Bu günlərdə İrəvanda keçirilən mitinqdə Ermənistanın eks-prezidenti Robert Köçəryanın tərəfdarları, o cümlədən, Dağlıq Qarabağın qondarma “prezidenti” hədələnib.
Ermənistan KİV-inin verdiyi məlumata görə, İrəvanın Azadlıq meydanında Nikol Paşinyanın bir neçə min tərəfdarı toplanıb. Onlar Paşinyanın məhkəmə sistemində islahatlara dair təşəbbüsünə dəstək veriblər. Mitinq İrəvanın mərkəzi küçələrində yürüşlə yekunlaşıb.
Aksiyanın təşkilatçılarından biri olan Civan Abramyan deyib ki, məhkəmə sistemində islahatlar korrupsioner məmurları yerində oturdacaq. Onun sözlərinə görə, hazırkı məhkəmə sistemi keçmiş rejimdən asılıdır və siyasi sifarişləri yerinə yetirir.
C.Abramyan çıxışında R.Köçəryana dəstək verdiyi üçün Dağlıq Qarabağın qondarma “prezidenti” Bako Saakyanın və digərlərinin “başını daşla əzmək” barədə danışıb. O deyib ki, insanları Köçəryanın tərəfdarlarının, B.Saakyan da daxil olmaqla, başını daşla əzməyə çağıra bilərlər.
Saakyanın “xüsusi işlər üzrə köməkçisi” Arşavir Qaramyan C.Abramyanın çıxışının videosunu sosial şəbəkədə paylaşaraq buna “hüquqi qiymət verilməsinə” çağırıb.
Məlumatlara görə, Köçəryanın əleyhdarlarının mitinqi zamanı para.tv internet kanalının jurnalisti bıçaqlanıb. Bu insidentin təfərrüatları məlum deyil.
Ermənistan polisi mayın 25-də İrəvandakı mitinqdə çıxışı zamanı Dağlıq Qarabağın qondarma “prezidenti” B.Saakyanın başını daşla əzməyə çağıran C.Abramyan barədə təhqiqat başladıb. Erməni KİV-i xəbər verir ki, Abramyan çıxışı ilə bağlı polisə aparılıb və ifadəsi alınıb. Artıq bu fakt sübut edirmi ki, Ermənistanda qondarma rejimlə İrəvan arasındakı ziddiyyətlər öz kulminasiyasına çatıb?
Elşən Mustafayev: “Onlarda parlamenti də gülləbaran edərək vəzifəli insanları öldürüblər, prezidentliyə namizədləri belə güllələyiblər”
Azərbaycan Milli İstiqlal Partiyasının funksioneri Elşən Mustafayev qəzetimizə bildirdi ki, bu ziddiyyət mövcud idi, ancaq Köçəryanın həbsdən azad edilməsindən sonra daha da dərinləşdi və açıq müstəviyə qədəm qoydu: “Bəllidir ki, eks-prezidentin həbsdən azad edilməsi barədə qərarla razılaşmayan Baş nazir N.Paşinyan hüquq-mühafizə orqanlarını qəti və radikal addımlar atmağa məcbur etmək istədi. Paşinyanın təzyiqləri altında Ermənistan Ali Məhkəmə Şurasının sədri Qagik Arutyunyan istefaya getdi. R.Köçəryan azad edildiyinə görə N.Paşinyan xalqı məhkəmələrin girişlərini tutmağa səsləmişdi. Bundan sonra tanınmamış “DQR” “generalitetinin” nümayəndələri və Ermənistan oliqarxları Paşinyanın vəzifəsindən devrilməsi məqsədilə sui-qəsd məsələsini müzakirə etdikləri haqda məlumat yayıldı. Ermənistanın rəsmi dairələri bunu təsdiq etdilər. Hətta vəziyyət o yerə çatdı ki, Paşinyan Dağlıq Qarabağ ərazisində xidmət edən oğlunu İrəvana köçürməli oldu. Ermənistanda keçirilən son mitinqdə səslənən şüarlardan da görünür ki, tərəflər arasında demokratik mübarizənin aparılacağından söhbət belə gedə bilməz. Göründüyü kimi, rəqiblər bir-birinin başını əzəcəyi, öldürəcəyi ilə hədələyirlər. Ermənistan üçün bu, xarakterik haldır. Çünki onlarda parlamenti də gülləbaran edərək vəzifəli insanları öldürüblər, prezidentliyə namizədləri belə güllələyiblər. Hazırda isə qondarma qurumla Ermənistanın yeni rəhbərliyi arasında bu vəziyyət yaşanır. Bu vəziyyətin gələcəyi barədə yalnız onu demək olar ki, vətəndaş müharibəsi qaçılmazdır. Bütün göstəricilər ona aparır. Yəqin ki, Paşinyana öz baş nazirlik dönəmini sona qədər başa vurmağa imkan verməyəcəklər”.
Məhəmmədəli QƏRİBLİ
