Xəbər verildiyi kimi, ABŞ Prezidenti Donald Tramp XXVI Beynəlxalq “Xəzər Neft və Qaz” sərgisinin keçirilməsi ilə əlaqədar Azərbaycan Prezidenti İlham Əliyevə məktub yazıb. Məktubda ABŞ Prezidenti bir sıra məqamlara toxunub. Qeyd olunub ki, Azərbaycan özünün tarixində bugünkü qədər firavan və qlobal iqtisadiyyata bağlı olmayıb: “Cənub Qaz Dəhlizi” daxil olmaqla, Azərbaycanda hasil olunan neft və qaz dünya enerji bazarlarında sabitliyi artırmaqda davam edir.
Türkmənistan və Şərqi Aralıq dənizi hövzəsi ölkələri kimi digər potensial təchizatçılarla tərəfdaşlıq quraraq Azərbaycan daha böyük liderlik rolu oynaya bilər. Ölkənizin uğurlarını genişləndirməyin əsl vaxtıdır.
Amerika Birləşmiş Ştatları xarici sərmayələrin cəlb edilməsi və innovasiyaların təşviqinə xidmət edəcək iqtisadi islahatların davam etdirilməsində səylərinizi dəstəkləyir. Azərbaycanın iqtisadi uğuru bütün regiona sabitliyin gətirilməsinə yardım edəcək”.
Qeyd edək ki, Tramp son bir həftə ərzində Azərbaycan Prezidentinə iki dəfə məktub göndərib. Bundan əvvəl ABŞ Prezidenti mayın 24-də Respublika Günü ilə əlaqədar ölkə başçısına təbrik məktubu ünvanlayıb. Görünən odur ki, bir həftədə iki məktub ünvanlaması ABŞ-ın Azərbaycana yüksək önəm verdiyini və ölkəmizin bölgədə liderlik rolunu aydın göstərir. Bu, Azərbaycana verilən böyük önəmin təzahürüdür.
Yeri gəlmişkən qeyd edək ki, bu günlərdə Ermənistan Təhlükəsizlik Şurasının katibi Armen Qriqoryanın ABŞ-a səfəri uğursuz oldu. Ermənistanın bütün səylərinə baxmayaraq, Con Bolton Qriqoryanı qəbul etməkdən imtina edib. Onu da qeyd edək ki, ötən il Bolton İrəvanda olarkən Qriqoryanla təkbətək görüşməkdən də imtina edib. Nəticədə Qriqoryan Boltonun ofis nümayəndələri və icma rəhbərləri ilə görüşməyə məcbur olub.
Bütün bu deyilənlərin fonunda, Trampın son bir həftə ərzində Azərbaycan Prezidentinə iki dəfə məktub göndərməsini ekspertlər necə dəyərləndirirlər?
Elman Nəsirov: “İki dövlət arasında fundamental məsələlərdə ortaq yanaşma mövcuddur”
Məsələyə münasibət bildirən millət vəkli Elman Nəsirovun sözlərinə görə, Trampın Prezident İlham Əliyevə bir həftə ərzində 2 dəfə məktub göndərməsi onu göstərir ki, Azərbaycan-ABŞ münasibətləri bütün istiqamətlər üzrə dinamik inkişaf tempinə malikdir: “Xüsusilə də Respublika Günü ilə bağlı göndərdiyi təbrik məktubunda Tramp Azərbaycan-ABŞ münasibətlərinə toxunarkən qeyd edib ki, bizim münasibətlərimiz ortaq maraqlara əsaslanan güclü tərəfdaşlıq münasibətləridir. Heç şübhəsiz ki, cənab Trampın məktubda işlətdiyi hər bir söz və ifadə konkret məna kəsb edir. İki ölkə arasında ortaq maraqlar nə ola bilər? Bu, ilk növbədə, siyasi dialoqda və iqtisadi əlaqələrin inkişafında ola bilər. Xüsusən də enerji təhlükəsizliyi və terrorizmə qarşı mübarizə məsələlərində biz ortaq mövqedən çıxış edirik. Digər tərəfdən, münasibətlərimiz xarakterizə edilərkən tərəfdaşlıq kimi yox, güclü tərəfdaşlıq münasibətləri kimi qiymətləndirilir. Bu onu göstərir ki, iki dövlət arasında fundamental məsələlərdə ortaq yanaşma mövcuddur. Bu da Azərbaycana xüsusi diqqətin ifadəsidir. Bununla yanaşı, Tramp Azərbaycan Prezidentinin “Cənub Qaz Dəhlizi”nin reallaşması ilə bağlı atdığı addımları yüksək liderlik kimi qiymətləndirir. Prezident İlham Əliyevin yüksək liderlik qabiliyyətini önə çəkir. Bu da diqqətdən yayınmayan çox vacib məqamlardan biridir. Həmçinin, aparılan islahatlar, xüsusən də qanunun aliliyinin qorunub saxlanması istiqamətində atılan addımlar yüksək qiymətləndirilir”.
E.Nəsirovun fikrincə, Trampın ikinci məktubunda ən mühüm tezislərdən biri ondan ibarətdir ki, Azərbaycanın özünün tarixində indiki qədər firəvan və qlobal iqtisadiyyata bağlı olmadığı qeyd edilir: “Bu onu göstərir ki, həqiqətən də Birləşmiş Ştatlar Azərbaycandakı proseslərə çox böyük önəm verir. Bu həm də onu göstərir ki, ölkə başçısının həyata keçirdiyi iqtisadi islahatlar və sosial paket çox müsbət dəyərləndirilir. Atılan bu addımlar, nəticə etibarilə, ABŞ-la Azərbaycan arasında əməkdaşlığın daha da dərinləşməsinə xidmət edir. Beləliklə, ABŞ Prezidentinin Azərbaycan Prezidentinə ünvanladığı hər iki məktub bir daha təsdiqləyir ki, tərəflər arasında siyasi dialoq, iqtisadi əlaqələr dinamik inkişaf tempinə malikdir. Ancaq Azərbaycandan fərqli olaraq, Ermənistan ABŞ üçün önəm kəsb etmir. Bu, həmin ölkəyə göstərilən münasibətdə də özünü açıq şəkildə büruzə verir”.
Vidadi ORDAHALLI
