22/08/2019 20:43
728 x 90

UEFA İK-nin tarixində Bakıda ilk iclas keçirmək qərarı – “siyasiləşdirilmiş futbol” kampaniyasına qarşı Azərbaycana dəstək jesti...

“Məlum qərar idmanı siyasiləşdirməyə çalışan erməni lobbisinə və anti-Azərbaycan qüvvələrinə bir tutarlı cavabdır”

img

Azərbaycanda kütləvi və ən çox sevilən idman növü olan futbolun zəngin tarixi və ənənələri var. Bakının “Neftçi”, Gəncənin “Dinamo” komandalarının qazandığı uğurlar futbol tariximizin şanlı səhifələridir. XX əsrdə Azərbaycanda dünya səviyyəli futbolçular, məşqçilər və hakimlər yetişib.

Müstəqillik əldə olunduqdan sonra müəyyən müddət ərzində futbol sahəsi çətinliklər yaşasa da, sonrakı mərhələ yenidən dirçəlməyə başladı. Həyata keçirilən tədbirlər nəticəsində futbolun infrastrukturu genişləndirildi, onun maddi-texniki bazası möhkəmləndirildi və digər məsələlər yoluna qoyuldu. Bütün bunların nəticəsidir ki, Azərbaycan klubları Avroliqada iştirak edir, bir sıra uğurlara imza atırlar. Məlum olduğu kimi, mayın 29-da Bakıda UEFA Avropa Liqasının final matçı keçiriləcək.

Bu sahədə görülən işlərin nəticəsidir ki, beynəlxalq futbol təşkilatlarının da Azərbaycana marağı artmaqdadır. Mayın 29-da tarixdə ilk dəfə UEFA İcraiyyə Komitəsinin iclası Bakıda təşkil olunacaq. İclasın gündəliyində 12 məsələ olacaq.

UEFA-nın belə bir mühüm tədbirini ilk dəfə olaraq Bakıda keçirməsi, bir növ, "Çelsi" və "Arsenal" oyununu siyasiləşdirməklə bağlı Qərbdəki bəzi dairələrə etiraz tədbiridir. O mənada ki, idmanı siyasiləşdirmək olmaz. Bundan siyasi məqsədlər üçün istifadə etmək doğru deyil.

O baxımdan, ekspertlər UEFA-nın bu qərarını necə dəyərləndirirlər?

  • Vüqar Rəhimzadə: “Azərbaycanın uğurlarını həzm edə bilməyən qüvvələrə göstərdi ki, idmanı siyasətə qatmaq ən böyük səhvdir”

Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, UEFA-nın məlum iclası ilk dəfə olaraq Bakıda keçirməsi idmanı siyasiləşdirənlərə tutarlı cavabdır: “Bunu siyasiləşdirməyə çalışan erməni lobbisinə və anti-Azərbaycan qüvvələrinə bir tutarlı cavabdır. Ən başlıcası isə, Bakıya olan etimadın nümunəsidir və keçiriləcək final oyununa verilən qiymətin dəyəridir. Hesab edirəm ki, UEFA İcraiyyə Komitəsinin ilk iclasının Bakıda keçirilməsi həm də Azərbaycana verilən yüksək qiymətin göstəricisidir. Azərbaycanın uğurlarını həzm edə bilməyən qüvvələrə göstərdi ki, idmanı siyasətə qatmaq ən böyük səhvdir. Bundan hansısa siyasi məqsədlər üçün istifadə etmək kökündən yanlışdır. Azərbaycan bütün beynəlxalq tədbirlərə yüksək səviyyədə evsahibliyi edib. Bu dəfə də belə olacaq. Avroliqanın finalı yüksək səviyyədə keçiriləcək. UEFA-nın tarixdə ilk dəfə olaraq iclasını Bakıda keçirməsi bütün mənalarda Azərbaycanın uğurudur. Bu, Qərbdəki bədxah qüvvələrə bir güclü zərbədir, o mənada ki, onların bütün arqumentləri puç oldu. Azərbaycan beynəlxalq idman yarışlarına, bu kimi tədbirlərə hər zaman hazır olduğunu bir daha sübut etdi. Ona görə də hesab edirəm ki, UEFA-nın bu qərarı bizim uğurumuzdur”.

Vidadi ORDAHALLI

Son xəbərlər