Məlum olduğu kimi, 28 may - Respublika Günü ilə əlaqədar olaraq bir sıra dövlət başçıları, o cümlədən, ABŞ Prezidenti dövlət başçısı İlham Əliyevə təbrik məktubu ünvanlayıb.
Tramp ölkə başçısına ünvanladığı məktubda iki dövlət arasında bir çox ortaq maraqlar üzərində qurulmuş güclü tərəfdaşlıq əlaqələrinin mövcud olduğunu bildirib: “Azərbaycanın beynəlxalq təhlükəsizliyə verdiyi töhfələri və “Cənub Qaz Dəhlizi” təşəbbüsünü irəli sürməklə Avropanın enerji təhlükəsizliyinin gücləndirilməsində Sizin liderliyinizi dəyərləndirirəm. Azərbaycanda islahatlar istiqamətində, xüsusilə də qanunun aliliyi sahəsində Azərbaycan xalqının mənafeyinə xidmət edəcək və əməkdaşlığımızın dərinləşməsi üçün imkanlar yaradacaq bütün addımları alqışlayırıq”.
Ən başlıca məqamlardan biri də Dağlıq Qarabağ münaqişəsinin həllində ölkə başçısının roluna verilən xüsusi önəmdir: “Dağlıq Qarabağ münaqişəsinin sülh yolu ilə və dayanıqlı həlli istiqamətində ATƏT-in Minsk Qrupu prosesində Sizin şəxsi iştirakınızı təqdir edirik”.
Bununla Tramp Azərbaycanın xarici siyasətinin çox mühüm bir məqamına işarə verir. Məsələ ondan ibarətdir ki, Azərbaycan rəhbərliyi balanslaşma siyasətini ancaq milli maraqlar üzərində qurur. Bu mövqedən baxdıqda, ölkənin xarici dövlətlərlə əməkdaşlığı ilə Dağlıq Qarabağ münaqişəsinin həllində ədalətli mövqe tutmaq arasında sıx bağlılıq görünür. Xarici siyasətin bu iki komponenti bir-birini tamamlayır. Sevindiricidir ki, Amerika rəhbərliyi İlham Əliyevin siyasi kursunun bu aspektinə xüsusi önəm verir.
Bütün bu deyilənlərin fonunda, Trampın Dağlıq Qarabağ məsələsinin həllində Prezident İlham Əliyevin şəxsi iştirakına xüsusi önəm verməsi nə ilə bağlıdır? Bunun arxasında nə dayanır?
Mübariz Əhmədoğlu: “Əslində, Trampın bu mövqeyi yaxın perspektivdə Vaşinqtonda nəzərdə tutulan Qarabağ danışıqlarına hazırlıqla bağlı bir diplomatik jestdir”
Məsələyə münasibət bildirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun fikrincə, bu, ABŞ-da keçirilməsi gözlənilən Qarabağ danışıqlarına bir işarədir: “Bu onu göstərir ki, İlham Əliyevin Dağlıq Qarabağ münaqişəsinin həllində roluna xüsusi önəm verilir. Trampın bunu xüsusi qeyd etməsi təsadüfi deyil. Ötən il də Tramp Qarabağla bağlı bəyanat verdi. Bu dəfə bəzi məsələlərdə sanki mövqeyi bir qədər yumşalıb. Əslində, Trampın bu mövqeyi yaxın perspektivdə Vaşinqtonda nəzərdə tutulan Qarabağ danışıqlarına hazırlıqla bağlı bir diplomatik jestdir. Baxın, ötən il Tramp Dağlıq Qarabağ məsələsinə toxunandan sonra Birləşmiş Ştatlar tərəfindən bu istiqamətdə müəyyən səylər göstərildi. O vaxt ABŞ-ın Ermənistandakı səfiri Riçard Mills bəyanat verdi ki, ərazilər qaytarılmadan münaqişəni tənzimləmək mümkün deyil. Yəni, ən azından, Dağlıq Qarabağ ətrafında 7 rayonu qaytarın. Ondan sonra Con Boltonun regiona səfəri başladı. Bolton bildirdi ki, müstəqil siyasət aparmaq istəyirsinizsə, o zaman Qarabağ məsələsini həll edin. Ondan sonra digər ABŞ rəsmisi Kent Ermənistana səfər etdi. O da bənzər açıqlama ilə çıxış etdi. Ərazi bütövlüyünə xüsusi önəm verdi. ABŞ-ın Ermənistanda yeni səfiri bu günlərdə bəyan etdi ki, Dağlıq Qarabağ məsələsində müəyyən irəliləyişlər gözlənir. Fikrimcə, qarşıdakı ayda Qarabağ danışıqları ilə bağlı Vaşinqtonda təmaslar olacaq. Sözügedən fikirlərin arxasında bu niyyət də var”.
Vidadi ORDAHALLI
