Son bir ildə Azərbaycan bir çox uğura imza atıb. Azərbaycan müxtəlif beynəlxalq tədbirlərə evsahibliyi edib, ölkədə bir sıra sosial-iqtisadi, idarəetmə ilə bağlı islahatlar həyata keçirilib. Sosial xarakterli paketlər qəbul edilib.
Reallıq ondan ibarətdir ki, çox geniş sosial-iqtisadi xarakterli işlər görülüb. Belə ki, minimim əməkhaqqı 38 faiz artırılıb. Bütün sosial müavinətlər nəzərəçarpacaq dərəcədə artırılıb. Elə müavinətlər var ki, iki dəfə artırılıb. Həmçinin, yeni müavinət növləri yaradılıb. İdarəçilik sistemi təkmilləşdirilib. Bir-birini təkrarlayan qurumlar ləğv edilib, vətəndaşların müxtəlif xidmətlərdən istifadə imkanları asanlaşıb.
Digər tərəfdən, bu gün Azərbaycan bir çox önəmli beynəlxalq tədbirin, forumların, nüfuzlu idman yarışlarının keçirildiyi məkana çevrilib. Bu tədbirlərin keçirilməsi Azərbaycana beynəlxalq təşkilatlar tərəfindən göstərilən diqqətin ifadəsidir. Bunu şərtləndirən başlıca faktor Azərbaycanın, Bakı şəhərinin inkişafı, burada lazımi infrastrukturun yaradılmasıdır. Görünən odur ki, Azərbaycan artıq nəinki beynəlxalq tədbirlərə evsahibliyi edir, hətta bu sahədə yeni ənənələrin yaranmasının təşkilatçısı kimi də çıxış edir. Müşahidələr göstərir ki, ötən dövrdə keçirilən bütün tədbirlər uğurlu alınıb. Məsələn, keçirilən VII Qlobal Bakı Forumu, V Dünya Mədəniyyətlərarası Dialoq Forumu, Avroliqa ilə bağlı final oyunu, Beynəlxalq Xəzər Neft və Qaz Sərgisi bu qəbildən olan tədbirlərdir.
Yuxarıda sadalanan sözügedən sahələrdə uğurların əldə olunmasında şəxsən Prezident İlham Əliyev necə rol oynayıb?
Qabil Hüseynli: “Prezidentin təşəbbüsü ilə həyata keçirilən struktur islahatları, pensiya və müavinətlərin artırılması miqyasına görə genişdir”
Məsələyə münasibət bildirən politoloq Qabil Hüseynlinin sözlərinə görə, sözügedən işlərin təşkilində, əldə olunan uğurlarda Prezident İlham Əliyevin rolu böyükdür: “Bakıda təşkil edilən beynəlxalq tədbirlər, sivilizasiyalar və mədəniyyətlərarası dialoq mövzusunda keçirilən forumlar, humanitar tədbirlər, böyük beynəlxalq yarışlar bu sahədə əldə olunan uğurların göstəricisidir. Avroliqa ilə bağlı Bakıda keçirilən idman tədbiri çox uğurlu alındı. Bütün bunların təşkilində, həyata keçirilməsində və əldə olunan uğurlu nəticələrdə ölkə başçısının xidmətləri böyükdür. Hesab edirəm ki, bu uğurların əldə olunması bilavasitə Prezident İlham Əliyevin fəaliyyəti ilə bağlıdır. Ona görə də obyektivlik naminə ölkə başçısının bu sahədə xidmətləri yüksək qiymətləndirilməlidir. Nəzərə almaq lazımdır ki, sözügedən sahələrdə əldə olunan nəticələr beynəlxalq müstəvidə Azərbaycanın imicinə müsbət təsir göstərir. Azərbaycanın beynəlxalq münasibətlərdə oynadığı rola bir dinamiklik verir. Ölkənin nüfuzunun artmasına müxtəlif formalarda müsbət təsir göstərir. Çünki Prezident İlham Əliyevin təşəbbüsü ilə həyata keçirilən struktur islahatları, pensiya və müavinətlərin artırılması miqyasına görə genişdir. Aparılan islahatlar dünyanın diqqətini cəlb edir. Baxın, bir həftə ərzində ABŞ Prezidenti ölkə başçısına 2 dəfə məktub göndərib. Bu onu göstərir ki, Azərbaycan çox böyük nüfuza malikdir və ortalıqda böyük nəticə var. Azərbaycanın sahib olduğu nüfuzun kökündə sadalanan böyük işlər dayanır. Hansı ki, bu sahədə əldə olunan uğurlarda Prezident İlham Əliyevin rolu bütün mənalarda böyükdür”.
Vidadi ORDAHALLI
