Azərbaycanı növbəti sınağa çəkmək istəyirlər. Ancaq ölkəmizdə bu cür təxribatçı niyyətlərə qarşı sərt immunitet formalaşdığı üçün, bizi indi də müxtəlif mövzularda şantaj edirlər. Əslində, bu təxribatların hardan və niyə qaynaqlandığını biz hamıdan gözəl bilirik. Çünki ilk dəfə deyil ki, bununla üzləşirik. Bəllidir ki, bizi gözü götürməyən qüvvələr Azərbaycan kimi gənc ölkənin başı dik olaraq, ən mötəbər tədbirlərə evsahibliyi etmək iddialarını həzm edə bilmirlər.
Hər zaman görmüşük ki, mühüm tədbirlər öncəsi bizi qaralamağa çalışırlar. Ölkəmizə müxtəlif istiqamətlərdən hücumlar vüsət alır. Hətta siyasətlə bağlı olmayan idman yarışlarını belə siyasiləşdirməyə çalışırlar. Bütün tədbirlər öncəsi eyni sözü deyiblər. Guya buradakı təhlükəsizlik mühiti standarta cavab vermir, infrastruktur və şərait pisdir, ölkədə insan haqlarının vəziyyəti qənaətbəxş deyil. Dəfələrlə gəlib görüblər ki, tədbirlər ən yüksək təhlükəsizlik şəraitində baş tutur. Heç bir iradları da olmayıb. Hətta ölkəmizin təşkilatçılığını uzun müddət digər ölkələr üçün örnək olaraq göstəriblər.
Bənzər ssenari yenə işə salınıb. Budəfəki mövzu ölkəmizin evsahibliyi edəcəyi Avropa Liqasının final matçı ilə bağlıdır. İlk “atəşi” Britaniyanın XİN-i açdı. Ondan sonra təxmin edilirdi ki, kampaniya ardıcıllıqla aparılacaq. Britaniya XİN bəyanat verərək Azərbaycanın bu yarışa evsahibliyi etmək iqtidarında olmadığı rəyini yaratmağa yönəlik bəzi əsassız faktları təqdim etdi. Həmin iddialara ölkəmizdən əsaslı cavab verildiyi üçün, Krallığın ölkəmizdəki səfirliyi öz nazirliklərinin yanlışını düzəldən bir açıqlama ilə çıxış etdi. Ardınca təxribatçı estafet idmana və idmançılara verildi. “Arsenal” klubunun heç də məhsuldar olmayan erməni əsilli, Mxitaryan adlı futbolçusunun milli kimliyi qabardılmağa başladı. Erməni idmançı guya bura gəldiyindən ehtiyat etdiyini deyərək, təxribatçı şouda əsas rolu almış oldu. Maraqlıdır ki, ermənilər bu təxribatlarına İngiltərənin nüfuzlu futbol klubunu da şərik edə bildilər. “Arsenal” rəhbərliyi də Mxitaryanın təhlükəsizliyindən narahat olduğunu əsas gətirib, onu Bakıya gətirməyəcəklərini bəyan etdi. Bununla da guya Bakıya ermənifob bir şəhər olmaq kimi damğanı yapışdırmaq istədilər. Amma həmin əsassız iddiaların da cavabı verildi. Çoxlu misal göstərildi ki, Azərbaycanda indiyə qədər keçirilən sonsuz sayda idman və digər tədbirlərdə ermənilər iştirak edib, hətta qalib olanları da olub. Onların təhlükəsizliyi ilə bağlı hər hansı bir problem yaşanmayıb. Bundan əlavə, Azərbaycanın bir neçə rəsmi qurumu finalın və xüsusilə də “Arsenal” futbolçusunun təhlükəsizliyinə tam təminat verdiyini bəyan etsə də, bu, klubu qane etmədi. Deməli, bütün deyilənlər bəhanədən başqa nəsə deyilmiş. Sonra prosesə Azərbaycanla bağlı daim qərəzli mövqe sərgiləyən beynəlxalq hüquq-müdafiə təşkilatları qoşuldular. Bunun da lazımi effekt vermədiyini görənlər indi də birbaşa final oyunda iştirak edən şəxslərə qarşı təxribatçı