Məlum olduğu kimi, Qazaxıstanın paytaxtı Nursultan şəhərində Avrasiya İqtisadi İttifaqının iclası keçirilib. İclasda Ermənistanı Baş nazir Nikol Paşinyan təmsil edirdi. Lakin Paşinyan gözlənilmədən səfər qrafikinə dəyişiklik edərək Ermənistana tez qayıdıb.
Ermənistan KİV-inin yaydığı məlumata görə, Baş nazir qəfildən səfər çərçivəsində nəzərdə tutulan görüşlərdən imtina edərək İrəvana yola düşüb. Belə ki, Paşinyanın iclasdan sonra Qazaxıstanda yaşayan erməni iş adamları ilə görüşü və digər tədbirlərdə iştirakı nəzərdə tutulurdu. Lakin bu görüş baş tutmayıb.
Məlumatda o da deyilir ki, o, həmçinin, mətbuat nümayəndələrilə görüşdən və suallara cavab verməkdən də imtina edərək, sadəcə, standart yazılı bəyanat yayıb.
Qeyd edək ki, sözügedən toplantıda Belarus, Qazaxıstan, Qırğızıstan və Rusiya liderləri iştirak ediblər. İclas başlamazdan əvvəl Nursultan Nazarbayev Belarus Prezidenti Aleksandr Lukaşenko, Rusiya Prezidenti Vladimir Putin və Qırğızıstan Prezidenti Sooranbay Jookayevi “Nursultan” ordeni ilə təltif edib. N.Paşinyan isə bu ordenə layiq görülməyib. Güman edilir ki, Paşinyanı saya saymamaları onu məyus edib. Böyük ehtimalla, erməni Baş nazirin Qazaxıstan paytaxtına səfərində hansısa narazılıq, yaxud problem yaşanıb. Çünki, demək olar, əksər erməni KİV-i səfərin yarımçıq dayandırıldığı barədə məlumat yayıb.
Bütün hallarda, baş verənləri ekspertlər necə dəyərləndirirlər?
Arzuxan Əlizadə: “Yeni hakimiyyət fürsət düşdükcə daha çox Qərbə can atır”
Məsələyə münasibət bildirən AMİP-in baş katibi Arzuxan Əlizadənin sözlərinə görə, bütün bunlar Paşinyanın uğursuz siyasət aparmasının göstəricisidir: “Bu səbəbdən Paşinyan ard-arda uğursuzluqlarla üzləşir. Xarici siyasi məsələlərdə hər şey göz önündədir. Məsələ ondadır ki, nə Rusiya, nə də Qərb Paşinyanın səmimiyyətinə inanır. Elə bu səbəbdən də hər iki tərəfdən rəsmi şəkildə nə dəvət alır, nə də qəbul edilir. Ölkə daxilində də ciddi problemlər göz önündədir. Qazaxıstanda Paşinyanın üzləşdiyi rəzalət onu göstərir ki, o, ciddi dövlət başçısı kimi qəbul edilmir. Ermənistanın Aİİ-nin üzvü olması bu məsələdə nəyisə dəyişmir. Xüsusən də Qazaxıstanla Ermənistanın münasibətləri o qədər də yaxşı deyil. Qazaxıstanın sabiq prezidenti N.Nazarbayev dəfələrlə müxtəlif toplantılarda Azərbaycanın mənafeyini müdafiə edib. Açıq şəkildə bunu bəyan etməkdən çəkinməyib. Qazaxıstanda Ermənistanda “məxməri inqilab”dan sonra hakimiyyətə gələn Paşinyana münasibət yaxşı deyil. Ötən qış ermənilər Qazaxıstanda müəyyən təxribatlar törətmək istədilər. Nəticədə Qazaxıstan ictimaiyyəti buna etiraz etdi. Bütün bunların nəticəsidir ki, Paşinyan Qazaxıstanda urvatsız qarşılandı. Qazaxıstan rəhbərliyi görür ki, Paşinyan Baş nazir olandan sonra Kollektiv Təhlükəsizlik Müqaviləsi Təşkilatının fəaliyyətini iflic etməyə çalışdı. Aİİ-də Ermənistan formal iştirak edir və bu təşkilata fayda vermək istəmir. Yeni hakimiyyət fürsət düşdükcə daha çox Qərbə can atır. Ona görə də Paşinyanla məsafəli davranırlar və ona ciddi yanaşmırlar. Bütün bu səbəblər üzündən Paşinyanın səfəri uğursuz və yarımçıq alınıb. Hətta erməni iş adamları ilə belə görüşə bilməyib. Hesab edirəm ki, bu, münasibətlərin yaxşı olmadığının əyani göstəricisidir”.
Vidadi ORDAHALLI
