Məlum olduğu kimi, ABŞ Prezidenti Donald Tramp 28 May - Respublika Günü münasibətilə Prezident İlham Əliyevə təbrik məktubu göndərib. Məktubda bir sıra önəmli məqamlara toxunulub.
Qeyd olunub ki, iki dövlət arasında bir çox ortaq maraqlar üzərində qurulmuş güclü tərəfdaşlıq mövcuddur. Azərbaycanın beynəlxalq təhlükəsizliyə verdiyi töhfələrdə, Avropanın enerji təhlükəsizliyinin gücləndirilməsində Prezident İlham Əliyevin rolu, eyni zamanda, Azərbaycanda islahatların aparılması yüksək qiymətləndirilib.
Bütün bunlardan məyus olan erməni mətbuatı isə Trampın məktubunu başqa istiqamətdə yozmağa çalışır. Onlar iddia edirlər ki, guya Tramp Gürcüstan Prezidentinə göndərdiyi məktubunda ölkənin suverenliyi və ərazi bütövlüyünün qeyd-şərtsiz dəstəkləndiyini xüsusi vurğulayıb. Azərbaycana gəldikdə isə guya ölkəmizin ancaq Avropanın enerji təhlükəsizliyinin təmin edilməsində əhəmiyyəti qeyd olunub, digər məsələlərə isə toxunulmayıb. Bildirilir ki, Trampın təbrik məktubunda Azərbaycanın rolu və yeri yalnız enerji layihələrindən ibarətdir.
Əvvəla ABŞ Azərbaycanın ərazi bütövlüyünü dəstəklədiyini dəfələrlə rəsmi səviyyədə bəyan edib. Bununla bağlı Birləşmiş Ştatların mövqeyi birmənalıdır. Tramp prezident olandan sonra da ABŞ-ın bu istiqamətdə mövqeyi əvvəlki kimi qalıb. Digər tərəfdən, Respublika Günü ilə bağlı təbrikdə ərazi bütövlüyünün qabardılmasına ehtiyac yoxdur. Çünki sözügedən məsələyə təbrik məktubunda yer vermək uyğun gəlmir. O baxımdan, erməni mətbuatının yanaşması və müqayisəsi uğursuzdur.
Maraqlıdır, bəs ekspertlər bunu necə dəyərləndirirlər?
Fikrət Sadıqov: “Ona görə də erməni mətbuatının bununla bağlı spekulyasiyaları nəyəsə yaramayacaq”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, erməni mətbuatının məlum yanaşması yalan və uğursuz müqayisə üzərində qurulub: “Onların bu yanaşması tamamilə yalan üzərində qurulub. Sadəcə, bununla bizə qarşı yeni kampaniya təşkil etmək istəyirlər. Sözügedən təbrik məktubunda Tramp bir çox məqamlara toxunub. O cümlədən, ABŞ-Azərbaycan partnyorluq münasibətləri yüksək qiymətləndirilib. Görünür, erməni mətbuatı bütün bunlardan çox narahatdır. Çünki Trampın son məktubu kifayət qədər Azərbaycanın maraqlarına cavab verir. Bu ona işarə edir ki, ABŞ Azərbaycanın həm Cənubi Qafqazda, həm də beynəlxalq münasibətlər sistemində rolunu və yerini çox yüksək qiymətləndirir. Ona görə ki, bütün vacib aktual məqamlar həmin məktubda öz əksini tapıb. Birləşmiş Ştatlar Azərbaycanın regiondakı strateji önəminin fərqindədir və bunu dəyərləndirir. Bununla bağlı çoxsaylı arqument səsləndirmək olar. Ermənilər də bütün bunlardan narahatdırlar. Ona görə də hər vasitə ilə buna kölgə salmağa çalışırlar. Birləşmiş Ştatların Azərbaycanın ərazi bütövlüyünə verdiyi dəstək birmənalıdır. Bundan ötrü hər dəfə ABŞ-ın xüsusi bəyanatla çıxış etməsinə ehtiyac yoxdur. Erməni mətbuatının bununla bağlı spekulyasiyaları nəyəsə yaramayacaq”.
Vidadi ORDAHALLI
