Ermənilər işğal altında saxladıqları Azərbaycan ərazilərində qanunsuz işlər görməkdə davam edirlər. İndiyə qədər həmin ərazilərdə ermənilər bir sıra zavodlar qurub, istirahət mərkəzləri açıblar. Eyni zamanda da onlar Azərbaycanın təbii sərvətlərini talan edərək o məhsulları xarici ölkə bazarlarına çıxarmağa cəhd edirlər.
Sirr deyil ki, ermənilər işğal altında saxladıqları Dağlıq Qarabağ və ətraf rayonlarda turizm məkanları, istirahət mərkəzləri yaratmaqla Azərbaycanın dilbər guşələrinə xarici turistlər cəlb edirlər. Ermənilərin bu qanunsuz əməllərinin miqyası günü-gündən artır. Ermənistan mətbuatının yazdığı məlumata görə, ermənilər işğal altında olan Azərbaycan şəhəri Kəlbəcərdə kurort zonası yaradıblar. Ermənilərin qanunsuz olaraq yaratdıqları kurort zonasının açılışında qondarma rejimin saxta rəhbəri Bako Saakyanın da qatıldığı bildirilir.
Ekspertlərin bildirdiyinə görə, Kəlbəcər bir kurort zonası olaraq hələ Sovet dövründən cəlbedici olub. Burada yerləşən İstisu və digər kurort zonaları nəinki Azərbaycanda, hətta keçmiş ittifaqda belə çox populyar olub. Azərbaycanın ayrılmaz parçası olan Kəlbəcərdə bu gün ermənilərin kurort zonası yaratması və istirahət etmək üçün xariciləri bu məkana cəlb etməsi, birmənalı olaraq, qanunsuzdur.
Niyaməddin Orduxanlı: “Ölkəmiz beynəlxalq qurumlar qarşısında məsələ qaldırmalıdır ki, ermənilər işğal etdikləri Azərbaycan torpaqlarında qanunsuz istirahət mərkəzləri açır, ora xarici vətəndaşları cəlb edirlər”
Ermənilərin yol verdikləri bu qanunsuz hərəkətin bütün beynəlxalq konvensiyalara, beynəlxalq hüquq norma və prinsiplərinə zidd olduğunu deyən Bütöv Azərbaycan Xalq Cəbhəsi Partiyasının sədr müavini, politoloq Niyaməddin Orduxanlı hesab edir ki, beynəlxalq qurumlar ermənilərin bu qanunsuz hərəkətlərinin qarşısının alınması istiqamətində konkret addımlar atmalıdırlar. N.Orduxanlı hesab edir ki, ermənilərin məqsədi Kəlbəcərdə kurort zonası yaratmaqla həm bura daha çox xarici turist cəlb edib pul qazanmaq, həm də bu ərazilərin “ermənilərə məxsus olduğunu” təlqin etməkdir. “Ermənilərin işğal altında saxladıqları Dağlıq Qarabağ və ətraf rayonlarda həyata keçirdikləri bütün işlər qanunsuzdur. Onların Kəlbəcərdə kurort zonası yaratması, bura turistlər cəlb etməsi kimi hallar da heç bir beynəlxalq qanun çərçivəsinə uyğun deyil. Bu kimi hallar beynəlxalq hüququn prinsiplərinə ziddir. Azərbaycan ərazisi olan bu torpaqlar Ermənistan tərəfindən işğal edilib. Orada həyata keçirilənlər heç bir dövlət tərəfindən qəbul edilməyən, tanınmayan qondarma rejimin özfəaliyyətidir. Bunun qarşısı beynəlxalq hüquq müstəvisində alınmalıdır. Qədim Azərbaycan ərazisi olan Kəlbəcərdə ermənilərin bu qanunsuz əməllərinin qarşısı alınmalıdır. Azərbaycan torpaqlarının erməni işğalından qeyd-şərtsiz azad edilməsi ilə bağlı BMT Təhlükəsizlik Şurasının 4 qətnaməsi var. İşğal edilmiş Azərbaycan torpaqlarında yaradılan qondarma rejim bütün beynəlxalq prinsipləri pozub. Onu da vurğulayım ki, işğal altında olan Azərbaycan torpaqlarına, məqsədindən asılı olmayaraq, hər hansı bir səfərə gedən xarici vətəndaş beynəlxalq qanunları pozur, bu, Azərbaycan qanunlarına ziddir”.
N.Orduxanlı hesab edir ki, Kəlbəcərdə ermənilər tərəfindən qanunsuz olaraq yaradılan kurorta gələn hər bir əcnəbi vətəndaş qanunları pozur. Onun sözlərinə görə, işğal altında olan Azərbaycan torpaqlarına qanunsuz səfər edən istənilən kəs Azərbaycan tərəfindən arzuedilməz şəxs elan edilir. “Ermənilər işğal altında saxladıqları Azərbaycan torpaqlarında, əslində, turizmi inkişaf etdirmək niyyəti güdmürlər, onlara öz dırnaqarası respublikalarını tanıtmaq lazımdır. Məqsədləri budur. Bütövlükdə, bu, qanunlara ziddir. Ölkəmiz beynəlxalq qurumlar qarşısında məsələ qaldırmalıdır ki, ermənilər işğal etdikləri Azərbaycan torpaqlarında qanunsuz istirahət mərkəzləri açır, kurort zonası yaradır, ora xarici vətəndaşları cəlb edirlər” - deyə N.Orduxanlı qeyd etdi.
İradə SARIYEVA
