“İstəkləri bu məscidi tamamilə məhv etmək, yer üzündən silməkdir”
Ermənilər işğal altında saxladıqları Dağlıq Qarabağda və ətraf rayonlarda maddi mədəniyyət abidələrimizə qarşı müxtəlif formalarda təxribatlar törədirlər. Onlar dağıtdıqlarını dağıdıblar, qalan abidələrimizi isə erməniləşdirməkdə davam edirlər.
Ermənilər Şuşadakı Yuxarı Gövhər Ağa Məscidinə qarşı da ağlasığmaz vəhşiliklər törədiblər. Bu halla bağlı “Azərbaycan Respublikasının Dağlıq Qarabağ bölgəsinin azərbaycanlı icması” İctimai Birliyinin rəhbəri Tural Gəncəliyev bəyanatla çıxış edib. Şuşadakı Yuxarı Gövhər Ağa məscidi ilə bağlı bəyanatda qeyd edilir ki, Ermənistan silahlı qüvvələri tərəfindən işğal olunmuş Azərbaycan torpaqlarında xalqımıza məxsus zəngin mədəni, tarixi və dini irsin dağıdılması, gizlədilməsi və dəyişdirilməsi kimi fəaliyyətin mütəmadi şahidi oluruq. “Biz erməni mediasına istinadən Şuşa şəhərinin Yuxarı Gövhər Ağa məscidində aparılan “təmir-bərpa işləri” haqqında xəbərləri dərin narahatlıq hissi ilə izləyirik. İşğalçı Ermənistanın torpaqlarımızda etnik təmizləmə həyata keçirdikdən sonra beynəlxalq humanitar hüququn bütün norma və prinsiplərini kobudcasına pozaraq Şuşanın əsas simvollarından hesab edilən məsciddə qanunsuz “təmir-bərpa işləri” aparması və bu məqsədlə hansısa şirkətləri cəlb etməsi Azərbaycan xalqının mirasına qarşı yönəldilmiş vandallıq hərəkətlərinin davamı kimi başa düşülməlidir.
Hamıya məlumdur ki, Qarabağ xanı İbrahim xanın qızı Gövhər Ağanın (Gövhərnisə bəyim) adını daşıyan Yuxarı Gövhər Ağa məscidi Gövhərnisənin maddi dəstəyilə, qoşa minarəli formada atası İbrahim xanın yararsız hala düşmüş məscidinin yerində şuşalı memar Səfixan Qarabaği tərəfindən 1883-cü ildə inşa edilib.
İşğal olunmuş Şuşa şəhərində digər abidələr və dini ibadət ocaqları da eyni aqibətlə üzləşib. Şuşa sanatoriyasının ərazisindəki rus kilsəsinin gümbəzini dağıdıb yenidən tikərək obrazı dəyişdirilib və rus kilsəsi yeni uydurma “Kanaç jam” adlandırılıb”.
Qeyd edilənə görə, Ermənistan bu hərəkəti ilə təkcə irsimizi hədəfə almır, eyni zamanda, İran və Azərbaycan arasında mövcud olan dostluq əlaqələrinə xələl gətirir. Bu bir daha Ermənistanın əsl xislətini nümayiş etdirir və destruktiv xarakterli hərəkətlərini ifşa edir. T.Gəncəliyev məlum bəyanatında bildirib ki, Yuxarı Gövhər Ağa məscidinin “bərpa edilməsi” altında Ermənistanın hansı məkrli niyyətinin durduğunu qeyd olunanlar müstəvisində daha aydın görmək mümkündür. “Bu, Ermənistanın onsuz da həssas olan regionda nə qədər təhlükəli oyun apardığını və dost ölkələrin arasını vurmaq kimi çirkin planlarının olduğunu göstərir.
“Azərbaycan Respublikası Dağlıq Qarabağ bölgəsinin azərbaycanlı icması” İctimai Birliyi Ermənistanın bu hərəkətlərinin qarşısının alınması və mədəni-tarixi irsimizə qarşı həyata keçirilən bu qanunsuz vandal hərəkətlərinin pislənməsi məqsədilə Birləşmiş Millətlər Təşkilatının Elm, Təhsil və Mədəniyyət üzrə ixtisaslaşmış qurumu olan UNESCO, digər beynəlxalq təşkilatlar və dünya ictimaiyyətinə müraciət edir. Ermənistanın işğal edilmiş ərazilərimizdə apardığı vandalizm hərəkətlərinə göz yummaq beynəlxalq humanitar hüquq üzrə ölkələrin öz üzərinə götürdükləri öhdəliklərə zidd olmaqla yanaşı, ümumbəşəri mədəni irsə qarşı etinasız münasibət kimi anlaşılardı. Əgər dünya ictimaiyyəti qeyd olunanlar müqabilində səssizliyini davam etdirərsə, bəşəriyyətə məxsus mədəni-tarixi irsin daha kəskin formada dağıdılması üçün destruktiv qüvvələrə şərait yaratmış olacaq!” - deyə bildirilir.
