Bütün təxribatlara baxmayaraq, artıq Bakının evsahibliyi edəcəyi möhtəşəm final oyununa az vaxt qalıb. Arxaya baxanda isə biz şahidi oluruq ki, ermənilər öz məkrli siyasətlərini futbola da qata bildilər. Finalçıların birinin tərkibində forma geyinən erməni əsilli, Mxitaryan adlı futbolçunun göstərdiyi şouda isə siyasi niyyət və çalarlar üzə çıxmış oldu.
Artıq Britaniyanın “The Daily Star” qəzeti də bu barədə yazıb. Nəşrin “Arsenal”ın erməni əsilli yarımmüdafiəçisi Henrix Mxitaryanla bağlı yaydığı məlumatda deyilir ki, “Arsenal” onunla bu yay vidalaşmaq fikrindədir. 30 yaşlı oyunçu ola bilər ki, bundan sonra sadəcə bir dəfə “Arsenal”ın heyətində yaşıl meydana çıxsın. Qəzet bildirir ki, H.Mxitaryan İngiltərə premyer liqasında daha əvvəlki oyun məharətini göstərmək gücündə deyil.
Bir vaxtlar Almaniyanın “Borussia Dortmund” klubunun ulduz oyunçusu olmuş erməni əsilli futbolçunu satın almaq üçün “Manchester United” 30 milyon avrodan keçmişdi.
Göründüyü kimi, Britaniya mətbuatı da birmənalı şəkildə yazır ki, H.Mxitaryan “Arsenal” üçün xüsusi önəm daşıyan oyunçu deyil. Əksinə, baş məşqçi onun oyunundan narazıdır və klub onunla mümkün qədər tez vidalaşmaq fikrindədir.
Araşdırmalar nəticəsində, həmçinin, məlum olub ki, H.Mxitaryan 3 dəfə Dağlıq Qarabağda olub. Xankəndidə Qarabağ savaşında həyatını itirmiş hərbçilərin ailə üzvləri ilə görüşüb və onlara müxtəlif hədiyyələr paylayıb. Ona “Dağlıq Qarabağ Respublikası” adından “baş nazirin” “medalı” təqdim olunub.
Bütün bu faktlar bir daha sübut edir ki, Mxitaryanın göstərdiyi şounun bütün detalları cəmiyyət üçün aydınlaşıb. Məlum olub ki, həmin şəxsin addımları təhlükəsizliklə deyil, birbaşa siyasətlə bağlı olub.
Amal Abuşov: “Erməni oyunu “Arsenal”ın imicini ciddi zədələmiş oldu”
Futbol şərhçisi Amal Abuşov “Bakı-Xəbər”ə açıqlamasında bildirdi ki, artıq bu məsələ bütün Avropa mətbuatının diqqət mərkəzindədir: “Deyilən mövzuda, demək olar ki, hər gün yazılar yazılır. Mənə elə gəlir ki, “Arsenal” bu mövzudan xal qazanmağı düşünürdü. Oyundan əvvəl yaratdığı şou ilə özünü əzilmiş, döyülmüş, haqları pozulmuş bir imic formalaşdırmağa çalışırdılar. Ancaq deyilən məsələ əks təsir yaratdı. Azərbaycan dövlət səviyyəsində erməni futbolçunun təhlükəsizliyinə təminat verdi. Eyni zamanda, bütün resursları ilə bu bəhanəni ifşa edə bildi. Hətta nazirimiz Azad Rəhimov bildirdi ki, bəlkə Mxitaryanın dalınca F-16 təyyərələrini göndərək. Söhbət sözsüz ki, Mxitaryan kartından getmirdi. Adam onsuz da son turlarda heç əsas heyətə belə düşə bilmirdi. Yəni hamı gördü ki, “Arsenal” onun oynamasını zəruri saysaydı, mütləq mənada, Bakıya gətirə bilərdi. Məsələnin ikinci tərəfi isə Mxitaryanın separatçılara dəstək verməsi ilə bağlıdır. Bu fakt da öz təsdiqini tapmış oldu. Göründü ki, bu, sıradan bir futbolçu deyil. Yəni işinin adı yalnız futbol olmayıb. Azərbaycan təbliğat vasitələrinin köməyi ilə sübut etdi ki, Mxitaryan siyasiləşmiş və separatizmə dəstək verən idmançıdır. Düşünürəm ki, bütün bu faktorlar “Arsenal”ın imicinə mənfi təsir etdi. Bütün bəhanələrin cavabı tutarlı arqumentlərlə verildi. Göründü ki, məsələ heç də onların dediyi səviyyədə deyil. “Arsenal”, həmçinin, yerli publikanın dəstəyindən də tam məhrum oldu. Əminəm ki, bizim azarkeşlərin böyük əksəriyyəti məhz bu amilə görə “Çelsi”yə dəstək verəcək. “Arsenal”ın artıq Mxitaryanı transferə çıxaracağı ilə bağlı fikirlər səslənir. “Arsenal” bunu qeyri-məhsuldar oyunçunun transfer qiymətini qaldırmaq üçün edibsə belə, bu, ucuz şoudan başqa nəsə deyil. İstənilən halda, erməni oyunu “Arsenal”ın imicini ciddi zədələmiş oldu”.
Məhəmmədəli QƏRİBLİ
