21/11/2019 05:32
728 x 90

“Amnesty International” Azərbaycana münasibətdə hətta öz nizamnaməsinə də xəyanət edir - dini dözümlülük mühitinə lal sükut…

Əli Orucov: “Azərbaycan bir müsəlman ölkəsidir və bu qurum belə bir ölkədə mövcud olan dini dözümlülük mühiti haqqında müsbət rəy bildirmir”

img

“Azərbaycan uşaqlarının ermənilər tərəfindən qətlə yetirilməsinə və sair məsələlərə diqqət yetirməməklə o qurum həqiqətən də öz nizamnaməsinin tələblərini pozur”

 

Bir sıra beynəlxalq qurumlar var ki, onların ölkəmizə qarşı münasibəti elə də müsbət deyil. Bu qurumlar, bir qayda olaraq, ölkəmizlə bağlı beynəlxalq ictimaiyyətdə mənfi rəy formalaşdırmağa cəhd göstərirlər. Xüsusən ölkəmiz nüfuzlu beynəlxalq tədbirlərə, idman yarışmalarına evsahibliyi edərkən onlar bizə qarşı qara piar kampaniyasını bir qədər də genişləndirirlər.

Azərbaycana qarşı mütəmadi olaraq qara piar kampaniyası aparan “Amnesty International” təşkilatı həmişə öz hesabatlarında ölkəmizi tənqid edir. Respublikamızı insan haqlarının pozulduğu (?) ölkə kimi təqdim edir. Onu da qeyd edək ki, sözügedən təşkilat bu günlərdə UEFA Avropa Liqasının final qarşılaşmasının Azərbaycanda keçirilməsi ilə bağlı ölkəmiz əleyhinə bir sıra əsassız fikirlər də səsləndirməkdən çəkinməyib. Təşkilatın məlumatında ölkəmizdə insan haqlarının vəziyyətinin guya qənaətbəxş olmaması ilə bağlı fikirlərə yer verilib.

Ekspertlər qeyd edirlər ki, “Amnesty International” ölkəmizlə bağlı hər zaman qərəzli mövqe tutur. UEFA Avropa liqasının final oyunu ilə bağlı qurumun fikirləri də qərəzdən, qarayaxmadan başqa bir şey deyil. 

“Amnesty International” qurumunun nizamnaməsində yalnız insan haqları ilə bağlı bəndlər yer almır, onun nizamnaməsində dini dözümlülüklə də bağlı maddə var. Bu gün Azərbaycan dini dözümlülüyün, millətlərarası münasibətlərin ən yüksək səviyyədə təmin olunduğu bir ölkədir. Azərbaycanın bu sahədə nail olduğu uğurları, nədənsə, heç “Amnesty International” təşkilatı görmür, yaxud da görmək istəmir. Niyə öz hesabatlarında Azərbaycandakı sağlam dini dözümlülük mühiti haqqında bir kəlmə də olsun bəhs etmir? Ona görə etmir ki, o həqiqətən də dünyada sülh və əminamanlığın təmin edilməsinin tərəfdarı deyil. O “insan haqları” məsələsindən yalnız öz məqsədlərini həyata keçirmək üçün təzyiq vasitəsi kimi istifadə edir. “Amnesty International” təşkilatının nizamnaməsində uşaq və qadın hüquqlarının müdafiəsi, silahlı münaqişə zonalarında dinc əhalinin təhlükəsizliyinin qorunması və sair də əks olunub. Lakin bu təşkilat yalnız “insan haqları” məsələsini əlində bayraq edir, nizamnaməsində əks olunan heç bir maddənin tələbinə əhəmiyyət vermir. Bu qurum doğrudan da uşaqların, qadınların hüquqlarının müdafiəsinin təmin olunmasına çalışırsa, bəs onda nə üçün Ermənistanın Azərbaycanın dinc sakinlərini güllələməsinə, uşaqlarımızı öldürməsinə göz yumur?