“Ermənilər müvafiq beynəlxalq qanunların, konvensiyaların bəndlərini pozur, beynəlxalq ictimaiyyət isə reaksiya vermir”
“Qarabağa aparan yol” qəzetinin baş redaktoru, tanınmış şair-jurnalist, publisist Əli Mahmud “Bakı-Xəbər”ə bildirdi ki, ermənilər Şuşadakı Yuxarı Gövhər Ağa məscidində bir neçə il əvvəl də “restavrasiya işləri” aparıb. O qeyd etdi ki, onlar məscidin quruluşunu dəyşdirərək onu “fars məscidi” kimi qələmə verməyə çalışıblar. Bu gün Yuxarı Gövhər Ağa məscidində ermənilərin həyata keçirdiyi “təmir-bərpa işi”nin birmənalı olaraq təxribat olduğunu bildirən Ə.Mahmud hesab edir ki, onlar bununla Qarabağ danışıqlarına, eləcə də münaqişənin danışıqlar yolu ilə həllinə zərbə vururlar. Ermənilərin tarixən qeyri-humanist bir toplum olduğunu deyən Ə.Mahmudun sözlərinə görə, onlar Yuxarı Gövhər Ağa məscidinə əl uzatmaqla bir daha cinayətkar xislətlərini ortaya qoyurlar. “Ermənilərin işğal altında saxladıqları Dağlıq Qarabağda və ətraf rayonlarda abidələrimizə qarşı törətdikləri cinayətlər, saxtakarlıqlar ölçüyəgəlməzdir. Onların məqsədi, əslində, Yuxarı Gövhər Ağa məscidini “təmir-bərpa” etmək deyil, istəkləri bu məscidi tamamilə məhv etmək, yer üzündən silməkdir. Necə ki, onlar bunu digər abidələrimizə qarşı ediblər. Onlar “təmir-bərpa” adı ilə özlərini elə göstərirlər ki, guya bunlar çox humanist xalqdır və başqa xalqların mədəniyyət abidələrinə “qayğı” ilə yanaşırlar. Əslində isə onlar bununla öz yırtıcılıq xasiyyətlərini bir daha ortaya qoyurlar. Yuxarı Gövhər Ağa məscidi Şuşanın incilərindən biridir və bu abidənin konkret tarixi var. Ermənilər bizim abidələrimizə qarşı nə qədər saxtalaşdırma kampaniyası həyata keçirsələr də, heç nəyə nail ola bilməyəcəklər. Çünki bizim izimizi itirə bilməyəcəklər. O torpağın əbədi və əzəli sahibi Azərbaycan xalqıdır. Ermənilərin Gövhər Ağa məscidində “təmir-bərpa işləri” aparması qanunsuzdur və bu məsələyə aidiyyəti beynəlxalq qurumlar reaksiya verməlidirlər. Ermənilər müvafiq beynəlxalq qanunların, konvensiyaların bəndlərini pozur, beynəlxalq ictimaiyyət isə reaksiya vermir.
Hesab edirəm ki, ermənilər Yuxarı Gövhər Ağa məscidində saxta “təmir-bərpa işi” aparmaqla bizi qıcıqlandırmaq, sülh danışıqlarını pozmaq niyyəti güdürlər. Ona görə də bu təxribata əl atırlar. Qarabağda, nə də ətraf rayonlarda ermənilərə aid heç bir abidə yoxdur. Ermənilərin nə tarixi, nə mədəniyyəti, nə vətəni, nə torpağı, nə də abidəsi var. Onların özlərinin belə bir məsəli var: “Çörək hardadırsa, vətən də ordadır”. Bu da onu göstərir ki, ermənilərdə vətən anlayışı, vətən sevigisi, vətənpərvərlik hissləri yoxdur. Bizim bir misalımız var, babalarımız onu ermənilər haqqında deyiblər: “Ermənilər it qumu kimi bütün dünyaya səpələniblər”. Bu baxımdan, onların Dağlıq Qarabağı tərk edəcəyi şübhəsizdir. Çünki ora onların torpağı deyil. Sabah başqa yerdə çörək olsa, ermənilər ora qaçacaqlar. Bilirsiniz ki, bu gün ermənilər dünyanın başağrısına çevriliblər. Ruslar da, ingilislər də, başqa xalqlar da onların həyata keçirdikləri terrora məruz qalıblar”.
Ə.Mahmudun sözlərinə görə, dünya özü ermənilərdən xilas olmaq üçün çarə axtarır. Onun qeyd etdiyinə görə, ermənilərin işğal etdikləri Azərbaycan torpaqlarındakı özbaşınalıqları uzun sürməyəcək və gec-tez şanlı ordumuz onları torpaqlarımızdan çıxaracaq.
İradə SARIYEVA
