23/09/2019 22:21
728 x 90

Paşinyanın açıq antiməhkəmə təqib siyasətinə AB-dən və AŞPA-dan iki fərqli münasibət - Bu həmin Yaqlanddır ki...

“Məsələyə dəyərlər prizmasından deyil, hansısa şəxsin fərdi münasibəti kontekstindən yanaşılır”

img

Məlum olduğu kimi, Ermənistanın eks-prezidentinin həbsdən buraxılması Paşinyanı ölkənin ədliyyə və məhkəmə sistemi ilə düşmənçilik həddinə gətirib. Baş nazirin iradəsi kənarında olan bu prosesə müdaxilə edə bilməyən Paşinyan çıxış yolunu xalqa müraciətdə görürdü. Tərəfdarlarını məhkəmələrin işinə mane olmağa səslədi. Özlüyündə antidemokratik olan həmin çağırışı sərt tənqid edənlər oldu. Maraqlıdır ki, daim demokratik dəyərlərin mühafizəsində dayanan tərəf kimi çıxış edən Avropadan isə Paşinyanın həmin addımına fərqli və ziddiyyətli münasibətlər sərgiləndi.

Avropa Parlamentində Ermənistanla əməkdaşlıq komissiyasının sədri Səddad Kərim  məhkəmələrin işini iflic edən çağırışı sərt tənqid edib və bunu azad məhkəmə hakimiyyətinin işinə kobud müdaxilə kimi dəyərləndirib. O bildirib ki, bu cür məsələləri həll etmək üçün ölkə rəhbərliyinin əlində kifayət qədər qanuni mexanizm var. Avropa rəsmisi bunun yolunu məhkəmə sistemində qanuni islahatların aparılması ilə izah edib.

Maraqlıdır ki, Avropa Şurasının baş katibi Torbyorn Yaqland isə məsələyə ənənəvi ermənipərəst mövqeyinə uyğun şəkildə yanaşıb. Onunla Paşinyan arasında olan telefon danışığı zamanı Yaqland Ermənistanda aparılan “islahatlara” dəstək verdiyini bildirib və qeyd edib ki, Avropa Şurasının ekspertləri bu istiqamətdə Ermənistana dəstək olmaq üçün həmin ölkəyə səfər edəcəklər. Qeyd edək ki, Yaqland öz fəaliyyəti ərzində ölkəmizə qarşı Avropa strukturlarında daim qərəzli mövqe sərgiləyən şəxs kimi tanınıb. Bu yaxınlarda isə onun Ermənistan barədə səsləndirdiyi fikir daha ciddi marağa səbəb olmuşdu. Avropa rəsmisi diktaturadan əziyyət çəkən ölkəni zəngin Avropa dəyərlərini mənimsəyən dövlət kimi xarakterizə edib.

Ermənistanda baş verən prosesə Avropadan sərgilənən iki fərqli münasibətin kökündə hansı amil dayanır?

  • Elşən Mustafayev: “Azərbaycanın həmin qurumdakı nümayəndə heyəti Yaqlandın bu biabırçı mövqeyini elə AŞPA-da müzakirəyə çıxarıb ondan izahat tələb etməlidir”

Politoloq Elşən Mustafayev qəzetimizə açıqlamasında bildirdi ki, Ermənistanda baş verənlərə qiymət vermək üçün ciddi araşdırmaya ehtiyac yoxdur: “Açıq şəkildə görünür ki, Yaqland yenə öz ermənipərəst mövqeyini qorumaqdadır. Paşinyanın məhkəmələrlə bağlı atdığı addım hüququn ayaqlar altına atılmasıdır. Söhbət Köçəryanın günahlı və ya günahsız olmasından getmir. Bu, başqa bir mövzunun söhbətidir. Hər halda, onu həbs edən də, azadlığa buraxan da Ermənistan məhkəməsi olub. Ermənistan qanunvericiliyinə görə, Baş nazir məhkəmələrin işinə müdaxilə edə bilməz. Onlar hakimiyyətin tamamilə başqa bir qoludur. Amma biz görürük ki, Paşinyan gücü çatmayan məhkəmələrin üstünə xalqı göndərir ki, onları linç etsinlər. Onun nüfuzu aşağı düşdüyü səbəbindən həmin çağırışa çox az adam getdi. Yoxsa orada bir çox hakimləri tapdalayıb məhv edəcəkdilər. Zatən, Paşinyanın istəyi də bu idi. Maraqlıdır ki, Yaqland bunu islahat adlandırır. Bu addım Avropa tərəfindən sərt tənqid edilməlidir. Çünki birbaşa onların müəyyən etdiyi dəyərlərlə təzad təşkil edir. Avropa Birliyi məsələyə obyektiv münasibət göstərib. Bu amil bir daha sübut edir ki, artıq Avropadakı institutların yanaşmasında da aşınma var. Məsələyə  dəyərlər prizmasından deyil, hansısa şəxsin fərdi münasibəti kontekstindən yanaşılır. Hesab edirəm ki, Azərbaycanın həmin qurumdakı nümayəndə heyəti Yaqlandın bu biabırçı mövqeyini elə AŞPA-da müzakirəyə çıxarıb ondan izahat tələb etməlidir”.

Məhəmmədəli QƏRİBLİ 

Son xəbərlər