17/08/2019 15:29
728 x 90

Mxitaryana görə Ermənistandan futbolçu alınmasına son qoyuldu – London idman hüquqşünaslarının təcili toplantısı…

img

Müəyyən qüvvələrin apardığı təbliğata baxmayaraq, Azərbaycan UEFA Avropa Liqasının final qarşılaşmasına uğurla ev sahibliyi etdi. Bakı Olimpiya Stadionunda keçirilən,  Londonun “Arsenal” və “Çelsi” komandaları arasında baş tutan maraqlı final oyunu bütün dünyanın diqqətini ölkəmizə yönəltdi. Uğurla baş tutan oyundan sonra dünya bir daha Azərbaycanın bu və digər belə oyunlara layiqincə ev sahibliyi edə biləcəyinə şahidlik etdi.

Özü də budəfəki oyun bəzi parametrlər baxımından mühüm yeniliklərlə də yadda qaldı. Məsələn, Avropa Liqası tarixində ilk dəfə bu oyunda videonəzarət sistemindən istifadə olundu. Bundan başqa, bu turnirdə ilk dəfə olaraq komandalar əlavə vaxt təyin olunacağı təqdirdə dördüncü əvəzetmədən istifadə etmək hüququ qazandılar. Bu mənada, iki yüzdən çox ölkədə canlı yayımlanan final qarşılaşması həm də futbol tarixində vacib yeniliklərlə yadda qala bildi.

Bununla yanaşı digər  maraqlı məqam ondan ibarətdir ki, final qarşılaşması ilə əlaqədar tamaşaçı tutumu 70 min yerə çatdırılan Bakı Olimpiya Stadionu bu baxımdan UEFA Avropa Liqasının tarixində 20 illik rekordu yeniləyib. Söhbət ondan gedir ki, Bakı Olimpiya Stadionu bu göstərici üzrə UEFA Avropa Liqasının final matçına ev sahibliyi edən stadionlar arasında ən çox tamaşaçı tutumuna malik arena olub. Belə ki, 1999-cu ildə “Parma” və “Marsel” komandaları Moskvanın 62 min tamaşaçı tutumuna malik “Lujniki” stadionunda üz-üzə gəliblər. O vaxtdan indiyə qədər olan rekord məhz Bakıda yeniləndi. Bütün bunlar isə sözügedən final oyununa qarşı aparılan qara piarın fiaskoya uğramasının real təzahürü qismində çıxış edir. Ekspertlər də bildirir ki, nəticələr UEFA Avropa Liqasının final matçının Bakı Olimpiya Stadionunda keçirilməsi ilə bağlı qərarının tam düzgün olduğunu, eyni zamanda son illər sürətlə inkişaf edən Azərbaycan idmanının qazandığı növbəti uğurunu göstərir. Belə vəziyyət həm də Azərbaycana qarşı aparılan təbliğatın başında duran erməni lobbisinin, Ermənistanın iflasa uğraması deməkdir. Bu arada, həmin təbliğatda erməni tərəfinin əsas iştirakçı qismində çıxış etdiyini təsdiqləyən növbəti mühüm məqamlar üzə çıxıb. Belə ki, yayılan məlumata əsasən, Ermənistanın baş naziri Nikol Paşinyan ölkəsinin yığmasının kapitanı və London "Arsenal”ının yarımmüdafiəçisi olan Henrix Mxitaryanla telefonla danışıb. Ermənistan baş nazirinin futbolçu Henrix Mxitaryana bu təcili zəngi bir daha sübut edir ki, Avropa Liqasının finalı ətrafında ingilis mətbuatında Azərbaycan əleyhinə olan hücumların arxasında erməni diasporu və Ermənistan hökuməti durub.

Bundan əlavə, Mxitaryanla bağlı məsələdə Ermənistanın baş naziri Azərbaycana irqçi hücum edib. Onun bu xüsusda dediyi aşağıdakı fikirlər xüsusi diqqət cəlb edir: "Nur-Sultandan döndükdən sonra Henrix Mxitaryanla telefonla danışdım və bu gün “Arsenal” və “Çelsi” komandaları arasında keçiriləcək oyundan əvvəl Bakının irqçi mövqeyinə görə həmin matçda iştirak edə bilməyəcəyi üçün ona dəstək verdim". Paşinyanın bu cəfəng fikirlərinə rəğmən, Azərbaycan bundan öncə dəfələrlə Mxitaryana ölkəmizdə hər cür təhlükəsizliyin təmini vədi verib. Amma erməni futbolçu Bakıda baş tutan Avroliqa finalına qatılmayıb. Mxitaryanın bu addımından isə erməni diasporu və Ermənistan mediası geniş şəkildə yararlanaraq Bakıya qarşı hücumlara başlayıb. UEFA Mxitaryanın Bakıdakı finalda iştirak etməməsi məsələsində Azərbaycanın yanında yer alıb, Bakının Mxitaryana hər cür təhlükəsizlik vədi verdiyini bəyan edib. Gənclər və idman naziri Azad Rəhimov BBC-yə müsahibəsində bununla bağlı maraqlı məqamlara toxunub. Azərbaycan tərəfindən hər cür təminat verilmiş, lakin Bakıya gəlməkdən imtina etmiş Mxitaryan haqqında sualları cavablandırarkən Azad Rəhimov bildirib: “Ermənistanlı idmançılar Bakıda 2015-ci ilin Avropa Oyunlarında və digər idman tədbirlərində iştirak ediblər. Buna görə də, mən bu insanın gəlməkdən imtina etməsini anlamıram. Ola bilsin ki, ona qonşularınız tərəfindən hansısa təzyiqlər olub. Mən doğrudan da anlamıram ki, vəziyyət niyə dəyişib. Əvvəllər çox sadə idi. Biz Ermənistanla razılığa gəlmişik ki, istənilən idmançı idman nazirinin məktubundan sonra təhlükəsizlik təminatı alır. Biz bu məktublarla mübadilə edirdik və hər şey çox rəvan idi. Lakin indi bilmirəm ki, nə dəyişib. Bəlkə bu, Ermənistanın yeni hökumətinin işidir, ya da sadəcə olaraq bu insanın və onun ailəsinin qərarıdır. İstənilən halda, təminatla bağlı problem yoxdur”.