İki il bundan əvvəl Füzuli rayonunun Alxanlı kəndinin ermənilər tərəfindən atəşə tutulması nəticəsində 2 yaşlı Quliyeva Zəhra Elnur qızı və onun nənəsi - 1965-ci il təvəllüdlü Quliyeva Sərvinaz İltifaq qızı həlak oldu. 2 yaşlı Zəhranı və onun nənəsini ermənilər qətlə yetiriblər. Həmin hadisə baş verən zaman “Amnesty International” susdu və bununla da kobud şəkildə öz nizamnaməsinin tələblərini pozdu. Xocalıda qətlə yetirilən 60-dan artıq Azərbaycan uşağının da ah-naləsi bu qurumu yerindən tərpədə bilmədi. İnsan hüquq və azadlıqlarının pozulmasından dəm vuran “Amnesty International” təşkilatı əgər belə təəssübkeş idisə, niyə bircə dəfə Azərbaycanın 1 milyon qaçqınının taleyini gündəmə gətirib, Ermənistanın işğalçılıq siyasətini pisləmədi? Əlbəttə, o bunları edə bilməzdi. Öz yaratdığı nizamnamənin qaydalarına xəyanət edən bir qurum Azərbaycan kimi ölkədə heç vaxt xoşniyyətli ola bilməzdi. O qurumun gözü inkişafı görmür.

  • “Azərbaycanla bağlı apardıqları qarayaxma kampaniyası faydasız olacaq”

AMİP təmsilçisi, politoloq Əli Orucov “Bakı-Xəbər”ə bildirdi ki, sözügedən qurumun ölkəmizə qarşı məlum mövqe sərgiləməsi yalnız qərəzlə bağlıdır. “Bu təşkilat zaman-zaman Azərbaycanla bağlı tənqidi fikirlər səsləndirib. Həm bu qurumun, həm də Azərbaycan əleyhinə fəaliyyət göstərən digər beynəlxalq təşkilatların məqsədi ölkəmizi gözdən salmaq, bizim haqqımızda mənfi rəy yaratmaqdır. Fikir verirsinizsə, hər dəfə ölkəmiz beynəlxalq tədbirlərə evsahibliyi etdiyi zaman “Amnesty International”, eləcə də başqa təşkilatlar aktivləşir və ölkəmiz haqqında xoşagəlməz fikirlər yayırlar. Azərbaycan UEFA Avropa Liqasının oyununa evsahibliyi etdiyi ərəfədə bu qurumun oyunun ölkəmizdə keçirilməsi əleyhinə fikirlər səsləndirməsi onun qərəzli mövqeyindən xəbər verir. “Avroviziya” yarışması Azərbaycanda keçirilərkən də bəzi qurumlar bizim haqqımızda mənfi fikirlər yaymağa başladılar və Azərbaycanda insan haqları ilə əlaqədar problemlər olduğunu gündəmə gətirdilər. Onlar hər zaman bizə qarşı qərəzli mözqe tuturlar, səbəb də odur ki, belə nüfuzlu yarışlar Azərbaycanda keçirilməsin. Hesab edirəm ki, “Amnesty International” və başqa beynəlxalq təşkilatların Azərbaycanla bağlı apardıqları qarayaxma kampaniyası faydasız olacaq. Çünki Azərbaycan UEFA Avropa Liqasının oyununa layiqincə evsahibliyi edəcək. Bu qurum həqiqətən də Azərbaycana qarşı tutduğu qərəzli mövqe ilə öz nizamnaməsinin bəndlərini pozur. Onlar heç zaman Azərbaycanın haqq işini müdafiə etmirlər. Azərbaycan bir müsəlman ölkəsidir və bu qurum belə bir ölkədə mövcud olan dini dözümlülük mühiti haqqında müsbət rəy bildirmir.

Azərbaycan uşaqlarının ermənilər tərəfindən qətlə yetirilməsinə və sair məsələlərə diqqət yetirməməklə o qurum həqiqətən də öz nizamnaməsinin tələblərini pozur. Onlar bununla beynəlxalq aləmin diqqətini çaşdırmağa, Azərbaycanı daha tünd rəngdə təqdim etməyə səy göstərirlər. Bu da təəssüf doğurur” - deyə bildirən Ə.Orucovun sözlərinə görə, bu gün Azərbaycanda sağlam dini mühit olsa da, dünyada belə deyil. Dünyada dinlər və sivilizasiyalararası kəskin mübarizə getdiyini qeyd edən Ə.Orucov dedi ki, bu hətta silahlı qarşıdurmaya da gətirib çıxarır. “Bu fonda biz özgə nə gözləyə bilərik ki…” - deyə müsahibimiz vurğuladı.

İradə SARIYEVA

Son xəbərlər