Son vaxtlar sabiq nəqliyyat naziri Ziya Məmmədovun düşərgəsində bir hərəkətlənmə hiss edilir. Vəzifədən çıxarılandan sonra öz ata-baba kəndindəki villasında yaşamağa üstünlük verən Ziya Məmmədovun hazırda Bakı ətrafındakı villalarından birində daimi yaşamağa başladığı söylənir. Sabiq nazirin tez-tez Bakıdakı məclislərə qatıldığı və özündən razılıq ifadə edən jestlərinin nəzərə çarpdığı deyilir. Onun qardaşı, Milli Məclisin sabiq deputatı Elton Məmmədov isə Azərbaycan Texniki Universitetində prorektor təyin olunub.
Bu barədə ATU-nun İctimaiyyətlə əlaqələr şöbəsinin müdiri Nicat Abdullayev məlumat yayıb.
O bildirib ki, təhsil nazirinin əmri ilə Elton Məmmədov Azərbaycan Texniki Universitetində (AzTU) strateji inkişaf üzrə prorektor təyin edilib: "AzTU-nun rektor əvəzi, professor Xalıq Yahudov universitetdə yeni təsis edilən strateji inkişaf üzrə prorektor vəzifəsinə təyin olunan Elton Məmmədovu kollektivə təqdim edib".
Bundan əlavə, atasının vəzifədə olduğu və ondan sonrakı dönəmlərdə adı müxtəlif maliyyə qalmaqallarında hallanan Ziya Məmmədovun oğlu Anar Məmmədovun da fəallaşması nəzərə çarpır. A.Məmmədovun Bakıda olmasına dair mesajı ilk olaraq elə özü verib. O, paytaxtda keçirilən “Arsenal”-“Çelsi” oyunundan özünün “İnstagram” səhifəsində video paylaşıb. Sonra məlum olub ki, A.Məmmədov Bakıya qayıtmaqla yanaşı, həm də keçmiş şərikləri ilə haqq-hesab çürütməyi də planlaşdırır. Onun vəkili mediaya açıqlamasında bu yöndə məhkəmə çəkişmələrinin ola biləcəyini istisna etməyib.
Əgər buna qədər A.Məmmədovun ölkəyə qayıdışının mümkün olmayacağı haqda xəbərlər dolaşırdısa, hazırda o, çox iddialı danışmağa başlayıb. Onun adı atasının nazir olan dövrdə ərsəyə gətirdiyi və qısa zaman ərzində “aparıcı” şirkətlərə çevrilən təsisatlarla bağlı məhkəmə işlərində hallanırdı. Z.Məmmədovun qardaşının da adı maliyyə qalmaqallarında çox hallanıb. Mətbuatda gedən məlumatlarda qeyd edilirdi ki, Z.Məmmədov vəzifəsi ilə vidalaşandan sonra Elton Məmmədovun da başını qara buludlar almağa başlayıb. Hətta bildirilirdi ki, E.Məmmədov bir vaxtlar “Avtovağzal” kompleksində fəaliyyət göstərən ticarət obyektlərinə nəzarəti də itirmişdi.
Z.Məmmədovun ətrafı ABŞ Prezidenti Donald Tramp faktorundan ciddi yararlanmaq istəyib. Xüsusilə də Tramp prezident seçiləndən sonra vaxtilə Məmmədovların kurasiyasında olan saytlar dövriyyəyə ABŞ Prezidenti ilə A.Məmmədovun yaxın dost olması ilə bağlı məlumatlar buraxdılar. Hətta qeyd edilirdi ki, "Amerika-Azərbaycan” Alyansının sədri A.Məmmədov ABŞ-ın yeni seçilmiş Prezidenti Donald Trampın innaqurasiya mərasiminə dəvət olunub. A.Məmmədov Bakının Xətai rayonu ərazisində yerləşən "Tramp” adlı böyük bir plaza da inşa etdirib.
Belə söhbətlər yayılmışdı ki, Məmmədovlar Bakıdakı “Yelkən-hotel”i (əvvəlki adı “Trump Tower Baku”) Türkiyədən olan bir iş adamına satıblar. Yelkən formasında tikilən bina 72 apartament və 189 otel otağından ibarətdir. Sahələri 84-890 kvadratmetrədək dəyişən 70-dən çox apartamentin uzunmüddətli icarəyə verilməsi nəzərdə tutulurdu. Lakin hazırda həmin oteldəki son kosmetik işlərin Məmmədovlar tərəfindən aparıldığı deyilir. Maraqlıdır ki, Məmmədovlar dar çərçivədə bu cür reabilitasiya olunmalarını yenidən Tramp faktoru ilə bağlamağa çalışırlar. Belə təəssürat yaratmaq istəyirlər ki, sanki bunların yenidən aktivləşməsində Trampın rolu böyük olub. Ancaq unutmaq lazım deyil ki, bəzən ölkədəki humanizmdən bəhrələnməyi bacaran sabiqlərin belə sağ-sol gedişlərinin ən böyük ziyanı elə özlərinə dəyə bilər…
Məhəmmədəli QƏRİBLİ