Bu açıqlamalar bir daha təsdiq edir ki, Mxitaryan olayı süni şəkildə qurulub. Yeri gəlmişkən, bu futbolçu əvvəllər də Bakıya gəlməkdən şəxsi təşəbbüsü ilə imtina edib. Belə ki, Azərbaycan 2015-ci ildə Avropa Liqasının oyunları çərçivəsində Mxitaryanın "Qəbələ" klubu ilə oynamaq üçün "Borussiya" klubunun tərkibində, 2018-ci ildə isə "Qarabağ" klubu ilə oynamaq üçün "Arsenal"ın tərkibində Bakıya gəlməsinə etiraz etməyib. Amma Mxitaryan bundan özü imtina edib.  Onun son addımı “Arsenal” klubunda belə ciddi narazılıq yaradıb. Azərbaycanın və UEFA-nın təhlükəsizliklə bağlı ən yüksək səviyyədə təminat verməsinə rəğmən, erməni futbolçunun “Arsenal” üçün böyük önəm daşıyan matça gəlməkdən boyun qaçırması klubda ciddi narazılığa səbəb olub. London təmsilçisinin rəhbərliyi Mxitaryanın təxribatçı davranışını müqavilə şərtlərinə əməl etməmək kimi qiymətləndirib. Klub yay fasiləsində onu satacağını açıqlayıb. Başqa sözlə, Mxitaryan özünün və ailəsinin qərarı ilə Bakıya gəlməkdən boyun qaçırdığı üçün satışa çıxarılacaq. Bundan başqa, yaxın günlərdə Mxitaryanın məsələsi ilə bağlı Londonda idman hüquqşünaslarının toplantısı planlaşdırılıb. İclasda Ermənistan yığmasının üzvünün müqaviləyə riayət etməməsi müzakirə olunacaq. Həmçinin İngiltərə klublarına siyasi qalmaqallarda iştirak edən futbolçuların transfer edilməməsi tövsiyə olunacaq. Məhz qeyd edilənlər erməni lobbisinin və Ermənistanın Azərbaycana qarşı piarının iflasa uğradığını göstərir. Eyni sözləri Azərbaycana qarşı piar kampaniyasında iştirak edən bəzi ingilisdilli media vasitələri barədə də demək olar. Bu xüsusda Rusiyanın "nyus.ru" portalı da yazır ki, ingilis mediasının Azərbaycana qarşı Mxitaryan üzərində qurduğu şou iflasa uğrayıb. Qeyd olunur ki, məşhur ukraynalı futbolçu Oleq Bloxin də Mxitaryanın hərəkətini axmaqlıq kimi qələmə verib. Portal qeyd edir ki, UEFA prezidenti Aleksandr Çeferin final oyunu ilə bağlı bütün hazırlıq işlərini ən yüksək səviyyədə qiymətləndirib. Çeferin Avroliqanın final oyununun keçirilməsi üçün niyə Bakının seçdiklərini açıqlayıb: “Niyə? Çünki orada yaşayan insanlar futbolu sevir. Təkcə İngiltərə və Almaniyada deyil, hər yerdə futbolu inkişaf etdirməliyik. Bakıdakı azarkeşlər canlı futbol görmək istəyində haqlı deyillərmi?! Yeri gəlmişkən, mən asanlıqla uçuşlar üçün aviabiletlərin olduğunu söylədim. Lakin kimsə bu haqda danışmır”. Portal daha sonra yazır ki, Bakıda yüksək səviyyədə baş tutan oyun Azərbaycana qarşı kampaniya aparan media vasitələrinin də iflasa uğradığını göstərdi. Əksinə, son final oyunundan sonra Azərbaycana dünya miqyasında diqqət və hörmətin daha da artması müşahidə olunur. Təsadüfi deyil ki, bu gün ən mötəbər idman qurumları nüfuzlu beynəlxalq yarışlara ev sahibliyi hüququnu tərəddüd etmədən Azərbaycana verir. Belə ki, UEFA Avropa Liqasının final oyunu ilə yanaşı, 2020-ci ildə futbol üzrə Avropa çempionatının qrup mərhələsinin üç, dörddəbir final mərhələsinin bir oyununun, bu il iyulun 20-28-də Avropa Gənclərinin Yay Olimpiya Festivalının Bakıda keçirilməsi barədə qərarlar verilib. Bu isə Azərbaycan üçün mühüm uğurlardır.

Nahid SALAYEV

Son xəbərlər