Ermənistan hökuməti, xüsusən də bu ölkənin Baş naziri Nikol Paşinyan idmandan siyasi məqsədlər üçün istifadə edir. “Arsenal” futbol komandasının erməni əsilli oyunçusu Mxitaryanın Bakıda keçirilən UEFA Avropa Liqasının final oyununda iştirak etməməsinin əsl səbəbləri bir tərəfdə qalıb, Paşinyan və Mxitaryan bu hadisəyə siyasi don geydirməyə çalışırlar.
Məlum olduğu kimi, Ermənistan Baş naziri N.Paşinyan “Arsenal” futbol klubunun oyunçusu H.Mxitaryanla telefon söhbəti edərək onun UEFA Avropa Liqasının final oyununda Bakının irqçi mövqeyinə görə iştirak edə bilmədiyini vurğulayıb. Monoetnik dövlətə rəhbərlik edən bir şəxsin multikultural bir ölkəyə “irqçi dövlət” donu geydirməsinin heç bir əsası yoxdur.
Qeyd edək ki, məlum məsələyə Azərbaycan Xarici İşlər Nazirliyinin mətbuat katibi Leyla Abdullayeva da münasibət bildirib. XİN sözçüsü “Ermənistan Baş nazirinin özünə aid olmayan məsələlərə qarışaraq, idmanı siyasiləşdirməsi, görünür, onun üzləşdiyi daxili problemləri bu kimi addımlarla pərdələmək cəhdlərindən irəli gəlir. Ermənistan kimi monoetnik dövlətin və qonşu Azərbaycanın ərazilərini güc tətbiq etməklə işğal edərək bu ərazilərdə zorakı etnik təmizləmə həyata keçirən, Xocalıda qanlı soyqırımı törədən bir ölkənin rəhbərinin iqrçilikdən danışmağa heç bir haqqı yoxdur. Bu hər hansı əxlaqa sığmır. Ermənistan Baş nazirinə xatırladırıq ki, torpaqlarımızın erməni silahlı qüvvələrinin işğalı altında olmasına rəğmən, Azərbaycanda bu gün on minlərlə erməni yaşayır və ümumiyyətlə, ölkəmizdə müxtəlif dinlərin və millətlərin nümayəndələri hər zaman sülh və əminamanlıq şəraitində birgə yaşayıblar və yaşayırlar. Onu da qeyd edim ki, Ermənistanın böyük qısqanclıqla izlədiyi və hər vəchlə əsassız şəkildə gündəmə gətirdiyi Avropa Liqasının Bakıdakı final oyunu zamanı Azərbaycana səfər edən çoxsaylı əcnəbi pərəstişkarlar ölkədəki vəziyyətlə öz gözləri ilə tanış olublar. Necə deyərlər, yalan ayaq tutar, ancaq yeriməz!” - açıqlaması ilə çıxış edib.
Qasım Hacıyev: “Onun durub multikulturalizmin, tolerantlığın tam bərqərar olduğu Azərbaycanı irqçilikdə suçlaması doğrudan da absurddur, çox gülüncdür”
Azərbaycan Milli Elmlər Akademiyasının Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, bu gün Ermənistanda ermənilərdən və erməniləşdirilmiş yezidi kürdlərdən başqa xalq yaşamır. Ermənistan dövlətinin tamamilə monoetnik olduğunu vurğulayan Q.Hacıyevin sözlərinə görə, belə bir dövlətin başçısının Azərbaycan kimi tolerant, multikultural dövləti irqçilikdə ittiham etməsi yersizdir. Q.Hacıyev vurğuladı ki, Mxitaryan bir futbolçu kimi futbolla deyil, çirkin siyasətlə məşğul olur. “Ciddi adamlar çox yaxşı bilirlər ki, Paşinyan özü çox qeyri-ciddi adamdır. Digər tərəfdən, Paşinyan ən ciddi hərbi və siyasi məsələlərdə o qədər avantürist çıxışlar edir ki, bu da onun qabiliyyətinin ancaq idmandan, futboldan danışmağa çatdığını göstərir. Orda da təxribata yol verir. Paşinyanın Mxitaryanla telefon söhbətində Azərbaycanı “irqçi” dövlət adlandırması iddiasının heç bir əsası yoxdur. Paşinyanın Qarabağa gəlib qayıtması, oğlunu ora hərbi xidmətə göndərməsi və s. çox biabırçı hərəkətlərdir. Bununla belə, onun durub multikulturalizmin, tolerantlığın tam bərqərar olduğu Azərbaycanı irqçilikdə suçlaması doğrudan da absurddur, çox gülüncdür. Paşinyan utansın ki, Mxitaryan məsələsindən danışır. Mxitaryan gedib dünya ictimaiyyətinə izahat versin ki, futboldan qazandığı pulları hara xərcləyir və buna görə də Azərbaycandan da üzr istəsin. Mxitaryan futbol oynadığına görə ona verilən pulları və erməni diasporundan aldığı maliyyəni Qarabağda mövcud olan separatçı dəstələrə yardım olaraq göndərir. Mxitaryan kimi separatizmə dəstək verən və adını “futbolçu” qoyan bir adamla danışmaq, ona dəstək vermək dövlət başçısına yaraşmayan bir hərəkətdir. Mxitaryan gedib futbolla məşğul olsun, o, siyasətçi və dövlət adamı deyil. Bizdə Mxitaryanın təxribatla məşğul olması barədə faktlar var”.
İradə SARIYEVA
