17/08/2019 15:31
728 x 90

Qarabağ problemi Ermənistanın inkişafına mane olmaya bilərmi – Sarkisyanın başadüşülən yalanı...

“Ermənistan Prezidentinin arqumentləri tamamilə cəfəngdir”

img

Məlum olduğu kimi, Qazaxıstanın Almatı şəhərində XVI Avrasiya Media Forumu başlayıb. Forumun Təşkilat Komitəsinin rəhbəri Qazaxıstan Parlamenti Senatının sədri Dariqa Nazarbayevadır. Forum çərçivəsində dünya siyasətinin və jurnalistikasının bir sıra problemləri müzakirə olunur. Tədbirə 60 ölkədən 600-dən çox nümayəndə, o cümlədən, siyasətçilər, iqtisadçılar, Nobel mükafatçıları, iş adamları və ekspertlər qatılıb.

Forumun ilk günündə Ermənistan Prezidenti Aram Sarkisyan çıxış edib. Sarkisyan öz çıxışında Qarabağ münaqişəsinin tənzimlənməsi məsələsinə də toxunub və ona verilən suala cavab verib ki, bu məsələ ilə Ermənistan tərəfdən ölkənin baş naziri və xarici işlər naziri, Azərbaycan tərəfdən isə Prezident və xarici işlər naziri məşğul olur, danışıqlar aparırlar, özü isə baş verənləri müşahidə edir.

Ən qəribəsi odur ki, Sarkisyanın fikrincə, guya Qarabağ münaqişəsi Ermənistanın inkişaf etməsinə mane olmur. Eyni zamanda, əlavə edib ki, Qarabağ münaqişəsi Ermənistanın inteqrasiya layihələrində iştirak etməsinə və beynəlxalq əməkdaşlıq platformasına çevrilməsinə də maneə deyil.

O da məlumdur ki, Dağlıq Qarabağ münaqişəsinin həll edilməməsi regionda əsasən Ermənistanın iqtisadi inkişafını tormozlayır. Ermənistanın işğalçılıq siyasəti üzündən bu ölkənin həmsərhəd olduğu dörd dövlətdən ikisi ilə sərhədləri bağlıdır. Ermənistan Cənubi Qafqazda bütün vacib enerji və nəqliyyat layihələrindən kənarda qalıb. Məhz Dağlıq Qarabağ münaqişəsinin həll edilməməsinə görə. Belə olan halda, A.Sarkisyanın səsləndirdiyi fikirlər nə dərəcədə doğrudur?

  • Fikrət Sadıqov: “Bu ölkə, praktiki olaraq, heç bir beynəlxalq əhəmiyyətli layihədə iştirak etmir”

Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Ermənistan Prezidentinin bununla bağlı səsləndirdiyi fikirlər reallıqdan uzaqdır: “Aram Sarkisyanın açıqlamasından belə çıxır ki, Ermənistan müxtəlif irimiqyaslı layihələrə qoşulub və bu ölkənin inkişaf səviyyəsi olduqca yüksəklərdədir. Belə çıxır ki, guya bu ölkənin inkişaf səviyyəsi artıq Avropa ölkələrin səviyyəsinə çatıb. Deməyim odur ki, Ermənistan Prezidentinin arqumentləri tamamilə cəfəngdir. Çox güman ki, Sarkisyanın bu fikirlərini dinləyənlər buna istehza ilə yanaşıblar. Ona görə ki, bu, reallıqdan uzaq fikirlərdir. O bu yanaşması ilə kimisə aldatmaq istəyirsə, hesab edirəm, bu alınan iş deyil. Çünki hamı hər şeyi dərk edir və başa düşür. Ermənilərin yeganə problemi ondan ibarətdir ki, onlar Qarabağ probleminin qurbanlarına çevriliblər. Münaqişənin həll edilməməsi onları dalana dirəyib. Ermənistan rəhbərliyi bu vəziyyətdən çıxmaq yollarını axtarmaq əvəzinə, müxtəlif real olmayan bəyanatlar verir. Bununla heç nəyə nail ola bilməyəcəklər. Ermənistanın hansı inkişafından danışmaq olar? Bu ölkə, praktiki olaraq, heç bir beynəlxalq əhəmiyyətli layihədə iştirak etmir. Ölkədə demoqrafik göstəricilər pisləşir. Doğulanların sayı azalır, ölkəni tərk edənlər içərisində cavanlar üstünlük təşkil edirlər. Belə olan halda, “Qarabağ münaqişəsi Ermənistanın inkişaf etməsinə mane olmur” demək tamamilə absurddur. Qarabağ münaqişəsi həll olunsaydı, o zaman Ermənistanın hansısa inkişafından danışmaq olardı”.

Vidadi ORDAHALLI

Son xəbərlər