xəbərlər dövriyyəyə buraxmağa başladılar. Britaniyanın "The Times" nəşri yazıb ki, guya Avropa Liqasının Bakıda keçiriləcək final matçının iştirakçıları onlara ayrılan biletlərin bir hissəsindən imtina etməyi planlaşdırırlar. Həmin iddialarda qeyd edilir ki, "Arsenal" və "Çelsi", ümumilikdə, 6000-dən çox bilet qaytaracaq, çünki müvafiq olaraq 3500 və 2000 bilet sata biliblər. Qeyd edək ki, UEFA, ümumilikdə, klubların hər birinə 5800 bilet ayırıb ki, bu da finalın keçiriləcəyi stadionda yer tutumunun 10 faizini təşkil edir. Bu istiqamətdə yayılan təxribatçı məlumatlarda qeyd edilir ki, qərar guya Bakı aeroportunun buraxılış imkanlarının aşağı olması ilə əlaqədar qəbul edilib. Əslində, irəli sürülən bu iddiaların əsassız olduğunu ciddi dəlillərlə sübut etmək mümkündür. Bəllidir ki, bu cür mötəbər tədbirlər ölkənin öz istəyi ilə onun ərazisində keçirilmir. Final oyunu da o qəbildəndir.
Finalın Bakıda keçirilməsi UEFA-nın qərarı olub. O da məlumdur ki, belə qərarın verilməsi spontan olmur. Bütün parametrlər araşdırılandan sonra belə qərara imza atılır. Yəni Azərbaycan lazım olan şərtlərə cavab verməsəydi, heç finalın burada keçirilməsinə əvvəlcədən imkan verilməzdi. Azərbaycan belə müraciəti etsə də, daha sərfəli təkliflər irəli sürdüyünə, digər namizədlərlə bağlı daha əlverişli şərait yaratdığına görə bu oyuna evsahibliyi etmək hüququnu qazanıb. Ən maraqlısı isə budur ki, iddialarda final iştirakçısının məhz ingilis klublarının olması ilə bağlı bəzi yersiz fikirlər də səslənir. Guya bu amil təşkilatı işlərdə bir qədər problemə səbəb olur. Bu da əsassızdır. Çünki Azərbaycan belə bir iddianı hələ 2017-ci ildə ortaya qoyub. Onda kim ehtimal edə bilərdi ki, finala məhz 2 ingilis komandası çıxacaq? Məntiqlə, finala Azərbaycana daha yaxın ölkələrin klubları da çıxa bilərdi. Aydındır ki, bu cür idman yarışlarının təşkil edildiyi ölkələrə azarkeşlərin kütləvi axını baş verir. Bu da onların hadisə yerinə çatmasını adi qaydalardakından bir balaca da olsa çətin edir. Bunu böyük idman oyunlarına evsahibliyi edən ölkələrin hər biri yaşayıb. Ancaq Azərbaycanın ən müasir infrastrukturu və nəqliyyat potensialı bu axını qarşılamaq gücündədir. Bundan qəti narahat olmağa dəyməz. Yazının əvvəlində də vurğuladıq ki, artıq bizdə bu cür bəhanələr, təxribatlara qarşı möhkəm immunitet yaranıb. Onlarla mübarizə edib sonda qalib gəlmək kimi təcrübəni mənimsəmişik. Misal kimi “Avroviziya”nı, Avropa və İslam Həmrəyliyi oyunlarını göstərə bilərik. Bu baxımdan da bütün iddialara, kimlərinsə narazılıq və narahatlıq yaratmaq, müxtəlif bəhanələrlə bu oyunun keçirilmısinə əngəl olmaq cəhdlərinə baxmayaraq, dünyanın diqqət mərkəzində olan futbol bayramı ən yüksək səviyyədə baş tutacaq və milyonlarla futbol azarkeşi bundan zövq alacaq. Buna kiminsə qəti şübhəsi olmasın. Bununla Azərbaycan öz arxivinə daha bir mühüm idman tədbirini yüksək səviyyədə təşkil etməyi bacaran qızıl xalı yazdırmış olacaq...
Məhəmmədəli QƏRİBLİ
