“Amnesty İnternational” insan haqları təşkilatı UEFA-nı mayın 29-da Bakı Olimpiya Stadionunda Avropa Liqasının yekun matçının keçirilməsinə əngəl olmağa çağırıb. Təşkilat guya Azərbaycanda insan haqlarının durumunun qənaətbəxş olmadığını əsas gətirərək oyunun keçirilməsinə etiraz edib.
Əslində, burada təəccüblü nəsə yoxdur. Çünki sırf ermənilərin təsiri altında olan bu təşkilat daim Azərbaycana qarşı ikili standartlardan irəli gələn mövqe ortaya qoymaqla məşğuldur. Artıq dəfələrlə sübut olunub ki, bu cür təşkilatlardan müstəqil siyasət yürüdən ölkələrə qarşı təzyiq vasitəsi kimi istifadə edirlər. Bəllidir ki, Azərbaycanda həmişə mühüm tədbirlər keçirilən ərəfədə "Amnesty İnternational" kimi təzyiq aləti olan təşkilatlar hərəkətə keçir və ölkəmizin imicinə xələl gətirməyə çalışırlar. Əlbəttə, bunun da səbəbi Azərbaycanın dinamik inkişafı, beynəlxalq aləmdə nüfuzunun durmadan artmasıdır. Azərbaycanın bu inkişafı, müstəqil siyasətindən narahat olan bəzi xarici dairələr əllərinə fürsət düşdükcə, ölkəmizə təzyiq göstərməyə cəhd edirlər. Azərbaycan indiyə qədər çoxlu sayda beynəlxalq tədbirə, idman yarışına çox uğurla evsahibliyi edib: "Avroviziya" mahnı müsabiqəsi, Birinci Avropa Oyunları, İslam Həmrəyliyi Oyunları, “Formula-1” kimi mötəbər beynəlxalq yarışların ölkəmizdə yüksək səviyyədə keçirilməsi bunun bariz nümunəsidir. Maraqlıdır ki, hər dəfə də "Amnesty İnternational" kimi reputasiyası zədəli olan təşkilat bizi qaralamağa çalışıb. Azərbaycanı davamlı şəkildə sərt tənqid edən, əsasən də ünvanımıza böhtan atan təşkilatın fəaliyyəti doğrudan da təəccüb doğurmaya bilmir. Bəyəm bu illər ərzində ölkəmizdə müsbətə doğru hansısa addım atılmadı ki, təşkilat onu təqdir etsin?
Yeganə Hacıyeva: “Ölkəmizin adının olduğu yerdə onlar hətta düşmənlərini belə tənqid etməyə qorxurlar”
Politoloq Yeganə Hacıyeva qəzetimizə açıqlamasında bildirdi ki, "Amnesty İnternational" kimi təşkilatdan belə mövqeni biz gözləyirdik: “Artıq bu cür təşkilatlar lazım olan funksiyalarını oynaya da bilmirlər. Tam ifşa olunduqları üçün əksər ölkələr onların hesabatını heç ciddiyə də almırlar. İnsan haqları ilə məşğul olan beynəlxalq təşkilat niyə hansısa ölkə ilə qarşıdurma yolunu tutmalıdır? Çox doğru olaraq qeyd edirsiniz, bəyəm bu ölkədə bir dənə də olsun müsbət iş yoxdur ki, həmin təşkilat onu təqdir etsin? Biz sizinlə dəfələrlə bu mövzularda yazılar işləmişik. Hər dəfə də vurğulamışıq ki, bu təşkilatlar təzyiq qrupları funksiyasını həyata keçirirlər. Bir çoxları böyük dövlətlərin xüsusi xidmət orqanları, bəziləri isə ölkələrin siyasi rəhbərliyinin müəyyən etdiyi tezislər əsasında fəaliyyət göstərirlər. Azərbaycanda bu təşkilatlara qarşı çox doğru rəy formalaşıb. Adlarını çəkən kimi, hamı üzünü çevirir. Gərək öz reputasiyasının qeydinə qalan təşkilat özünü bu səviyyəyə salmayaydı. İdman yarışları hara, insan haqlarını qoruyan təşkilat hara? Onlar bu praktikanı “Avroviziya” ərəfəsində də tətbiq etdilər. Gördülər ki, heç bir uğur qazana bilmədilər. Azərbaycanla bağlı onların o qədər məşğul olmalı işləri var ki... Niyə buna maraq göstərmirlər? Bax, elə bu günlərdə baş verən bir hadisəni deyim. Tanınmış bir azərbaycanlı jurnalisti döyüb, həbs ediblər. Özü də hadisə "Amnesty İnternational"ın bəyənmədiyi Rusiyada yaşanıb. Görürsünüzmü, bir həftədir təşkilatın səsi çıxmır. Çünki ortada Azərbaycan adı var. Ölkəmizin adının olduğu yerdə onlar hətta düşmənlərini belə tənqid etməyə qorxurlar. Hesab edirəm ki, artıq özünə qeyri-ciddi, qərəzli imic qazanmış təşkilatın bu yöndə olan fəaliyyətinə heç ciddi reaksiya vermək belə lazım deyil”.
Məhəmmədəli QƏRİBLİ
