Məlum olduğu kimi, Ermənistanın baş naziri Nikol Paşinyan Rusiya prezidenti Vladimir Putinlə Sankt-Peterburqda Beynəlxalq İqtisadi Forumu çərçivəsində bir araya gəlib. Görüşdən sonra liderlərin gündəmi ilə bağlı ziddiyyətli açıqlamalar verilib.
Paşinyanın mətbuat katibi Vladimir Karapetyan bildirib ki, keçirilən görüş zamanı Dağlıq Qarabağ münaqişəsini müzakirə ediblər. Danışıqların detallarını açıqlamayan Karapetyan guya Qarabağ məsələsinin müzakirə edildiyini deyib.
Lakin Kremlin mətbuat katibi Dmitri Peskov deyilənləri təkzib edib. Onun sözlərinə görə, tərəflər arasında Dağlıq Qarabağ münaqişəsi müzakirə olunmayıb. Tərəflər arasında ikitərəfli münasibətlərlə və ticari-iqtisadi əməkdaşlığın müxtəlif aspektləri ilə bağlı danışıqlar olub: “Dağlıq Qarabağ münaqişəsinin həlli məsələsi Rusiya prezidenti Vladimir Putin və Ermənistanın baş naziri Nikol Paşinyan arasında keçirilən görüşdə müzakirə olunmayıb. İkitərəfli münasibətlərə, ticari-iqtisadi əməkdaşlığın müxtəlif aspektlərinə dair ətraflı danışıqlar aparılıb”.
Göründüyü kimi, ermənilər bu dəfə də yalan informasiyalar uyduraraq Dağlıq Qarabağ danışıqları ətrafında spekulyasiya yaratmağa cəhd etdilər. İstədilər ki, Rusiya prezidentini növbəti Qarabağ oynuna qoşsunlar, amma alınmadı. Çox qısa bir vaxt ərzində onların bununla bağlı yalanı ifşa edildi.
Maraqlıdır, bəs ekspertlər bunu necə dəyərləndirir? Yəni, ermənilər bu yalanı niyə uydurub?
Məhəmməd Əsədullazadə: “Moskva ilk növbədə Paşinyanı ram etməklə məşğuldur və o üzdən, münaqişə ilə bağlı müzakirələr Kreml üçün bu görüşdə maraqlı olmayıb”
Sözügedən məsələni baki-xeber.com-a şərh edən politoloq Məhəmməd Əsədullazadə buna bir neçə aspektdən yanaşdı: “Sankt-Peterburqda Rusiya prezidenti Putinlə forpostu olan ölkənin erməni baş naziri Paşinyan arasında görüş keçirildi. Sözügedən görüş, əsasən qubernatorla keçirilən görüş səviyyəsində idi. Bu açıq-aydın hiss olunurdu. Qeyd edim ki, Paşinyan nə qədər özünü müstəqil dövlət başçısı kimi göstərməyə çalışsa da, bu alınmır. Çünki o hər dəfə Ermənistanın Rusiyadan asılılığını artıran müqavilələr imzalamalı olur. Bu onu göstərir ki, Ermənistan tərəfi inqilabdan sonra heç də arzuladığı demokratik müstəqilliyə nail olmayıb. Sankt-Peterburq görüşündə birmənalı olaraq Ermənistanın daha da Kremldən asılılığı artdı. İqtisadi və siyasi cəhətdən Rusiya Ermənistana daha da nüfuz edir. Bu görüşdə Qarabağ məsələsi pioritet olmayıb. Nəinki prioritet olmayıb, heç müzakirə belə edilməyib. Çünki Moskva ilk növbədə Paşinyanı ram etməklə məşğuldur və o üzdən, münaqişə ilə bağlı müzakirələr Kreml üçün bu görüşdə maraqlı olmayıb. Hesab edirəm ki, Ermənistan rəsmilərinin belə açıqlamaları əsasən yalan ruporu üzərində qurulub və təbliğat məqsədi daşıyır. Onlar daim bu kimi informasiyalarla ictimai rəyi çaşdırmağa çalışırlar. Fon yaratmağa çalışdılar ki, guya Putin Paşinyanla bu strateji məsələni müzakirə edib. Ancaq çox keçmədi ki, bunun yalan olduğu ortaya çıxdı və Ermənistan rəhbərliyi pis vəziyyətdə qaldı. Nəzərə almaq lazımdır ki, Putin məhz Qarabağ münaqişəsi üzərindən Ermənistana tam nəzarət edir. Ona görə də Ermənistanda heç bir hakimiyyət onun qırmızı cizgisini keçməyə cəhd etmir. Bunun hansı sonluqla nəticələnəcəyinin fərqindədirlər”.
Vidadi ORDAHALLI
