prezidenti Armen Sarkisyanın və Baş nazir Nikol Paşinyanın da iştirak etdiyi bildirilir. Qeyd edilənə görə, sözügedən tədbir adətən Fransada keçirilsə də, bu dəfə ənənədən kənara çıxaraq Ermənistanda düzənlənib. Ermənistan mətbuatının yaydığı məlumata görə, sammitdə bir sıra xarici ölkələrin tanınmış siyasi xadimləri, yüksək texnologiyalar üzrə alimlər, iş adamları da iştirak edirlər.
Toplantıda çıxış edən Ermənistanın Baş naziri N.Paşinyan, həmişə olduğu kimi, bu dəfə də cəfəng fikirlərlə diqqəti çəkib. XXI əsrin fikir və inkişaf əsri olduğunu qeyd edən Paşinyan “ona görə də biz inanırıq ki, XXI əsr də Ermənistan xalqının əsridir. Bu əsrdə erməni xalqının intibahı baş verəcək. Ermənistanın açıq dənizə çıxışı, nefti yoxdur və bu da Ermənistanın inkişafdan geri qalmağı demək deyil, artıq fikir, düşüncə, intellekt əsridir” - deyə vurğulayan Paşinyan, həmçinin, bildirib ki, yüksək texnologiyaları inkiaf etdirmək istiqamətində işlər görülür.
Ermənistanın Baş nazirinin heç bir tarixi reallığa söykənməyən və gerçəkliklə uzlaşmayan fikirləri yalnız ermənilər üçün ümiddoğurucu görsənə bilər, dünya üçün isə bu, köhnə və boyat bir nağıldır.
XXI əsr türk əsridir və bunu yalnız biz deyil, bütün dünya deyir. XXI əsrin türk əsri olması dünyanın ən möhtəşəm tribunalarından səsləndirilib.
- Niyaməddin Orduxanlı: “Onlar hansı potensialla, hansı imkanlarla buna nail ola bilərlər?”
Paşinyanın XXI əsri “erməni əsri” kimi qələmə verməsinin heç bir əsası olmadığını deyən Bütöv Azərbaycan Xalq Cəbhəsi Partiyasının sədr müavini, politoloq Niyaməddin Orduxanlının sözlərinə görə, erməni xalqının etimadını itirən Paşinyan bu açıqlama ilə gündəmdə qalmaq istəyir. O qeyd etdi ki, XXI əsrin “erməni əsri” olması üçün heç bir real göstərici yoxdur. “Bu gün “erməni xəstəliyi” bütün dünyaya məlumdur. Paşinyan və erməni xalqı cılız, mənasız, süni bir ideologiyanın təbliğatçısına çevriliblər. Ermənistanın siyasi rejimi bir ovuc xalq olan ermənilərin cahilliyindən istifadə edərək bu cür həqiqətə uyğun olmayan fikirlər səsləndirir. “Dənizdən-dənizə böyük Ermənistan” utopiyası ilə yaşayan erməni ideoloqları bu gün də cəfəng “XXI əsr erməni əsri olacaq” ideyasını ortaya atıblar. Rəzil vəziyyətə salınan ermənilərin XXI əsrdə hansısa yüksəlişə nail olmaları üçün heç bir real göstərici, əsas yoxdur. “XXI əsrin erməni əsri” olacağı fikri çox gülünc və absurddur. Bir sözlə, başqa dövlətlərin, xalqların verdiyi ianələrlə, onların süfrəsinin qırıntıları ilə yaşayan ermənilərin Baş naziri Paşinyan heç olmasa öz dediklərinə inanırmı? Onlar hansı potensialla, hansı imkanlarla buna nail ola bilərlər? İri dövlətlərin əlində alət olan, konkret Rusiyanın forpostuna çevrilən Ermənistan rəhbərliyinin belə bir bəyanat verməsi dünyada gülüşlə, ironiya ilə qarşılanır. Çünki dünya Ermənistanı Rusiyanın bir əyaləti kimi tanıyır. Ermənistan Rusiyanın subyektlərindən biridir. Hətta Çeçenistanın rəhbəri Ramzan Kadırov Rusiya dövlətinin yanında Ermənistanın siyasi rəhbərliyindən daha müstəqildir, sözü keçərlidir” - deyə N.Orduxanlı bildirdi.
XXI əsrin türk əsri olduğunu deyən N.Orduxanlının sözlərinə görə, Ermənistanın Baş nazirinin “XXI əsrin Ermənistan xalqının əsri” olacağını deməsi uğursuz bir addımdır. Dünyada milyonlarla türkün yaşadığını qeyd edən N.Orduxanlı hesab edir ki, bir ovuc erməni yalnız çirkin əməllərlə, saxtakarlıqla “XXI əsrin qəhrəmanı” ola bilər.
İradə SARIYEVA
