20/06/2019 05:46
728 x 90

Aprel məğlubiyyəti Ermənistanda rəsmən etiraf olundu, etiraf və araşdırmaların siyasi hədəfləri...

“Bütün bunlar siyasi məqsədlərə hesablanıb”

img

Məlum olduğu kimi, 2016-cı ilin aprelində Qarabağda gedən dördgünlük müharibə ilə bağlı bütün xüsusatları araşdırmaq üçün Ermənistanda parlament istintaq komissiyası qurulacaq. Artıq bununla bağlı qərar verilib.

Baş nazir Nikol Paşinyanın sözlərinə görə, 2016-cı ilin aprel döyüşlərinin detallarının araşdırılması üzrə erməni parlamentinin istintaq komissiyasının yaradılması və hamını narahat edən bir sıra məsələlərə aydınlıq gətirilməsinin zamanı çatıb.

Məlumat üçün qeyd edək ki, 2016-cı il aprelin əvvəllərində baş verən döyüşlərdən sonra Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi, Goranboy rayonunun Gülüstan kəndi və Tərtər rayonunun Madagiz kəndi istiqamətində bəzi mövqelər düşməndən azad olunub. Erməni silahlı qüvvələri bu döyüşlərdə 320-dən artıq hərbçisini itirib və 500-dən artıq hərbi qulluqçusu isə yaralanıb. Qarşı tərəfin 30-dək tankı və digər zirehli texnikası, 25-dən artıq artilleriya qurğusu sıradan çıxarılıb.

O da məlumdur ki, ermənilər uzun müddət aprel məğlubiyyətini inkar etməyə çalışıblar. Hər vasitə ilə bu döyüşlərdə Azərbaycanın əldə etdiyi uğurları kiçiltməyə cəhd ediblər. Ancaq bununla bağlı Ermənistanda parlament komissiyasının yaradılması göstərdi ki, erməni tərəfi aprel məğlubiyyətini etiraf etdi. O səbəbdən bu məğlubiyyətin səbəblərinin araşdırılmasına qərar verildi. Bütün bunlar, faktiki olaraq, Ermənistanın aprel döyüşlərində uğradığı məğlubiyyəti rəsmən etiraf etməsi deməkdir.

Bütün bunların fonunda, aprel məğlubiyyətinin Ermənistan tərəfindən etiraf edilməsinin və bununla bağlı araşdırmaların aparılmasının arxasında hansı siyasi hədəflər, niyyətlər dayanır?

  • Ramil Hüseynov: “Paşinyanın aprel döyüşlərini araşdırmaqda başlıca məqsədi “Qarabağ klanı”nı təmsil edən qüvvələri sıradan çıxarmaqdır”

Məsələyə münasibət bildirən VİP-in sədr müavini Ramil Hüseynovun sözlərinə görə, bütün bunlarda başlıca hədəf baş verənləri əvvəlki hakimiyyətin üstünə yıxmaq və bundan siyasi məqsədlər üçün istifadə etməkdir: “Çünki 2016-cı ilin aprelində döyüşlər başlayanda Ermənistanda hakimiyyətdə “Qarabağ klanı” idi. Uzun illər bu klan Ermənistan cəmiyyətinə belə bir rəy aşılayırdı ki, erməni ordusu məğlubedilməzdir. Aprel döyüşləri bu yöndə olan mifi dağıtdı. Məlum oldu ki, Ermənistan ordusu çox acınacaqlı durumdadır. Heç şübhəsiz ki, Rusiya mane olmasaydı, Azərbaycan sürətlə öz ərazilərini azad edərdi. Ancaq məlum səbəblərdən Rusiya buna imkan vermədi. Paşinyanın aprel döyüşlərini araşdırmaqda başlıca məqsədi “Qarabağ klanı”nı təmsil edən qüvvələri sıradan çıxarmaqdır.Yoxsa, o bu məsələnin üzərinə bu qədər getməzdi. Ermənistanda bununla bağlı yaradılan komissiya dövlət orqanlarına sorğular verə və zəruri informasiyaları toplaya biləcək. Bunların əsasında təhqiqat aparılıb yekun məruzə hazırlanacaq. Həmin məruzə əsasında sonrakı addımlar müəyyən ediləcək. İndidən təxmin etmək olar ki, Paşinyanın qurduğu bu komissiya “Qarabağ klanı”nın bir çox nümayəndəsinin, o cümlədən, Dağlıq Qarabağdakı rejimin “hərbi-siyasi rəhbərliyinin” xeyrinə olmayacaq. Qarabağdan Paşinyanı hədələyən, Köçəryanla Sarkisyanın komandasına daxil olan bəzi yüksək rütbəli hərbçilərin buna görə ordudan uzaqlaşdırılması ehtimalı var. Ona görə də bütün bunlar siyasi məqsədlərə hesablanıb”.

Vidadi ORDAHALLI

Son xəbərlər