Məlum olduğu kimi, Azərbaycanı istəməyən qüvvələr ölkəmizin evsahibliyi edəcəyi mühüm final yarışını pozmaq üçün əllərindən gələni edirlər. İndi də Avropa Liqasının final oyunu üçün ingilis klublarına ayrılan bilet kvotasının bir hissəsindən imtina etmək yolunu tutublar. Onların iddiasına görə, guya İngiltərədə həmin biletlərə tələbat az olub.
AFFA İngiltərənin "Arsenal" və "Çelsi" komandalarının Bakıdakı Avropa Liqasının final oyunu üçün biletlərdən imtina etməsinə dair iddialara aydınlıq gətirib. Qurumun Mətbuat və ictimaiyyətlə əlaqələr şöbəsinin müdiri Firuz Abdulla "Report"a açıqlamasında UEFA-nın verdiyi hərəyə 6000 biletdən "Çelsi"nin 3500-nü, "Arsenal"ın isə 4500-nü öz azarkeşlərinə satdığını söyləyib.
Federasiya rəsmisi bildirib ki, həlledici qarşılaşmaya vaxtın az qaldığını və Azərbaycanda biletlərə tələbatın çox olduğunu nəzərə alan AFFA UEFA-ya müraciət edərək qalan 4000 biletin Bakıda satılmasını istəyib: "Burada biletə tələbat çoxdur. Gün ərzində bununla bağlı yüzlərlə zəng qəbul edirik. Həmin 4000 bilet artıq Bakıya göndərilib və “iTicket”in kassalarında satışa çıxarılıb".
F.Abdulla, həmçinin, hər iki komandanı izləmək üçün Bakıya yetərincə fanatın gələcəyini söyləyib: "Klublara UEFA tərəfindən 6 min biletin verilməsi o demək deyil ki, hər biri üçün bu sayda da azarkeş gələcək. Bu, klublar üçün verilir ki, azarkeşlər bileti daha rahat əldə edə bilsinlər. "Arsenal" azarkeşlərinin həmin biletlərdən savayı bilet aldıqlarını heç kim inkar edə bilməz. Həmin sayda bilet ona görə ayrılır ki, bütün biletlər satılar və komandanın azarkeşinə qalmaz. Klubun azarkeşinin UEFA-nın saytı vasitəsilə də bilet əldə etmək imkanı var. Məcbur deyil ki, klubun satışa çıxardığından alsın".
Çox maraqlıdır ki, dünyanın istənilən nöqtəsində olan futbol yarışlarına böyük diqqət göstərən, gedib birbaşa oyunu canlı izləyən ingilis azarkeşlərinin “passivliyi” nəzərə çarpır. Belə iddialar da var ki, ayrılan bilet kvotasının hamısı qəsdən satılmayıb. Yəni hansısa qüvvələr biletlərin hamısının satılmasında maraqlı olmadıqları üçün, belə mənzərə yaranıb. Bu iddiaları nə dərəcədə əsaslı saymaq olar?
Kənan Məstəliyev: “Heç 6 min biletin satılmaması bir daha göstərdi ki, burada kənar barmaq olub”
Tanınmış futbol mütəxəssisi Kənan Məstəliyev “Bakı-Xəbərə açıqlamasında bildirdi ki, İngiltərənin daxilində Avropa Birliyi ilə “Brexit” məsələsinə görə ciddi problemlər yaşanır: “Bu hətta o səviyyəyə çatıb ki, həmin ölkənin Baş naziri Terreza Mey bu işin öhdəsindən gələ bilmədiyinə görə istefa vermək həddinə çatıb. Bu baxımdan da istənilən anti-Avropa mövqeyinə ölkə daxilində bir rəğbət var. Avroliqanın finalı da onlar üçün çox yaxşı fürsət oldu. Bununla onlar futbolu təşkil edən Avropa qurumlarını da pis vəziyyətə qoymaq istəyirlər. İngiltərə dövləti futbolu siyasiləşdirərək, xüsusilə də “Arsenal”ı özünə siyasi alət etməyi bacardı. Həmin klubun erməni əsilli oyunçusunu çox mahircəsinə öz təbliğatlarına rupor etdilər. Artıq hadisələrin gedişi göstərir ki, bütün bunlar sırf siyasi gedişlərdir. Bilet məsələsi də bunun tərkib hissəsidir. Çox absurddur ki, o qədər bilet satılmasın. Bütün detallar nəzərə alınandan sonra bilet sayı ingilis klublarına təqdim edilmişdi. Bunu hətta minimal saymaq olardı. UEFA düşünürdü ki, 6 min azarkeş ancaq gələ bilər. Bir müddət əvvəl hər bir ingilis komandası hərəsinə 10 min bilet istəyirdi. Hətta narazılıq edirdilər ki, hərəmizə 6 min çox azdır. Onlar real rəqəmi tələb edirdilər. Çünki öz azarkeşlərinin gücünə və imkanlarına bələddirlər. Heç 6 min biletin satılmaması bir daha göstərdi ki, burada kənar barmaq olub. Son illər Avropa futbolunda stadionun dolmasına böyük önəm verilir. Hətta belə razılıq vardı ki, 6 min satılandan sonra hər komadaya əlavə 4 min də ayrıla bilər. Bununla bağlı açıqlama da verilmişdi. Bu bir bəhanədir. Hesab edirəm ki, İngiltərə hakimiyyəti bu faktordan çox yaxşı istifadə edə bildi. Hiss olunur ki, bu hardasa idarə olunur. Çox heyif ki, idmanla siyasəti qatışdırıb belə neqativ durum yaratdılar. Amma hesab edirəm ki, narahatlığa əsas yoxdur. Çox yaxşı oyun keçəcək, stadion da tam dolacaq”.
Məhəmmədəli QƏRİBLİ
