Məlum olduğu kimi, Ermənistanda vəziyyət çox gərgindir. Demək olar ki, hakimiyyətsizlik hökm sürür. Hakimiyyətin əsas qolları Paşinyana tabe olmurlar. Ölkənin daxilində güclü dayaqlara malik olan “Qarabağ klanı” Ermənistanın yeni hakimiyyətinə açıq əzələ nümayiş etdirir. Həmçinin, Dağlıq Qarabağdakı separatçı rejim də, faktiki olaraq, Paşinyana hərbi müxalifət kimi öz diktələrini edir. Onların təbirincə desək, “başqa ölkə”nin indiki və sabiq rəhbəri gəlib Ermənistanda türmənin qapısını açıb həbsdəki sabiq prezident Köçəryanı azadlığa buraxır.
Ordunun daxilində də Paşinyana açıq etiraz edən qüvvələrin olduğunu Ermənistan cəmiyyətinin özü etiraf edir. Son hadisə göstərdi ki, məhkəmə, ədliyyə sistemi də Paşinyana tabe deyil. Eləcə də Ermənistan Prezidenti Armen Sarkisyanın və erməni kilsəsinin də son proseslərdə faktiki olaraq Paşinyanı dəstəkləməməsi ölkədəki vəziyyətin gərgin olduğuna, çoxhakimiyyətliliyin mövcudluğuna dəlalət edir. Bu vəziyyət sanki Azərbaycandakı 90-cı illərin əvvəlini xatırladır. Erməni siyasi rəhbərliyində təmsil olunan bir çox adam, həmçinin, eks-prezidentlər etiraf ediblər ki, onların müharibədə müvəqqəti qələbə qazanmasında Azərbaycandakı həmin hadisələrin böyük rolu olub. Yəni başı hakimiyyət davasına qarışan ölkənin ərazilərini asanlıqla işğal edə biliblər. Bəs biz necə, Ermənistandakı yaranmış vəziyyətdən yararlana bilərikmi?
Akif Nağı: “Bir-birlərini şantaj edirlər ki, qarşı tərəf torpaqları vermək üçün bu oyunları ortaya atıb”
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, Azərbaycan orada gedən prosesləri daha dərindən izləməlidir: “Biz müharibə şəraitində olan ölkələrik. Təbii ki, bir-birimizin zəif və güclü tərəflərini bilməliyik. Bu, bütün dünya tarixində belə olub. Sizinlə tam razıyam ki, 90-cı illərdə ermənilər yaranmış situasiyadan məharətlə istifadə etdilər. Nəticədə çox asanlıqla bizim böyük bir ərazimizi işğal altına sala bildilər. Ermənistanda lap vəziyyət əla olsa belə, biz onları məhv etmək gücündəyik. Bunu heç vaxt unutmamalıyıq ki, oradakı hansı situasiyanın yaşanmasından asılı olmayaraq, biz işğaldan torpaqlarımızı azad etməyə köklənməliyik. Ancaq oradakı vəziyyətin qeyri-stabilliyi bizim üçün əlavə şanslar yaradır. Müharibəni aparmaq üçün düşmənin bütün vəziyyəti, ölkəsindəki siyasi vəziyyət, hakimiyyət böhranının olub-olmaması dərindən təhlil olunmalıdır. Ermənistandakı vəziyyət göz önündədir. Mən deyərdim ki, hətta katostrofikdir. Paşinyanan özü hakimiyyətdə ola-ola əhalini inqilab etmək, məhkəmə sistemində islahat aparmaq üçün küçələrə çağırır. Başlarını itiriblər. Hansı ölkənin başçısı öz idarəetməsinə qarşı belə davranış sərgiləyər? Bir məsələ ki, imza ilə düzəlir, onda əhalini küçələrə tökməyin nə anlamı var? Separatçı qurumla da münasibətləri, demək olar ki, müharibə həddindədir. İndi siz təsəvvür edin ki, bu vəziyyətdə olan ölkədə müharibə hansı panikaya səbəb ola bilər? Dağlıq Qarabağdakı qondarma rejim Rusiyanın dedikləri ilə oturub-durur. Paşinyana tabe olmur. Ona görə də müharibənin səsi eşidilən kimi onlar hakimiyyət uğrunda bir-birini qıracaqlar. Maksimum dərəcədə bu şansı buraxmamalıyıq. Birmənalı şəkildə, hərbi əməliyyatlara başlayıb, torpaqlarımızı işğaldan azad etməliyik. Fikir verirsinizsə, onların özlərinin ağlına bu hamıdan tez gəlib. Bir-birlərini şantaj edirlər ki, qarşı tərəf torpaqları vermək üçün bu oyunları ortaya atıb”.
Məhəmmədəli QƏRİBLİ
