21/11/2019 12:29
728 x 90

Qondarma “DQR”də “vahid erməni dövlətinin tərkib hissəsi” olmaq üçün bəyanat imzalandı – separatçı rejim niyə narahatdır...

“Bütün bunlar Ermənistanda son vaxtlar iki klan arasında yaşanan qarşıdurmanın təzahürüdür”

img

İşğal altında olan Xankəndidə qondarma “DQR”də fəaliyyət göstərən “partiya” sədrləri bir araya gəliblər. Müzakirə mövzusu “miatsum” (birlik) və Qaradağdakı hakimiyyət dəyişikliyi olub.

Bununla bağlı müzakirələr aparıldıqdan sonra separatçılar bəyanat imzalayıblar. İmzaladıqları bəyanatda “vahid erməni dövlətinin tərkib hissəsi” olduqlarını təsdiq ediblər. Guya bu bəyanat “Artsax”ın və bütün Ermənistanın ümummilli məqsədinə və dövlətçiliyin təhlükəsizlyinə xidmət edir.

Bununla bağlı bəyanatı separatçı qurumda fəaliyyət göstərən qondarma siyasi “təşkilatlar” imzalayıblar. Bunlar “Müstəqil nəsil” “partiyası”, “Artsaxın oyanışı” “təşəbbüs qrupu”, "Respublikaçılar” “partiyası”, "Əfqanıstan müharibəsi veteranları birliyi”, "Perelom" “partiyasının təşəbbüs qrupu”, "Kimlik və birlik" “partiyası”, “Birləşmiş Ermənistan” “partiyası”, "Birləşmiş Ermənistan" “vətənpərvərlik birliyi”, “Sasna tsrer” “partiyası” olub. Həmçinin, qondarma qurumda fəaliyyət göstərən bəzi ictimai şəxslər bəyanatı imzalayıblar.

Zatən, ermənilər neçə ildir “miatsum” ideyasını həyata keçirmək uğrunda mübarizə aparırlar. Bu xəstə təfəkkürdən irəli gələrək bütün vasitələrə əl atırlar. Dənizdən-dənizə “Böyük Ermənistan” yaratmaq onların ən böyük arzusudur. Belə olan halda, separatçı qurumda “partiyaların” bir araya gəlib bəyanatla çıxış etməsi, ortada olan bu narahatlıq nə ilə bağlıdır?

  • Əli Orucov: “Ona görə də müxtəlif adlar altında tədbir keçirib bəyanatlar verirlər”

Məsələyə münasibət bildirən AMİP funksioneri Əli Orucovun fikrincə, bütün bunlar Ermənistanda son vaxtlar iki klan arasında yaşanan qarşıdurmanın təzahürüdür: “Ötən il Ermənistanda hakimiyyət dəyişikliyindən sonra, hazırkı hakimiyyətlə “Qarabağ klanı” arasında ziddiyyətlər daha da kəskinləşərək açıq müstəviyə keçib. Köcəryanın həbsdən buraxılmasından sonra tərəflər arasında mübarizə yeni müstəviyə keçir. “Qarabağ klanı” bütün rıçaqları işə salır ki, Paşinyanın hakimiyyəti zəifləsin. Əsasən belə rəy yaratmaq istəyirlər ki, guya Paşinyan danışıqlarda Azərbaycanın xeyrinə güzəştə getməyə hazırlaşır. Bunun ətrafında spekulyasiya yaradıb, bir növ, şou göstərirlər. Halbuki, reallıq ondan ibarətdir ki, Qarabağ məsələsində Paşinyan əvvəlki hakimiyyətdən daha radikaldır. Bunu ötən bir ildə açıq formada ortaya qoydu. Ancaq, dediyim kimi, iki klan arasında qarşıdurma dərinləşdiyi üçün, belə tədbirlər keçirməklə müəyyən fon yaradırlar. Başqa bir tərəfdən, Qarabağdakı separatçılar ehtiyat edirlər ki, qondarma qurumda müəyyən hərbçilər işdən uzaqlaşdırılacaq. Bu da indiki situasiyada onların maraqlarına uyğun deyil. Bu baxımdan, Ermənistanda aprel döyüşləri ilə bağlı parlament komissiyasının yaradılması separatçıları narahat edir. Hesab edirlər ki, proseslərin bu yöndə inkişafı onlar üçün yaxşı nəticələnməyəcək. Fikrimcə, bütün bu və digər səbəblərdən separatçılar narahatdırlar. Ona görə də müxtəlif adlar altında tədbir keçirib bəyanatlar verirlər”.

Vidadi ORDAHALLI

Son xəbərlər