18/09/2019 22:31
728 x 90

Səudiyyə İƏT-in Məkkə zirvəsində anti-İran prosesi başlatmaq istəyir - Azərbaycanın mövqeyi…

“Azərbaycan bu oyunlara qoşulmamalıdır”

img

Səudiyyə Ərəbistanının kralı Salman ərəb dünyasının liderlərini Məkkədə təcili toplanmağa çağırıb. Buna səbəb İranla münasibətlərin kəskinləşməsidir. Birləşmiş Ərəb Əmirliyi sahilləri yaxınlığında neft tankerlərinə edilən təxribat və ərəblərin iki neftötürmə stansiyasına xusitlərin hücumu monarxı Ərəb Dövlətləri Liqasına və İran Körfəzi Dövlətlərinin Əməkdaşlıq Şurasına çağırış etməyə vadar edib.

Sammit iyunun 30-da Məkkə şəhərində toplanacaq. Həmin gün Məkkədə İslam Əməkdaşlıq Təşkilatına üzv dövlətlərin yüksək səviyyəli görüşü planlaşdırılıb.

Krallığın xarici işlər naziri Adil Əl Cubeyr bildirib ki, Ər-Riyad regionda müharibə başlamasını istəmir və bunun qarşısını almaq üçün əlindən gələni edir: “Lakin Səudiyyə Ərəbistanı bütün gücü və qərarlılığı ilə təxribatlara cavab verəcək”, - deyən nazir bütün dünya ölkələrini “regionda təhükəsizlik və sabitliyi pozmağa çalışan Tehranın xaos toxumları səpməsinin” qarşısını almağa çağırıb.

Məlum olduğu kimi, Azərbaycan yaxın qonşuluq münasibətlərini nəzərə aldığı üçün, İran əleyhinə hər hansı bir kampaniyada iştirak etməyib. İndi isə Səudiyyə Ərəbistanı hətta Azərbaycanın da üzv olduğu İslam Əməkdaşlığı Konfransına üzv olan ölkələri də anti-İran koalisiyasına cəlb etməyə, orada hansısa prosesi başlatmağa çalışır. Belə olan halda, Azərbaycan hansı mövqeni tutmalıdır?

  • Zərdüşt Əlizadə: “Ona qarşı olan hər hansı koalisiyaya qoşulmamışıqsa, o mövqeyimizdə də qalmalıyıq”

Politoloq Zərdüşt Əlizadə “Bakı-Xəbər”ə açıqlamasında bildirdi ki, Səudiyyənin bu cəhdlərinin kökündə heç bir ciddi motiv dayanmır: “Səudiyyə kralı, faktiki olaraq, həmin bölgədə və İslam dünyasında ABŞ-ın nökəri funksiyasını həyata keçirir. Ona Trampdan göstəriş gəlib ki, belə görüntü yaratsın. Guya İran bölgədəki stabilliyi pozur, ərəb ölkələrinə qarşı təhlükə mənbəyinə çevrilib. Əslində isə bütün bu işləri elə Səudiyyənin özü görür. Bu gün Səudiyyə Yəmənə hücum edib məzhəb zəminində orada ərəbləri qırır. Yəqin ki, bir qrup satqın, öz millətinə zülm edən ərəb ölkələri də toplaşıb orada çığır-bağır salacaqlar ki, guya İran bunları öldürür. Ancaq bütün bu proseslərin İrana heç bir təsiri olan deyil. Azərbaycan bu oyunlara qoşulmamalıdır. Biz İranla qonşu, dost ölkəyik. Əvvəlcədən necə ona qarşı olan hər hansı koalisiyaya qoşulmamışıqsa, o mövqeyimizdə də qalmalıyıq”.

Politoloqun sözlərinə görə, Fars körfəzindəki gərginliyin səbəbi Amerikanın onun planlarına müqavimət göstərən sonuncu müsəlman dövlətini dağıtmaq niyyətindən irəli gəlir: “Bütün müsəlman dövlətlərini – Sudanı, Tunisi, Liviyanı, Suriyanı, İraqı, Yəməni, bir sözlə, hamısını dağıdıblar. İşğalı və dünya hegemonluğunu tanımayan bir İran qalıb. İranı da dağıtmaq istəyirlər. Bunun üçün böhtan söyləyirlər. Bəhanələri də budur ki, guya İran nüvə öhdəliklərini yerinə yetirmir. Halbuki, bəzi Avropa ölkələri bunun əksini söyləyirlər. Bir sözlə, biz yaxın qonşumuz olan ölkəyə qarşı bu cür məkrli planlarda iştirak etməməliyik”.

Məhəmmədəli QƏRİBLİ

Son xəbərlər