Gürcüstanın Marneuli rayonunda bir qrup keşiş və dindar Azərbaycana gedən əsas magistral yolda aksiya keçiriblər. Aksiya iştirakçıları “Qırmızı körpü” sərhəd-keçid məntəqəsinə gedən yolu bir neçə dəqiqəlik bağlayıblar. Nəticədə yolda avtomobillərin hərəkətində məhdudiyyət yaranıb. Marneuli və Xucabi yeparxiyasının təşkil etdiyi aksiya “David Qareci (Keşikçi dağ Məbəd Kompleksi – red.) Gürcüstanındır” şüarı ilə keçirilib.
İştirakçılar bildiriblər ki, aksiya xəbərdarlıq xarakteri daşıyır. Onlar Gürcüstan hökumətini məbəd kompleksi ətrafında yaranmış problemi həll etməyə çağırıblar. Maraqlıdır ki, Gürcüstanın rəsmi dairələri prosesi nizama salmağa çalışdığı halda, bir qrup dindar vəziyyəti gərginləşdirməkdə davam edir.
Bir gün əvvəl isə xarici işlər naziri David Zalkaliani ictimaiyyəti sərhədin delimitasiyası üzrə işçi komissiyanın nəticələrini gözləməyə çağırmışdı: "İnformasiya (yolla bağlı) komissiya çərçivəsində yenidən yoxlanılır. Bir daha hamını emosional bəyanatlardan çəkinməyə çağırmaq istəyirəm. Əgər kimsə düşünürsə ki, komissiya bizim dövlət maraqlarımızı nəzərə almayaraq qərar qəbul edəcək, çox səhv edir. Biz dövlət maraqlarımızdan və bizi bağlayan strateji münasibətlərdən çıxış edəcəyik".
Gürcüstanın Baş naziri Mamuka Baxtadze də bəyanatla çıxış edib və xüsusi vurğulayıb ki, monastır problemi üzrə heç bir pərdəarxası saziş olmayacaq.
Azərbaycanla strateji və dostluq əlaqələrini xatırladaraq, Gürcüstan hökumətinin rəhbəri aqressiv ifadələrin müəlliflərini cəmiyyətin duyğuları ilə oynamamağa, populist və siyasi cəhətdən düzgün olmayan bəyanatlar verməkdən çəkinməyə çağırıb.
“Keşikçi dağ” ətrafında vəziyyət təxminən iki həftə əvvəl gərginləşib. O vaxt Gürcüstan tərəfinin bəzi nümayəndələri bildirdilər ki, Azərbaycan sərhədçiləri öz ərazilərində olan mağara kompleksinin dini obyektlərinə keçidi məhdudlaşdırıblar.
Azərbaycan Xarici İşlər Nazirliyinin mətbuat katibi Leyla Abdullayeva həmin informasiyanı şərh edərkən bildirmişdi ki, rəsmi Bakı həmişə Azərbaycan-Gürcüstan sərhədinin tezliklə delimitasiya olunmasının tərəfdarı olub: “Azərbaycanla Gürcüstan arasında dövlət sərhədinin delimitasiyası, beynəlxalq təcrübədə tətbiq edilən qaydalara uyğun olaraq, qarşılıqlı əlaqələndirmə proseduraları əsasında mövcud ikitərəfli formatlar çərçivəsində həll olunur. Azərbaycan həmişə Azərbaycan-Gürcüstan sərhədinin tezliklə delimitasiya olunmasının tərəfdarı olub. Azərbaycan bu prosesi ən qısa müddət ərzində başa çatdırmağa hazırdır".
Qeyd edək ki, , Gürcüstan pravoslav kilsəsi də bəyanatla çıxış edərək, danışıqların mümkün mənfi nəticələrinə etinasızlıq göstərməməyə və monastır kompleksinin bir hissəsinə nəzarətin Bakıda qalması ilə barışmamağa çağırıb. Rəsmilərin sakit anlaşa bildiyi bu mövzuda gürcü keşişlərinin bu radikallığını necə anlamaq olar?
Tural İrfan: “Gürcülər keşişləri qabağa veriblərsə, bizim şeyx də gürcülərin vaxtilə talayıb apardıqları Gəncə qapısını tələb etməlidir”
İlahiyyatçı Tural İrfan “Bakı-Xəbər”ə açıqlamasında bildirdi ki, gürcü dindarlarını prosesə qoşmaqda maraqlı olan qüvvələr var: “Sözügedən “Keşikçi dağ” məbədi ətrafındakı mübahisəyə görə gürcü keşişlər Borçalıdan Gəncəbasara gələn yolu bağlayaraq etiraz ediblər. Görünən odur ki, bu keşişləri Gürcüstanın məhz yeni rəhbərliyinin dövründə qızışdıranlar var. Çeçen-Azərbaycan süni münaqişəsində olduğu kimi, hesab edirəm ki, bu işdə də erməni barmağı var. Hər bir halda bu məsələ ilə Xarici İşlər Nazirliyimiz və keşişlər işə qarışdıqları üçün Qafqaz Müsəlmanları İdarəsi məşğul olmalıdır. “Keşikçi dağ” məbədi qədim alban abidəsidir. Orada hər kəsin ibadət etməsi azaddır. Əslində, orada dini ibadət sarıdan bir problem yoxdur. Məlum olduğu kimi, xalqımızın indiki dini xristian olmadığı üçün, orada ibadət üçün gedənlərimiz yox dərəcəsindədir. Ora ibadət üçün yalnız gürcülər gəlirlər. Yəni bu o deməkdir ki, orada dini ibadət problemi yoxdur. Məbədin kimə aid olub-olmamasının ibadət etmək üçün heç bir önəmi yoxdur. Ancaq keşişlərin buna rəğmən, qarşıdurma yaratma cəhdləri onu göstərir ki, onları qızışdırıb körükləyənlər var. Əgər problem ərazi üstündədirsə, ərazi məsələlərini dindarlar-keşişlər yox, siyasilər həll edir. Gürcüstan teokratik dövlət deyil ki, onun problemlərini keşişlər həll etsinlər. Burada süni münaqişə yaratmaq istəyənlərin haradan idarə olunduğu müəyyən edilməlidir. Uzun illərdir yada düşməyən bir iddianı qəfildən ortaya atıb alovlandırmaq heç də beş-üç keşişin kilsə iddiasına bənzəmir. Hər bir halda, Gürcüstan hakimiyyəti ilə danışıqlar aparılmalı, məsələ dərinləşmədən həll edilməlidir. Gürcülər keşişləri qabağa veriblərsə, bizim şeyx də gürcülərin vaxtilə talayıb apardıqları Gəncə qapısını tələb etməlidir. Madam ki, onlar məsələni dindarların əli ilə qabardırlar, Qafqaz Müsəlmanları İdarəsi də Qafqaz müsəlmanlarını məsələyə cəlb etməlidir. Çünki mən əminəm ki, bu işi alovlandıran erməni barmağıdır. Məhz o barmağı tapıb sındırmaq lazımdır”.
Məhəmmədəli QƏRİBLİ
